1 Samuel 2 - সান্তালী বাইবেল

Hannawakʼ koejoṅ

¹ Ona tayom Hanna do koejoṅateye menkeda, “Probhu Isor iạtegeń rạskạkʼ kana; Probhu Isorge ińe jitạu oco akadińạ. Ińren bạiri samaṅrege iń do khulạsate rạskạ sereńiń sereńetʼ kana; ente ińren bạiriyakʼ ti khonem bańcao kedeńte iń do ạḍiń rạskạkʼ kana.

² Probhu Isor leka sonoticʼ do okoe hõ bạnugicʼan, ente am chaḍa ar cele Isorge bạnukʼkoa; aboren Isor leka asrae buru do ar cetʼge bạnukʼa.

³ Ape do ạḍại bạḍại katha alope roṛa, ar bạḍại reakʼ katha do moca khon alope oḍoka; ente Probhu Isor doe nonkanicʼ Isor kana okoe do jotowakʼe baḍaekan, unige kạmi reakʼe tulạyetʼ kana.

⁴ Daṛeankoakʼ akʼ do rạputʼ akana, menkhan bhindạṛ akanko do daṛeanteko beretʼena.

⁵ Okoekoakʼ lacʼ bige tahẽkan onko do ńitokʼ jomakʼ lạgitʼ eṭakʼkoakʼko kạmikana; menkhan okoe reṅgecʼko tahẽkan onko do reṅgecʼ cabayentakoa. Ar bạńjhiye tahẽkanicʼ do eae goṭen hoponren eṅgate hoyakana, menkhan ḍher hopon menakʼkotayicʼ doe nijor akana, uni do gidrạ bae janam daṛeako kana.

⁶ Probhu Isorgeye gogocʼa ar Probhu Isorgeye jiwetʼa; unige patal purireye khadlewa ar unige onḍe khone owar rakapʼa.

⁷ Probhu Isorge manwa doe kisạ̃ṛ are reṅgecʼ ocoyea; ente uni kangeae cokʼpotʼicʼ ar uni kangea usul ocoyicʼ.

⁸ Uni do dhuṛi khon nacaricʼe rakapʼedea, ar okulạnicʼ do torocʼ khone beretʼedea. Cetan hudạren hoṛko sãote uni do onkoe duṛupʼ ocokoa, ar manot reakʼ siṅghạsone emakoa; ente dhạrti reakʼ kham khunṭiko do Probhu Isorakʼge, uni do onako cetanre pirthimiye dohoakada.

⁹ Uni do acʼ bhuktiyae kanko jaṅga do bae tohotʼ ocokoa, ar bedhorom hoṛ do ńutreko ḍahao maraokʼa; ente okoe manwa hõ apnarakʼ daṛete do bae jitạu daṛeakʼa.

¹⁰ Probhu Isorren bạiriko doko chaka chunokʼa, uni do sermare onko upạrteye huḍura; ar dhạrti reakʼ mucạtʼ hạbicʼ uni do hoṛkoe bicạrkoa. Uni do acʼren raje daṛe ocoyea ar acʼren ojokʼ bahalicʼ hoṛ doe jitạu ocoyea.”

¹¹ Inạ tayom Elkana do Ramate acʼakʼ oṛakʼteye ruạṛ calaoena, menkhan Samuel do naeke Eli ṭhen tahẽkate Probhu Isore sewawae kan tahẽkana.

Eliren bedhorom hoponkin

¹² Eliren hopon do dusṭạmi hoṛkin tahẽkana. Unkin do Probhu Isorakʼ jãhãnakʼge bạkin moneyakʼkan tahẽkana.

¹³ Unkin do hoṛko sãote nonkakin beoharetʼ tahẽkana: jãhãe hoṛren samaṅokʼakʼren janwarakʼ jel tinre tekekʼa unre naekeren guti do pea jaṅgawakʼ mitʼṭecʼ lạṭu kaṭa kạ̃ṛchue ạguiyetʼ tahẽkana.

