1 Samuel 17 - সান্তালী বাইবেল

Dạud ar Guliạt bir

¹ Philisṭiko do lạṛhại lạgitʼ phạdkoko jarwaketʼkote Jihudạ gusṭirenkoakʼ Sokoteko senena. Onko do onḍe senkate Soko ar Aseka tala reakʼ Ephesdamin atoreko ḍerayena.

² Sạul ar Israelko hõ jarwakate Ela lodamreko ḍerayena ar Philisṭi sãote lạṛhại lạgitʼ phạdkoko sapṛaoketʼkoa.

³ Unre Philisṭiko do mitʼ secʼ reakʼ burure ar Israelko do eṭakʼ secʼ reakʼ burureko teṅgoyena. Ona talare do Ela buru nala tahẽkana.

⁴ Philisṭiren Guliạt ńutuman mitʼṭen birbanṭa hoṛ do onkoakʼ lạṛhại phạd khone oḍok hecʼena. Uni do Gat nagraharen hoṛe tahẽkana. Uni do usulte turui moka talae tahẽkana.

⁵ Uniyakʼ bohokʼre do pitạl reakʼ tupri tahẽkana ar hoṛmore do hako cuạ̃kʼ leka pitạl reakʼ aṅgrop tahẽkantaea, ona reakʼ ojon do turuigel keji tahẽkana.

⁶ Uni do gunṭhi khon iḍi hạbicʼ pitạlte esetʼ tahẽkantaea, ar tarenre do pitạl reakʼ tarwaṛe tahẽkana.

⁷ Uniyakʼ borlom ṭheṅga do kicricʼ teteńkoakʼ turleka tahẽkana ar ona coelo mẽṛhẽtʼ reakʼ hamal do eae keji barsae tahẽkana. Ar uniyakʼ ḍhal asenicʼ do uni laha lahateye calakʼkan tahẽkana.

⁸ Ar Goliạt do teṅgokate ãṭ aṛaṅte Israelkoren lạṛhại phạdkoe metatʼkoa, “Lạṛhại lạgitʼ phạdko do cedakʼpe sajao akatʼkoa? Iń do mitʼṭen Philisṭi hoṛ kạnạń ar ape ma eken Sạulren gutikanpe. Ape modkhon mitʼ hoṛ bachaoepe; ar uni do iń ṭhene pheḍ hijukʼma.

⁹ Ar iń tulucʼ lạṛhạikate ińe gocʼ daṛeạń khan ale do aperen golamle hoyokʼa; menkhan bae gocʼ daṛeạń enḍekhan ape do aleren golamkope hoyokʼa ar aleakʼpe kạmiya.”

¹⁰ Uni Philisṭi hoṛ do arhõe menkeda, “Iń do teheń Israelkoren lạṛhại phạdko ṭiṭkạrikateń metape kana, iń sãote lạṛhại lạgitʼ mitʼṭen hoṛ emokʼpe.”

¹¹ Uniyakʼ noako katha ańjomkate Sạul ar eṭakʼ Israelko do ạḍi botor caṛhaoatʼkoa.

¹² Dạudren apattetʼ Jisại do Jihudạ ṭoṭha reakʼ Ephrath, metakʼme Bethlehem atoreye girobasokʼkan tahẽkana. Uniren do irạl goṭen koṛako tahẽkantaea. Ar Sạul rajokʼ oktere uni doe haṛam akan tahẽkana.

¹³ Jisạiren hoponko modre pạhilko pene hoṛ do Sạul sãore tahẽkate lạṛhại lạgitʼko calaolena. Ar okoeko lạṛhại lạgitʼko senlen onko modren maraṅicʼakʼ ńutum do Eliab, dosaricʼ do Abinadab ar tesaricʼakʼ ńutum do Sama.

¹⁴ Uniren hoponko modre Dạud do jotoko khon huḍiń utạricʼe tahẽkana. Ar pạhilko pene hoṛ do Sạul sãoteko senlena,

¹⁵ menkhan Dạud do Sạul ṭhene tahẽkana, ar apattetʼren bhiḍiko ạtińko lạgitʼ hõ Bethlehemteye calakʼkan tahẽkana.

¹⁶ Onko Philisṭiko do pongel din hạbicʼ dinạm hilokʼ siń cando rakabokʼ ar hạsurokʼ jokhecʼ oḍok hecʼkateko ńel ocokʼkan tahẽkana.

