1 Samuel 21 - সান্তালী বাইবেল

Dạud do Nob atore

¹ Ona tayom Dạud do Nob atore naeke Ahimelek ṭhene senena. Unre Ahimelek do botorte thar tharaokʼ tulucʼ Dạud samaṅreye oḍok hecʼena. Uni do Dạude kulikedea, “Cedakʼ eskar do menama? Ar am sãote cedakʼ eṭakʼko do bạnukʼkoa?”

² Dạud do naeke Ahimeleke roṛ ruạṛadea, “Raj do mitʼṭecʼ kạmi reakʼe bhar akawạdińa, ar oka kạmi lạgitʼe kolakadiń ona reakʼ ar okoege jemon jãhãnakʼ aloko baḍae daṛeakʼ. Ar ona iạte ińren hoṛ do mitʼṭecʼ niṭakatʼ ṭhạ̃ire iń lạgitʼ koyokʼ hor iń menakawatʼkoa.

³ Am ṭhen jãhãnakʼ menakʼa? Den, mõṛẽ goṭen piṭhạ imạńme se jãhãnakʼ menakʼ khan onage imạńme.”

⁴ Naeke do Dạude roṛ ruạṛadea, “Jãhã lekan piṭhạ iń ṭhen do bạnukʼa, menkhan samaṅakʼ reakʼ sonot piṭhạ menakʼa. Amren hoṛko jãhãe maejiuko ṭhen bako boloakan khan onko doko jom daṛeakʼa.”

⁵ Dạude menkeda, “Aleakʼ niạm lekate ale do sạrige jãhãe maejiu ṭhen bale boloakana. Lạṛhại phạdkoante tinre jãhãnakʼ kạmi lạgitʼ iń oḍokokʼ unre ińren lạṛhại phạdko do saphako tahena. Tobe teheń do ḍher sapha menakʼkoa.”

⁶ Onate naeke do ona sonotakʼ piṭhạ Dạude emadea, ente ona piṭhạ chaḍa ar eṭakʼ jãhãn piṭhạ uni ṭhen do baṅ tahẽkana. Ar enhilokʼge ona piṭhạ do Probhu Isor samaṅ khon ocokʼkate ona ṭhạ̃ire lolo piṭhạko dohoakatʼ tahẽkana.

⁷ Doeg ńutuman Sạulren mitʼṭen Edomren guti do enhilokʼ Probhu Isor ńutumte mitʼṭecʼ kạmi lạgitʼ onḍeye tahẽkana. Uni do Sạulren gutikoren sordare tahẽkana.

⁸ Dạud do Ahimeleke kulikedea, “Nonḍe am ṭhen jãhãn borlom se tarwaṛe bạnukʼa? Ente rajakʼ jạruṛ kạmi tahẽkante ińakʼ tarwaṛe se eṭakʼ jãhãnakʼ khanḍa bhanḍa soṅgete do bạń ạgu daṛeakada.”

⁹ Naekeye menkeda, “Ela buru nalare Philisṭikoren okoe Goliạtem gocʼlede uniyakʼ tarwaṛe menakʼa. Ona do kicricʼte bedhao akatʼ ehpod danaṅre aka doho menakʼa. Am do onam hatao daṛeakʼa. Ona chaḍa ar jãhãn tarwaṛe nonḍe do bạnukʼa.” Dạude menkeda, “Ona lekan tarwaṛe ar jãhãre menakʼa? Menakʼ khan ona hõ imạńme.”

Dạud do Gat nagrahare

¹⁰ Dạud do enhilokʼge Sạul ṭhen khone dạṛketʼte Gat nagraharen Akis raj ṭhene hạjirena;

¹¹ Menkhan Akisren hoṛ do Akisko metadea, “Nuige baṅ disạmren raj do? Nui reaṅge cetʼ hoṛko do enecʼ sereńateko menleda, ‘Sạul doe gocʼketʼkoa hajar hajar Dạud doe gocʼketʼkoa ojut ojut?’ ”

¹² Niạ katha ańjomkate Dạud do cintạ hecʼadea ar Gatren Akis raje botoradea.

¹³ Ona iạte uni tinạkʼ din onko ṭhene tahẽyen unạkʼ din onko samaṅre koṅka lekae bhankeda. Ar tinre uniko sapʼkedea unre uni do koṅka leka duạr reakʼ kapaṭkore ạuṛige dag baṛaeye ehopʼena ar acʼakʼ ulidakʼ do goco cetanre tiṛạ toṛoy joro ocokeda.

¹⁴ Unre Akis do acʼren hoṛe metakʼkoa, “Ńele kangeape tho koṅka hoṛ kanae, enḍekhan cedakʼ iń ṭhenpe ạgu akadea?

¹⁵ Koṅka reakʼ cetʼ nunạkʼ okulạn hoyakana, onate iń samaṅrepe ạguakadea? Ar nonkan hoṛ do cedakʼ ińakʼ oṛakʼtepe ạguakadea?”