1 Samuel 22 - সান্তালী বাইবেল

Adulam ar Mispare Dạud

¹ Dạud do Gat khone dạṛketʼte Adulam ṭhenakʼ mitʼṭecʼ danderreye okoyena. Ona katha ańjomkate uniren dadattetʼtako ar uni apatakʼ bõsren hoṛ do uni ṭhenko calaoena.

² Okoe do muhinre ar rinteko perecʼ akan tahẽkan ar okoe do duk-bhabnareko tahẽkan onko mitʼke mitʼ hoṛ do Dạud ṭhen senkateko jarwayena. Ar Dạud do onkoren subedare hoyena. Nonkate ponsae herel hopon do uni sãoteko mitʼena.

³ Ar Dạud do onḍe khon Moab disạm reakʼ Mispateye senena. Ar Moabren raje metadea, “Isorakʼ sana ińre cetʼkan ona ạuriń baḍae ńam hạbicʼ ińren eṅgạń ar ạpuń do dayakate am ṭhen tahẽ ocowạkinme.”

⁴ Ona tayom uni do acʼren eṅgat-apate ạguketʼkinte Moabren raj ṭhene doho oṭokatʼkinạ. Ar tinạkʼ din Dạud buru gaṛreye tahẽyen unạkʼ din unkin do Moab raj ṭhenkin tahẽyena.

⁵ Ar Gad ńutuman mitʼṭen nạbi do Dạude metadea, “Buru gaṛre do ar alom tahena, am do Jihudạ disạmte calakʼme.” Unre Dạud do ona ṭhạ̃i bạgikate Heretʼ birteye boloyena.

Sạul do naekekoe khũnketʼko

⁶ Sạule do Dạud ar uni sãotenkoakʼ khobor ńam akana menteye baḍaekeda. Unre uni do Gibea nagrahare buru coṭ reakʼ mitʼṭecʼ jhãwãr dare buṭạreye duṛupʼ akan tahẽkana. Unre uniyakʼ tire do borlom tahẽkana ar uniren sanam kạmiyạ hoṛ do uni beṛhaeteko teṅgo akan tahẽkana.

⁷ Uni do onkoe metatʼkoa, “Benjamin gusṭiren hoṛko ańjompe, Jisạiren hopon do cetʼ jaega-jumi ar darkha bagwankoe emakatʼpea? Uni do cetʼ hajarko cetanre ar sae saeko cetanre subedare bahalpea?

⁸ Ape do iń upạrtepe soṛojontro akada ar Jisạiren hopon sãote ińren hopon okae bondobos akatʼ ona do okoehõ bape baḍae ocoakadińa. Ińren hopon do teheń ińren guti iń upạrte tãṛãgokʼ lạgitʼe uskurkedea ar ona katha hõ bape baḍae ocoakadińa se iń lạgitʼ okoe hõ duk do bạnukʼtapea.”

⁹ Edomren hoṛ Doeg do unre Sạulren kạmiyạko sorregeye tahẽkana. Uni doe menkeda, “Iń do Jisạiren hopon Nob atore Ahiṭubren hopon Ahimelek ṭhen senokʼ iń ńelakadea.

¹⁰ Ar Ahimelek do uni reaṅ Probhu Isorakʼ sana do cetʼ kana mente onae kuliyana. Uni do jomakʼ hõe emadea ar Philisṭi Goliạtakʼ tarwaṛe hõe emadea.”

¹¹ Niạ katha ańjomkate Sạul raj do Ahiṭubren hopon naeke Ahimelek ar uniren apatakʼ bõsren hoṛko, metakʼme Nobren joto naekeko hoho ạguko lạgitʼ hoṛe kolketʼkoa. Ar onko joto do raj ṭhenko hecʼena.

¹² Unre Sạule menkeda, “Ańjomme, E Ahiṭubren hopon.” Uniye menkeda, “Ma roṛme, maharaj.”

¹³ Sạul do uniye metadea, “Am ar Jisạiren hopon aben do iń upạrte cedakʼ ben soṛojontrokeda? Iń upạrte tãṛãkʼkate jemone hul daṛeakʼ onate am do piṭhạ ar tarwaṛem emadea ar unire Isorakʼ sana do cetʼ kana mente ona hõm kuliyana.”

¹⁴ Ahimelek do raj roṛ ruạṛadeteye metadea, “E maharaj, amren sanam kạmiyạko khon amren jãwãe gomkem Dạud leka pạtiạr do ar okoe menaea? Uni do amren pahra khataren mukhiyạ kanae ar amakʼ gharońj talaren hõ mitʼṭen manoticʼge.

¹⁵ Iń do cetʼ pạhil dhao enhilokʼge uni reaṅ Isorakʼ sana cetʼkana menteń kuliakawana? Tishõ baṅa. E maharaj, amren uni guti se uniren apatakʼ bõsren hoṛko hõ alom dusikoa. Niạko babotre amren nui guti do cetʼge bae baḍaea.”

¹⁶ Menkhan raje menkeda, “E Ahimelek, am ar ạpumakʼ bõsren sanam hoṛ do khạtige gujukʼ hoyokʼtapea.”

¹⁷ Ona tayom raj do acʼ aṛere teṅgo akan lạṛhại phạdkoe metatʼkoa, “Ape do senkate Probhu Isorren noko naekeko gocʼ giḍikakope. Noko doko Dạud secʼ akana. Arko baḍaekan tahẽkana, Dạud doe dạṛeda, enhõ onko do ona katha bako baḍae ocoledińa.” Menkhan rajren kạmiyạko do Probhu Isorren naekeko cetanre ti rakabtako do bako rạjilena.

¹⁸ Unre raj do Doege metadea, “Enḍekhan amge senkate naekeko gocʼkom.” Edomren Doeg do enhilokʼ irạlgel mõṛẽ naekeye gocʼketʼkoa. Unre naekekoakʼ hoṛmore do mĩhĩ musnạ kicricʼ reakʼ ephod tahẽkana.

¹⁹ Ona tayom uni do naekekoakʼ ato Nob do tarwaṛeteye ńẽtʼkeda ar onaren herel hoponko, maejiuko, ńir keṭecʼ gidrạko, bale gidrạko, gadhako, ḍaṅgrako, bhiḍiko sudhạ tarwaṛeteye gocʼ cabaketʼkoa.

²⁰ Ahiṭubren goṛomtetʼ koṛa, metakʼme Ahimelekren hopon do jãhãlekateye ńir paskaoente Dạud ṭhene dạṛkeda. Uniyakʼ ńutum do Abiathar tahẽkana.

²¹ Abiathar do Dạude khoboradea, Sạul do Probhu Isorren naekekoe gocʼketʼkoa.

²² Niạ katha ańjomkate Abiathare metadea, “Edomren Doeg enhilokʼ onḍe ńelkateń bujhạuleda, uni do senkate khạṭige Sạule baḍae ocoyeya. Amren ạpumakʼ bõsren hoṛkoakʼ gujukʼ lạgitʼ dạyi doń iń kangea.

²³ Am do iń ṭhenge tahenme, alom botorokʼa. Ar okoe amakʼ jiwi hatao lạgitʼe kurumuṭuletʼ uni do ińakʼ jiwi hatao lạgitʼ hõe kurumuṭu kana. Am do iń ṭhen nirạitem tahẽdaṛeakʼa.”