¹⁴ Onate uni do celaṅ se karahe se gamlareye gutuyetʼ tahẽkana ar ona kạ̃ṛchure tinạkʼ jel rakabokʼkan tahẽkan naeke do ona jotoge acʼ lạgitʼe idiyetʼ tahẽkana. Ar Israelren tinạkʼ hoṛ Siloteko hijukʼkan tahẽkan unkin do onko sanamko tulucʼ nonkage kin beoharetʼ tahẽkana.

¹⁵ Ona chaḍa, itil do seṅgelre ạuri atar giḍikakʼrege naekeren guti do janware samaṅ akade hoṛe metaekan tahẽkana, “Seṅgelre atar lạgitʼ naeke jel emaeme. Ente uni do am ṭhen khon tekeakʼ jel do baṅ, menkhan berelakʼ jelgeye hataoa.”

¹⁶ Unre uni hoṛe men, “Pạhilre itil atar maṛaṅme, ar ona tayom do amakʼ kusi leka jel idime,” Enḍekhan uni hoṛe metaea, “Ńitge emokʼ hoyokʼtama; ar baṅ khan jorkateń idiya.”

¹⁷ Probhu Isorakʼ mẽtʼre juạn naekekinakʼ kại do ạḍi bạṛicʼ ńelena, ente unkin do Probhu Isor ńutumte samaṅokʼakʼ jiniskokin nindạuetʼ tahẽkana.

¹⁸ Menkhan huḍiń gidrạ Samuel do mĩhĩ musnạ sutạm reakʼ ephod horokʼkate Probhu Isore sapʼsorae kan tahẽkana.

¹⁹ Hanna do jao bochor jãwãetetʼ tulucʼ janwar samaṅokʼakʼ lạgitʼe calakʼre Samuel lạgitʼ mitʼṭecʼ huḍiń aṅgrop benaokateye idiyetʼ tahẽkana.

²⁰ Ar Eli do Elkana ar uniren bạhuttetʼe bhorakin jokhecʼe menetʼ tahẽkana, “Nui maejiu Probhu Isor ṭhen okoeṭakʼ hopone dan akade uni bodolte Probhu Isor do uniyakʼ kukhire arhõ gidrại emaea.” Ar inạ tayom onko do akoakʼ oṛakʼteko ruạṛ calakʼkan tahẽkana.

²¹ Probhu Isor do Hanna sạrigeye dayawadea. Onate Hanna doe bhạrti hoṛmoyena ar uniren do jotote pea hopon ar barea kuṛikin hoyentaea. Ar huḍiń Samuel do Probhu Isor ṭhen tahẽkate hara idikʼe ehopʼena.

²² Eli do unre ạḍiye haṛam akan tahẽkana. Ar Israelko tulucʼ acʼren hoponkinakʼ beohar reakʼ katha ar okoeko maejiu do sapʼsosor kạmi lạgitʼ ńapamokʼ tạmbu reakʼ duạr ṭhenko hijukʼkan tahẽkan onko tulucʼ loṭghuṭi reakʼ katha hõ uniyakʼ luturre hecʼena.

²³ Uni do unkine metatʼkinạ, “Aben do cetʼben ceka kana? Abenakʼ bạṛicʼ kạmi reakʼ katha do noko hoṛko lại akadińa.

²⁴ E bạbu, Probhu Isorren hoṛko oka kathako roroṛkaniń ańjometʼko ona do baṅ bhagea.

²⁵ Manwa do manwa upạrteye kại khan Isor do onae miṭmaṭ daṛeakʼa; menkhan Probhu Isor upạrte manwae kại enḍekhan uni lạgitʼ do okoeye nehõr daṛekokʼa?” Menkhan unkin do apatakʼ katha bạkin luturada, ente Probhu Isor do unkin gocʼkin reakʼe goṭa akatʼ tahẽkana.

