1 Samuel 20 - সান্তালী বাইবেল

Dạud ar Jonathanakʼ gatekʼ

¹ Ona tayom Dạud do Rama reakʼ Nayot khone dạṛketʼte Jonathan ṭhene senena ar uniye kulikedea, “Ạliń do cetʼ liń ceka akada? Ar ạlińakʼ dos baṅ cetʼkan? Abenren baba upạrte cetʼ liń kại akatʼte, uni do gocʼ liń lạgitʼe kurumuṭu kana?”

² Jonathane menkeda, “Tishõ baṅa, aben do baben gocʼ ocokʼa. Ńelben, ạlińren baba do huḍiń ar maraṅ jãhãn kạmige ạliń ạuriye baḍae ocoliń hạbicʼ bae kạmikana. Enḍekhan niạ katha do ạliń ṭhen khon cedakʼe danaṅa? Noa do baṅ hoedaṛeakʼa.”

³ Menkhan Dạud do arhõ kiriạkateye menkeda, “Abenren baba do bhagetegeye baḍaea aben do ạliń ben dulạṛetʼ lińạ. Onate pasecʼ uni do mone moneteye hudiseda, Jonathan noa babotre baṅ baḍae ocoyege bhagea, ente uni do duke ńama. Menkhan jiwetʼ Isor ńutumte ar abenakʼ jiwetʼ leka ạliń ar gujukʼ talare do eken mitʼ taṛamge pharak menakʼa.”

⁴ Unre Jonathan do Dạude metadea, “Aben oka cekae ben metaliń onage ạliń do liń kạmiya.”

⁵ Dạude menkeda, “Ńelben, gapa do molokʼ cando kana. Ar raj sãote ạlińakʼ do jojom duṛupʼ reakʼ katha menakʼtạlińa. Menkhan aben do sen ocoạliń ben. Ạliń do meyaṅ ạyupʼ hạbicʼ ṭạnḍire oko akanliń tahena.

⁶ Ar abenren baba do ạlińe khojleliń khan enḍekhan ben metaea, ‘Dạud do Bethlehemte acʼakʼ oṛakʼte usạra calakʼ lạgitʼ iń ṭhen nehõrkate hukume khojkeda,

⁷ ente, onḍe do onkoren bõskoakʼ bochor reakʼ janwar samaṅokʼakʼ porob hoyokʼkana.’ Uniye menle khan, ‘Bhagegea,’ enḍekhan abenren golam doliń khạtirgea; menkhan uniye raṅgao botejokʼ enḍekhan baḍae ben, ạliń lạgitʼ bạṛicʼakʼ doe ṭhik dohoakada.

⁸ Onate aben do ńitokʼ ạlińre dayakʼben, ente Probhu Isor samaṅre aben do mitʼṭecʼ bondobos ben dohoakada. Ar ạliń liń dos akatʼ khan tobe do abenge gocʼliń ben, abenren babawakʼ tire jimạliń reakʼ cetʼ jãhãn jạruṛ menakʼa.?”

⁹ Jonathane menkeda, “Tishõ nonka do aloben hudisa. Ạliń liń baḍae daṛele khan ạpuń do khuti taben lạgitʼe goṭa uricʼakada mente, enḍekhan ạliń do khạṭige liń baḍae ocobena.”

¹⁰ Unre Dạude menkeda, “Niạ babotre abenren baba bạṛicʼe beohar, enḍekhan ona do okoeye baḍae ocolińạ?”

¹¹ Jonathane menkeda, “Dela, ṭạnḍi secʼ laṅ calakʼa.” Ar niạ menkate bana hoṛ mitʼ sãotekin oḍok calaoena.

¹² Ona tayom Jonathan do Dạude metadea, “Israelren Probhu Isorge gohae tahenma, gapa se meyaṅ ạliń do ạlińren baba sãote kathaliń roṛa. Unre aben secʼ mońj liń bujhạu khan unrege hoṛ kolkate liń baḍae ocobena.

