1 Samuel 19 - সান্তালী বাইবেল

Dạud goje reakʼ kurumuṭu

¹ Sạul do acʼren hopon Jonathan ar acʼren sanam kạmiyạkoe metatʼkoa jemon onko do Dạudko goje. Menkhan Sạulren hopon Jonathan do Dạud ạḍiye dulạṛede tahẽkana.

² Uni do Dạude metadea, “Ạpuń do aben gocʼben reakʼe kurumuṭuyeda. Onate gapa setakʼ do sontorte tahen ben. Ar mitʼṭecʼ danaṅ jaegare senkate okokokʼ ben.

³ Ar oka ṭạnḍire oko akan ben tahen onḍe do ạlińren baba sãoteliń senokʼa. Ar abenakʼ katha liń lạiyaea ar okae men onage liń baḍae ocobena.”

⁴ Jonathan do acʼren apat Sạul ṭhen Dạude sarhaokedea, are menkeda, “E maharaj, amren golam Dạud upạrte jãhãnakʼ do alogem cekaea. Am upạrte uni ma jãhãnakʼ bacoṅe kại akatʼ, bickom uni okae ceka akatʼ onate ḍhergem upkạr akana.

⁵ Uni do acʼakʼ jiwi cuputʼkate uni Philisṭi hoṛe gocʼkedea, ar Probhu Isor do goṭa Israel lạgitʼ maraṅ bańcaoe hoeocokeda; ar ona ńelte am dom kusilena. Enḍekhan ńitokʼ do cedakʼ ạuṛiyakʼte Dạud gojete mitʼṭen bindusi hoṛakʼ mãyãm joro ocoyte uni upạrtem kạiya.”

⁶ Unre Sạul do Jonathanakʼ katha ańjomkate kiriạyenteye menkeda, “Jiwetʼ Probhu Isor ńutumte kiriạkateń meneda uni do bae gocʼ ocokʼa.”

⁷ Tayomte Jonathan do Dạude hohowadea ar uniyakʼ sanam kathae lạiyadea. Uni do Sạul ṭhene idikedea ar Dạud do lahate lekage Sạul ṭhene tahẽyena.

⁸ Tayomte arhõ lạṛhại tinre ehopʼena unre Dạud do oḍok senkate Philisṭiko sãoteye lạṛhạiyena. Uni do onkoren ạḍi utạr hoṛe gocʼketʼkoa, ar onko do uni samaṅ khonko dạṛkeda.

⁹ Ar Probhu Isor ṭhen khon mitʼṭen bạṛicʼ jiu do Sạul cetanre hecʼkateye decʼena. Unre Sạul do acʼakʼ oṛakʼreye duṛupʼ akan tahẽkana ar uniyakʼ tire do mitʼṭecʼ borlom tahẽkana, ar Dạud do peṛesaṅe banametʼ tahẽkana.

¹⁰ Unre uni do borlomte Dạud bhitre sobokʼ jalade reakʼe kurumuṭukeda, menkhan Dạud do uni samaṅ khone ocokʼente borlom do bhitre bitʼena. Ar enhilokʼ ńindạ Dạud doe dạṛketʼte rukhiyại ńamkeda.

¹¹ Dạud cetanre nońjor dohoy lạgitʼ Sạul do uniyakʼ oṛakʼte hoṛe kolketʼkoa jemon dosar hilokʼ setakʼre uniye gocʼ daṛeae. Menkhan Dạudren bạhu Mikal do jotowakʼe baḍae ocokedeteye metadea, “Teheń ńindạ bam dạṛ enḍekhan gapage am dom gocʼ ocokʼa.”

¹² Onate Mikal do jalna secʼte latarte Dạude pheḍ gotʼkadea ar uni doe dạṛ bańcaoena.

¹³ Unre Mikal do gharońjren boṅga muṭhạnko hataokate aṭetʼreye dohoketʼkoa ar aṭetʼ reakʼ bohokʼ secʼ do merom upʼ reakʼ mitʼṭecʼ bạlise dohokeda; ar ona tayom do kicricʼte onakoe poṭomkeda.

¹⁴ Ar Sạul do Dạud sabe lạgitʼ hoṛe kolketʼko khan Mikale menkeda, “Uni doe ruạkʼ kana.”

¹⁵ Noa khobor ańjomkate Sạul do Dạud ńel ạguiye lạgitʼ onkoge arhõe kol dohṛaketʼkoteye metatʼkoa, “Aṭetʼ sudhạ Dạudpe kuṭuṅ ạguiyea; ar iń do uniń gojea.”

¹⁶ Onko hoṛ do oṛakʼte bolokate aṭetʼakʼ cetanre onko boṅga muṭhạnko ar bohokʼ secʼre merom upʼ reakʼ bạlisko ńelkeda.

¹⁷ Unre Sạul do Mikale metadea, “Cedakʼ nonka dom ṭhokakedińa? Ińren bạirim aṛakʼkedete uni doe dạṛkeda.” Mikal doe menkeda, “Uni doe metadińạ, ‘sen ocoạńme, ar baṅkhan iń khũnmea.’ ”

¹⁸ Ar Dạud doe dạṛketʼte jiwiye bańcaoketʼtaea. Uni do Ramare Sạmuel ṭhene senena ar acʼ upạrte Sạul okakoe ceka akatʼ ona jotowakʼe baḍae ocokedea. Ona tayom Dạud ar Sạmuel do Nayot burure senkate girobasokʼ kin ehopʼena.

¹⁹ Sạul do khobore ńamkeda, Dạud do Rama reakʼ Nayotre menaea.

²⁰ Niạ katha ańjomkate uni do Dạud sapʼ ạguiye lạgitʼ hoṛkoe kolketʼkoa. Onko hoṛ do senkateko ńelkeda mitʼ dol nạbi do Sạmuel tabere tahẽkate Isorakʼ kathako lạlạikana. Unre Sạulren hoṛko cetanre hõ Isorren jiue hecʼena ar onko hõ nạbi lekate Isorakʼ katha lạlạiko ehopʼen.

²¹ Sạul do ona kathako baḍae ocokede khan arhõ hoṛe kolketʼkoa menkhan onko hõ senkate nạbi lekate Isorakʼ katha roroṛko ehopʼena. Khan Sạul do tesar dhao arhõ hoṛe kolketʼkoa ar onko hõ nạbi lekate katha roroṛko ehopʼena.

²² Mucạtʼre Sạul do acʼtetʼge Ramateye senena ar Sekure menakʼ maraṅ kuń ṭhen senkateye kuliyana, “Samuel ar Dạud do okare menakʼkinạ?” Mitʼ hoṛ doe menkeda, “Rama reakʼ Nayotre menakʼkinạ.”

²³ Onate Sạul do Rama reakʼ Nayot secʼe mohnḍayena. Menkhan Isorren jiu do uni cetanreye hecʼena. Ar uni do goṭa hor nạbi lekate Isorakʼ katha lại lạite Nayotteye seṭerena.

²⁴ Uni do acʼakʼ kicricʼe totʼketʼte Samuel samaṅre nạbi lekate Isorakʼ katha roroṛe ehopʼena. Uni do goṭa siń ar goṭa ńindạ kicricʼ chaḍageye tahẽyena. Ona iạte hoṛko mena, “Sạul hõ cetʼ enḍekhan nạbiko modren mitʼhoṛ kanae?”