²⁶ Ar huḍiń koṛa Samuel do sẽṛã idikʼtegeye tahẽyena ar Probhu Isor hõ manwako ṭhen khon dulạṛ ńame ehopʼena.

Eli bõsren hoṛkoakʼ sạjại

²⁷ Mitʼdin Isorren mitʼṭen hoṛ do Eli ṭhen hecʼkateye menkeda, “Probhu Isore meneda, ‘amren hapṛamko tinre Misorre pharao gobolreko tahẽkana unre onko ṭhen iń do cetʼ pusṭạute bạń sodorlena?

²⁸ Israelkoren sanam gusṭiko mod khon iń do cetʼ Liwikoge bạń bachao akawana, onate onko do ińren naeke hoekate ińakʼ pinḍ ṭhen hecʼkate dhupko jered ar ephod horokʼkate iń samaṅreko hecʼdaṛeakʼ? Israelkoren sanam jeredokʼ samaṅokʼ reakʼ bhag do cetʼ onko ar onkoren bõskoge bạń emakatʼkoa?

²⁹ Enḍekhan ińakʼ oṛakʼre okako samaṅokʼ reakʼ hukumiń emakatʼ ape do cedakʼ ona janwar dãṛẽ ar eṭakʼ samaṅokʼakʼkope bemanoteda? Ińren hoṛ Israelkoakʼ samaṅokʼakʼko reakʼ joto khon bhageakʼ hạṭińte apnartetʼko jom tirpitokʼkante cedakʼ am do iń khon hõ amren hoponkin bạ̃ṛtim manotetʼkinạ?’

³⁰ “Ona iạte Israelkoren Probhu Isore meneda, ‘iń doń khạṭigeń menleda, am ar amren hapṛamakʼ bõsren hoṛ do jaejug iń sewawạń reakʼko kạmiya;’ menkhan ńitokʼ Probhu Isore meneda, ‘ona do ar baṅ hoyokʼa. Okoe ińko manotiń iń hõ onkogeń manotkoa ar okoe ińko nisṛạuiń onko do ako hõko nisṛạu ocokʼa.

³¹ Ńelme, okte hijukʼ kana tinre amren bõsko ar amren hapṛamkoakʼ bõsren hoṛkoakʼ daṛe nonkań maraotakoa, amren bõsko do mitʼṭen hõ haṛam umer hạbicʼ bako bańcaokʼa.

³² Am do ińakʼ oṛakʼ reakʼ durdosam ńela. Israelkoakʼ jãhãtinạkʼgeń bhạlạitako am bõsren okoehõ haṛam umer hạbicʼ jiwetʼ do bako tahena.

³³ Enhõ am bõsren sanamko do ińakʼ pinḍ khon bạń chaṭao cabakoa jemon onko iạte hiḍir hiḍir mẽtʼdakʼ jorokʼte amakʼ ńeńel reakʼ daṛe cabakʼtam ar ontorre dukem ńam; ar am bõsren jotokoge juạn umerregeko gujukʼa.

³⁴ “ ‘Amren banar hopon Hopni ar Pinehas do mitʼ dintege kin gujukʼa, ar onage hoyokʼa am lạgitʼ mitʼṭecʼ cinhạ.

³⁵ Menkhan iń do iń lạgitʼ mitʼṭen pạtiạricʼ naekeń teṅgo joṅa, one uni do ińakʼ mone bujhạute ińakʼ sana lekae kạmi. Iń do uniyakʼ bõskoń ṭarhao dohoya ar uni do jaoge ińren bachao hoṛkoe sapʼ sorakoa.

³⁶ Ar am bõsren okoeko jiwetʼko tahen onko do mitʼṭecʼ rupạ ar mitʼṭecʼ piṭhạ lạgitʼ uni ṭhen hecʼkate otre ombakʼkateko sewawaea ar mitʼṭen naeke hudạ ńam lạgitʼko nehõrokʼa jemon thoṛa jomakʼe ńam.’ ”