1 Samuel 18 - সান্তালী বাইবেল

Sạul do Dạude hiskạwaekan

¹ Sạul tulucʼ Dạudakʼ galmaro mucạtʼen khan Jonathanakʼ jiwi do Dạudakʼ jiwi tulucʼ tolentaea. Onate Jonathan do acʼakʼ jiwi leka Dạude dulạṛkedea.

² Ar enhilokʼ khon Sạul do Dạud acʼ ṭhene dohokedea; uniren apat ṭhen do ar bae sen ruạṛ ocowadea.

³ Jonathan do acʼakʼ jiwi leka Dạude dulạṛkedete uni tulucʼ mitʼṭecʼe bondoboskeda.

⁴ Uni do acʼakʼ aṅgrop bocʼkate Dạude horokʼadea, ar acʼakʼ lạṛhại reakʼ sapapʼakʼ, acʼakʼ tarwaṛe, acʼak akʼ-sar ar ḍanḍa paṭhekʼakʼ hõe emadea.

⁵ Ar Sạul do Dạud jãhãtegeye kolkaekan tahẽkan onḍegeye calakʼkan tahẽkana ar bud salakʼe kạmi purạuetʼ tahẽkana. Ona iạte Dạud do lạṛhạiko cetanreye dohokedea. Onate sanam hoṛ do unireko kusiyena ar onko sãote Sạulren kạmiyạko hõ.

⁶ Dạud do uni Philisṭi Goliạte gocʼkede tayom tinre hoṛko oṛakʼteko ruạṛ hijukʼkan tahẽkana unre Israelkoakʼ sanam nagrahako khon maejiuko do enecʼate, tabla ru rute ar peṛesaṅ banam banamate Sạul darame lạgitʼko oḍok hecʼena.

⁷ Onko do enecʼ enecʼte niạko sereńkeda, “Sạul doe gocʼketʼkoa hajarke hajar, Dạud doe gocʼketʼkoa ojute ojut.”

⁸ Niạ sereń ańjomkate Sạul do ạḍiye edreyena. Uni do bekusiteye menkeda, “Dạud reaṅ onko do ojute ojutko meneda menkhan iń reaṅ do hajarke hajar. Niạ tayom Dạud do rajosṭi ńam chaḍa ar cetʼ sarecʼ tahẽyentaea?”

⁹ Ar inạ tayom khon Sạul do Dạud hiskạwaeye ehopʼena.

¹⁰ Dosar hilokʼ Isor ṭhen khon mitʼṭen bạṛicʼ jiu do hecʼkate Sạul cetanreye jãpaṛena. Onate uni do acʼakʼ oṛakʼre bhitrireye chaṭ paṭao baṛaekan tahẽkana. Ar Dạud do eṭakʼ dinko leka uni samaṅre peṛesaṅ baname ehopʼena. Unre Sạulakʼ tire mitʼṭecʼ borlom tahẽkana.

¹¹ Uni do mone moneteye menkeda, “Dạud do bhitreń sobokʼ jaladea.” Ar niạ menkate borlome sohoradea, menkhan Dạud do bar dom uni samaṅ khone aḍena.

¹² Sạul do Dạud botoraeye ehopʼena, ente Probhu Isor do Dạud sãoteye tahẽkana menkhan Sạul khon doe sahaṛ akan tahẽkana.

¹³ Ona iạte Sạul do acʼ ṭhen khon Dạude pharakkedea ar hajarko cetanre subedare bahalkedea. Onate Dạud do lạṛhại phạdkoren mukhiyại hoyena ar disạm hoṛko samaṅreye oḍok bolokʼkan tahẽkana.

¹⁴ Probhu Isor do uni sãoteye tahẽkante jotowakʼrege bud salakʼ kạmikateye jo bahakʼkan tahẽkana.

¹⁵ Ar Dạud do sanamakʼ kạmiregeye jo bahakʼ kana menteye ńelketʼ khan Sạul do uni botoraye ehopʼena.

¹⁶ Menkhan Israel ar Jihudạren sanam hoṛ do Dạudko dulạṛede tahẽkana, ente lạṛhại phạdkoren mukhiyại hoyente disạm hoṛko talareye bolo oḍokokʼkan tahẽkana.

