1 Samuel 23 - সান্তালী বাইবেল

Kayila nagraha rukhiyạkʼkan

¹ Hoṛko do senkate Dạudko lạiyadea, “Ńelme, Philisṭiko do Kayila nagraha upạrteko lạṛhại kana ar onḍenakʼ khạrại reakʼ anajko luluṭ kana.”

² Unre Dạud do Probhu Isore kulikedea, “Iń do cetʼ senkate onko Philisṭikoń ńẽtʼkoa?” Probhu Isore roṛ ruạṛadea, “Hẽ, Do calakʼme. Philisṭiko ńẽtʼkate Kayila nagraha rukhiyạime.”

³ Menkhan Dạudren hoṛko menkeda, “Jihudạ disạmre abo do luyutʼ cuputʼ menakʼ bona; Kayilaren Philisṭi lạṛhại phạdko upạrte bon calakʼ do cetʼ artetʼ botoranakʼ baṅkana?”

⁴ Unre Dạud do arhõ Probhu Isor ṭhene kuliyana ar Probhu Isor do roṛ ruạṛadeteye metadea, “Kayilate Do calakʼme, Philisṭiko do amakʼ tireń soprot akatʼkoa.”

⁵ Dạud do unre acʼren hoṛkoante Kayilateye calaoena ar Philisṭiko sãoteye lạṛhạiyena ar onkoren ḍaṅgrako, bhiḍikoe luṭ ạguketʼkoa. Ar Philisṭiren ḍher hoṛe gocʼketʼkote Kayilaren hoṛkoe rukhiyạketʼkoa.

⁶ Ahimelekren hopon Abiathar do Dạud ṭhen Kayilateye dạṛketʼ oktere soṅgete maraṅ naekewakʼ ehpod hõe idi daraleda.

Sạul do Dạude lagayede

⁷ Dạud Kayilare menaea menteye ańjomketʼ khan Sạule menkeda, “Niạ dhao Isor do ińakʼ tire Dạude jimạ akadea, ente phaṭok-duạranakʼ ar hurkạṛanakʼ nagrahateye boloakante uni do apnarteye siń esetʼ akana.”

⁸ Ar Sạul do Kayilare senkate Dạud ar uniren hoṛ gherao esetʼko lạgitʼ acʼren sanam lạṛhại phạdkoe hoho jarwaketʼkoa.

⁹ Dạud do tinreye baḍaekeda, Sạul do uni upạrteye soṛojontro kana unre uni do naeke Abiathare metadea, “Amakʼ ephod nonḍe ạguiyme.”

¹⁰ Ar unreye menkeda, “E Israelkoren Probhu Isor, iń amren golam do khạṭitegeń baḍaekana, Sạul do iń iạte Kayila nagraha ujạṛ lạgitʼ nonḍe hijukʼe monejoṅ kana.

¹¹ Kayilaren hoṛ do cetʼ uniyakʼ tireko soprotińạ? Ar okań ańjomakatʼ onkage cetʼ Sạul do nonḍe sạrigeye hijukʼa? E Israelren Probhu Isor, iń amren golam lạiyạńme baṛe. Probhu Isore menkeda, “Hẽ, uni doe hijukʼgea.”

¹² Unire Dạud do arhõe kuliyana, “Kayilaren hoṛ do cetʼ iń ar ińren hoṛko Sạulakʼ tireko soprotlea?” Probhu Isore menkeda, “Hẽ, soprotmegeako.”

¹³ Noa katha ańjomkate Dạud do acʼ sãoten turui sae hoṛkoante Kayila bạgikateye oḍok calaoena ar mitʼ ṭhạ̃i khon ar mitʼ ṭhạ̃ite ńir baṛaeye ehopʼena. Ar Sạul do Dạud Kayila khone dạṛketʼ reakʼ kathae ańjomketʼ khan onḍe do ar bae senlena.

¹⁴ Dạud do hahaṅkar reakʼ buru gaṛkore ar Siph hahaṅkar reakʼ buru ṭoṭhareye tahẽyena. Ar Sạul do dinke din Dạude sendra baṛakedea menkhan Isor do uniyakʼ tire Dạud bae soprotledea.