¹³ Ar ạlińren baba abenakʼ bhạlại bae khoj ar ạliń bạliń baḍae ocoben ar nirạite bạliń kolben enḍekhan Probhu Isor do sạjạiye emalińma ona botor sạjạige. Probhu Isor do cetʼleka ạlińren baba sãoteye tahẽkan aben sãote hõ onkage baṛeye tahenma.

^14-15 Ar ạliń jiwetʼ liń tahen enḍekhan Probhu Isor cetʼlekae pạtiạrạnicʼ kan onkage aben hõ pạtiạrạnicʼ tahen ben. Menkhan ạliń liń gocʼlen khan ạliń bõsko lạgitʼ jaejug pạtiạrạnicʼ tahen ben; ar Probhu Isor do dhạrti khon Dạudren mitʼke mitʼ bạirikoe maraoko hạbicʼ hõ pạtiạrạnicʼ tahen ben.”

¹⁶ Jonathan do unre Dạud ar uniren bõsko sãote mitʼṭecʼe bondoboskeda, “Probhu Isorge Dạudren bạiriko cetanreye hala hạliyma.”

¹⁷ Jonathan do acʼ apnar lekage Dạude dulạṛede tahẽkante uni do Dạud arhõe kiriạ ocokedea.

¹⁸ Jonathan do Dạude metadea, “Gapa do molokʼ cando reakʼ porob kana. Ar abenakʼ duṛupʼakʼ onḍe khạlige tahelen khan aben doben baḍaeyokʼa bạnukʼbena mente.

¹⁹ Aben okare ben okolen meyaṅ arhõ usạra senkate onḍe ḍạṅ akatʼ dhiri ṭhen okokokʼben.

²⁰ Ạliń do baṅma jãhãnakʼ ńelkate sar liń aṛakʼ akada onka ona ḍạṅ dhiri sorre pea sar liń tuńa.

²¹ Ona tayom mitʼṭen koṛa niạ menkate liń kolea, ‘Do, sarko sendra ạguiyme.’ Ar unre liń menle khan, ‘sarko iń secʼre menakʼa, ạguiyme.’ Enḍekhan aben doben hijukʼa, ente jiwetʼ Isor ńutumte liń metaben kana aben doben khạtirjomagea, ar botor do bạnukʼanaṅ.

²² Menkhan uni koṛa liń metae, ‘am secʼre sarko menakʼa,’ enḍekhan aben do calakʼben, ar bujhạuben Probhu Isorge calakʼe metaben kana mente.

²³ Disạiben, aben ar ạliń talare oka bondobos hoyen onaren goha do Probhu Isorge jaejug hạbicʼe taheyena.”

^24-25 Ona tayom Dạud do ṭạnḍire senkateye okoyena. Ar ambas ńindạ reakʼ porob seṭeren khan raj do lahate lekage bhit aṛere acʼakʼ duṛupʼakʼre duṛupʼkate jojome ehopʼena. Unre Jonathan doe beretʼena jemon Abner senkate Sạul aṛereye duṛupʼ daṛeakʼ. Ar Dạudakʼ duṛupʼakʼ ṭhạ̃i do khạlige tahẽyena.

²⁶ Enhilokʼ Sạul do cetʼge bae menleda, enteye hudiskeda, hoedaṛeakʼa Dạud do jãhãnakʼ iạteye besapha akana; ar khạṭige uni do bae saphawa.

²⁷ Dosar hilokʼ, metakʼme molok cando porob reakʼ dosar hilokʼ hõ Dạudakʼ ṭhạ̃i do khạlige tahẽyena. Unre Sạul do acʼren hopon Jonathane kulikedea, “Jisạiren hopon do cedakʼ jojom bae hecʼlena? Hola hõ bae hecʼlena, ar teheń hõ baṅ.”

²⁸ Jonathane roṛ ruạṛkeda, “Dạud do Bethlehemte calakʼ lạgitʼ ạḍiye nehõrạdiń tahẽkana.