¹⁷ Mitʼdin Sạul do Dạude metadea, “Ińren maraṅicʼ hoponera Merab do am sãoteń baplakaea. Onate am do eken iń secʼ khon birbanṭa leka Probhu Isor lạgitʼ lạṛhạime.” Sạul do Dạud cetanre acʼakʼ ti rakabtae bae menetʼ tahẽkanre hõ Philisṭikoakʼ tite uni gocʼ ocoye do moneteye khojgokʼkan tahẽkangea.

¹⁸ Dạud do Sạule metadea, “Iń baṅ iń celekan ar ińakʼ ghãrońj ar Israelko talare ińren ạpuńakʼ bõs baṅ cetʼkan, onate rajren jãwãe gomkeńiń hoedaṛekokʼ?”

¹⁹ Dạud sãote Sạulren hoponera Merabakʼ bapla reakʼ okte seṭeren khan ńelena Merabakʼ bapla do Dạud badkate Mehola atoren Adriyel sãote hoyentaea.

²⁰ Menkhan Dạud do Sạulren armitʼṭen hoponera Mikale dulạṛede tahẽkana. Hoṛko do ona katha tinre Sạulko baḍae ocokedea unre Sạul doe kusiyena.

²¹ Uni do mone moneteye menkeda, “Dạud do ińren hoponerań emaea jemon hoponerań do uniren jhampa lekae hoyokʼ ar Philisṭikoakʼ ti uni upạrte paṛaokʼ.” Niạ hudiskate Sạul do Dạude metadea, “Ińren jãwãe goṅkeńem hoyokʼ reakʼ do niạge amakʼ dosar ạt kana.”

²² Sạul do acʼren kạmiyạko noae hukumatʼkoa, “Dạud hape hapete galmaraoepe, ‘raj do am cetanre ạḍiye kusiakana, ar uniren sanam kạmiyạko hõ amko kusiyam kana. Onate rajren jãwãe goṅke do amge hoyokʼme.’ ”

²³ Onko do noa katha Dạudko baḍae ocokede khan uni doe menkeda, “Rajren jãwãe gomkeń hoyokʼ do cetʼ ạḍi algagepe bujhạueda? Iń doń reṅgecʼ hoṛ kana, mitʼṭen sadharon hoṛ kạnạń.”

²⁴ Dạud okae menketʼ kạmiyạko do senkate Sạul onako lạiyadea.

²⁵ Unre Sạule metatʼkoa, “Dạud metaepe, raj do jãhãnakʼ gonoṅ hõ bae hataoa, eken bạiriko cetanre halae lạgitʼ mitʼsae Philisṭikoakʼ khatnakʼakʼge.” Nonkate Philisṭikoakʼ tite jemon Dạude marao utạrokʼ, noage Sạulakʼ monsubạ do tahẽkana.

^26-27 Kạmiyạko do ona katha Dạudko baḍae ocokede khan Dạud doe kusiyena ar rajren jãwãe gomke hoyokʼ lạgitʼe rebenena. Ar noa lạgitʼ oka okteko niṭade tahẽkan ona ạuri seṭerokʼrege Dạud ar uniren hoṛ do senkate barsae Philisṭiko gocʼketʼkoa. Ar Dạud do rajren jãwãe goṅke hoyokʼ lạgitʼ onko Philisṭikoakʼ khatnakʼakʼe ạgukeda ar Sạule emadea. Unre Sạul do Dạud sãote acʼren hoponera Mikale baplakadea.

²⁸ Sạul do unreye bujhạu daṛekeda, Probhu Isor do Dạud sãote menaea ar acʼren hoponera Mikal hõ Dạude dulạṛ edekana,

²⁹ unre Dạud cetanre botor do arhõ ḍherentaea. Ar ạuriye gujukʼ hạbicʼ Dạud do uniren bạiriye hoyena.

³⁰ Inạ tayom Philisṭikoren subedarko do lạṛhại lạgitʼ oḍok hijukʼko ehopʼena. Ar tinạkʼ dhaoko oḍok hecʼen unạkʼ dhaoge Sạulren kạmiyạko khon Dạud do bud salakʼe kạmiketʼteye jo bahayena. Ar nonkate uniyakʼ ńutum do manot idiyena.