¹⁵ Siph hahaṅkar reakʼ Horesre tahen jokhecʼ Dạud doe ańjomkeda, Sạul do Dạud goje lạgitʼe oḍok hecʼakana.

¹⁶ Unre Sạulren hopon Jonathan do Horesre Dạud ṭhen hecʼkate Isor cetanre bhorsakʼ reakʼe udgạukedea.

¹⁷ Jonathane menkeda, “Aloben botorokʼa; ạlińren baba Sạulakʼ tire do baben sapʼ ocokʼa. Aben do Israel disạmren rajben hoyokʼa, ar ạliń do abenren dosaricʼge. Ạlińren baba hõ niạ katha doe baḍaegea.”

¹⁸ Ar unkin bana hoṛ do Probhu Isor samaṅre mitʼṭecʼ bondobos kin dohokeda. Ar Jonathan do oṛakʼe ruạṛ calaoena menkhan Dạud do Horesregeye tahẽyena.

¹⁹ Siph atoren hoṛ do Gibeate Sạul ṭhen senkateko menkeda, “Dạud do ale talaregeye okoakana. Uni do Hores ṭhenakʼ Jesimonakʼ dạkhinre Hakila buru reakʼ gaṛ lekan ṭhạ̃ikoreye tahenkana.

²⁰ E maharaj, am do amakʼ kusi lekage hijukʼme. Ar aleakʼ kạmi do rajakʼ tire uni soprotkaege.”

²¹ Sạule roṛ ruạṛatʼkoa, “Probhu Isor do apeye bhorapema, ente iń lạgitʼ ape do mãyã menakʼtapea.

²² Ape do senkate arhõ mońjte khoj hataope; uni okareye tahenkana mente ar okateye calakʼ kana ar onḍe okoe uniye ńel akadea ona baḍae ạguiype. Ińiń ańjom akada uni do ạḍi cạtur hoṛ kanae.

²³ Uniyakʼ joto okokʼ reakʼ ṭhạ̃i ciyạ ạguiytaepe. Ar ona tayom khạṭi khoborantepe ruạṛ hecʼlenre iń do ape sãoteń senokʼa. Ar disạm talareye tahen enḍekhan uni do Jihudạren sanam bõsko tala khoniń sendra oḍokea.”

²⁴ Onko hoṛ do unre Sạul laha lahateko mohnḍayente Siphteko ruạṛ calaoena. Unre Dạud do acʼren hoṛkoante Jesimon dạkhinre menakʼ Araba reakʼ Maon hahaṅkarreye tahẽkana.

²⁵ Sạul ar uniren hoṛ do Dạud sendrayeko ehopʼena. Ar Dạud do ona khobor ańjomkate onḍe khon Maon hahaṅkar reakʼ huṭupʼ dhiri cạṭạnite senkateye tahẽyena. Ar Sạul do ona khobore ńamketʼ khan Dạude khudạukedea.

²⁶ Sạul do buru niạ aṛeteye calaoena ar Dạud do acʼren hoṛkoante buru hanasa aṛeteye calaoena. Onko do Sạul ṭhen khon dạṛ paskaokʼ lạgitʼko akbakao baṛaekan tahẽkana. Sạul do Dạud ar uniren hoṛkoe khudạu tiyokʼ ạguiyetʼko tahẽkana.

²⁷ Ar inạkʼ khange mitʼṭen hoṛ do Sạul ṭhen hecʼenteye menkeda, “Philisṭiko do disạmre jhãpko emakada, onate usạrate ruạṛ calakʼme.”

²⁸ Niạ katha ańjomkate Sạul do Dạud ar bae khudạuledea uni do Philisṭiko upạrteye laha idiyena. Ona iạte ona ṭhạ̃i reakʼ ńutum do, “Paskaokʼ reakʼ huṭupʼ dhiriko ńutumkeda.”

²⁹ Dạud do onḍe khone uṭhạuente En gedi reakʼ buru gaṛkore senkateye tahẽyena.