²⁹ Uni doe metadiń tahẽkana, ‘dayakate sen ocoạliń ben; ente ạliń bõsren hoṛko do nagrahare mitʼṭen samaṅokʼakʼ porobko porobokʼ kana ar ạlińren dada do onḍe hạjir tahen lạgitʼe hukum akawatʼlińa. Onate ạliń cetanre daya menakʼtaben khan sen ocoạliń ben jemon ạlińren boehako liń ńel ạguko daṛeako.’ Ona iạte uni do maharajakʼ bhojre bae hecʼ daṛeakada.”

³⁰ Noa katha ańjomkate Sạul do Jonathan cetanre edrete pit caṛhaoentaea. Uni doe metadea, “Eya peṛta ar huhul ạimạiren hopon! Am do cetʼ bạń baḍae akatʼmea, Jisạiren hopon secʼem hoyakana mente am do am cetanre ar amren eṅgam cetanre lajaoem ạguakawana?

³¹ Tinạkʼ din Jisạiren hopon niạ dhạrtire jiwetʼe tahen unạkʼ din am do bam ṭarhao tahena, ar amakʼ rajosṭi hõ baṅ ṭikạu tahena. Onate ńitge hoṛ kolkate iń ṭhen ạguiyem, uni do gujukʼtege hoyokʼtaea.”

³² Jonathan do acʼren apattetʼe metadea, “Uni do cedakʼ gujukʼ hoyokʼtaea? Uni do cetʼe ceka akatʼte?”

³³ Unre Sạul do Jonathan goje lạgitʼ borlome sohoradea. Ar onate Jonathan doe bujhạukeda, acʼren apat do Dạud goje reakʼe ṭhik dohoakada.

³⁴ Unre Jonathan do ạḍitetʼe edreyente ṭebil khone beretʼena ar enhilokʼ reakʼ bhoj do thoṛa hõ bae jomleda. Acʼren apattetʼ Dạude opomankedete uni do monre ạḍi duke ńamkeda.

³⁵ Dạud sãote Jonathanakʼ oka bondobos hoylen ona lekage dosar hilokʼ setakʼ jokhecʼ Jonathan do ṭạnḍireye odok calaoena. Ar uni sãote mitʼṭen huḍiń koṛa hõe tahẽkana.

³⁶ Uni do koṛae metadea, “Iń okaṭakʼ sar iń teraṅ am do ńir senkate ona sendra ạguiyme.” Ado tinre uni koṛae ńir senokʼkan tahẽkana unre uni laha secʼ sare teraṅkeda.

³⁷ Jonathanakʼ sar okare ńuren onḍe uni koṛae senen khan uni hohoadeteye metadea, “Sar do am hana aṛe secʼre menakʼa.”

³⁸ Ona tayom uni do ãṭ aṛaṅteye menkeda, “Usạra ńir calakʼme, alom thirokʼa.” Ar koṛa do sar halaṅkate acʼren kisạ̃ṛ ṭhene ruạṛ hecʼena.

³⁹ Uni koṛa do niạko reaṅ cetʼge bae bujhạuleda, ona do eken Jonathan ar Dạudkin bujhạukeda.

⁴⁰ Inạ tayom Jonathan do acʼakʼ akʼ-sar do koṛae emadeteye metadea, “Am do niạkowante nagrahate ruạṛ calakʼme.”

⁴¹ Uni koṛae calaoen khan Dạud do ona ḍạṅ akatʼ dhiri reakʼ dạkhin secʼ khone rakapʼ hecʼena. Uni do Jonathan samaṅre otreye ombakʼente pe dhaoe ḍobokʼadea. Ona tayom unkin dokin cokʼana ar rarakʼkin ehopʼena, tobe Dạud do ḍhergeye rakʼkeda.

⁴² Jonathan do Dạude metadea, “Aben do nirạite calakʼben, ente alaṅ do Probhu Isor ńutumte kiriạkate laṅ men akada, ‘Aben ar ạliń talare ar aben ar ạlińren bõsko talare jaejugren goha do Probhu Isorgeye tahẽyena.’ ” Inạ tayom Dạud do bidại hataokeda ar Jonathan do nagrahateye ruạṛ calaoena.