¹⁷ Mitʼ din Jisại do acʼren hopon Dạude metadea, “Dadamteko lạgitʼ niạ gel irạl keji ata anaj ar niạ gel goṭen piṭhạ usạrate lạṛhại phạd reakʼ ḍerate idime,

¹⁸ ar niạ gel goṭecʼ ceṛa chale do hajar cetankoren subedarko lạgitʼ idime. Ar amren dadamteko cetʼleka menakʼkoa ona ńel ạguiyme ar onko ṭhen khon jãhãnakʼ cinhạ ạgu daraeme.

¹⁹ Sạul ar amren dadamteko ar sanam Israelkoren lạṛhại phạdko do Ela otetre menakʼkoa ar Philisṭiko sãoteko lạṛhại kana.”

²⁰ Dạud do ạḍi setakʼre beretʼkate mitʼṭen gupiyicʼ ṭhen acʼren bhiḍiko reakʼ bhare emadea. Ona tayom Jisạiakʼ hukum leka joto jinisko hataokateye mohnḍayena. Uni do tinre ḍera ṭhene seṭerena unre Israelren lạṛhại phạdko do rạgạu hohoate sạr sạrteko oḍok hijukʼkan tahẽkana.

²¹ Israelko ar Philisṭiko do lạṛhại lạgitʼ samna sạmni akoren lạṛhại phạdkoko sapṛaoketʼkoa.

²² Unre Dạud do acʼakʼ jinisko horhoicʼ ṭhen doho oṭokate lạṛhại phạdko talareye ńir boloyente dadatetʼtako boge judại kuli baṛeketʼkoa.

²³ Uni do tinre dadattetʼtako sãote kathae roroṛkan tahẽkana unre Gat nagraharen uni Philisṭi bir banṭa Guliạt do acʼren lạṛhại phạdko khon oḍok hecʼkate lahate lekage katha roroṛe ehopʼena, ar Dạud do uniye ńelkedea.

²⁴ Ar Israelren lạṛhại phạdko do uni hoṛ ńelte botorte uni samaṅ khonko ńir pharakena.

²⁵ Israelkoko roṛetʼ tahẽkana, “Uni hoṛ okoe do ghane ghạṛicʼe oḍok hijukʼkan, uni mape ńelekange? Uni do Israelkoe ṭiṭkạriyetʼkoa. Uni hoṛ jãhãegeye gocʼ daṛeae enḍekhan raj do uni hoṛ ạḍi utạr dhon-duribe emaea. Ar acʼren hoponera hõ uni sãoteye baplakaea ar Israel disạmre uniyakʼ gharońjrenko do khajna ar rajakʼ eṭakʼ jãhãnakʼ cetʼge emokʼ baṅ lagaoaea.”

²⁶ Okoeko hoṛ sorreko teṅgo akan tahẽkan Dạud do onkoe kuliketʼkoa, “Uni Philisṭi gocʼkate Israelko cetan khon niạ henostae ocokʼ lekhan uni do cetʼ cekawaea? Ar nui bin khanta akan Philisṭi doe cele kante jiwetʼ Isorren lạṛhại phạdkoe henostawako kana?”

²⁷ Onate hoṛ okako roṛetʼkan tahẽkan onkageko baḍae ocokedea, jãhãege uni Philisṭi hoṛe gocʼle khan uni do cetʼko cekawaea mente.

²⁸ Dạudren maraṅicʼ boeha Eliab do hoṛko sãote uniyakʼ galmaraoe ańjomketʼ khane raṅgaoena. Uni doe metadea, “Nonḍe do cedakʼem hecʼakana? Hahaṅkarre bhiḍiko do okoe jimạrem bạgi oṭoakawatʼkoa? Amakʼ bạḍại ar dusṭami reakʼ katha doń baḍaegea. Am do lạṛhại ńeńelgem hecʼakana?”

²⁹ Dạud doe menkeda, “Iń do cetʼ iń ceka akatʼte? Iń ma ekeniń kuliakawan.”

³⁰ Niạ menkate uni do eṭakʼ hoṛko ṭhen senkate inạ kathageye kuliketʼkoa ar hoṛko do lahate lekageko roṛ ruạṛadea.

³¹ Dạud okae menketʼ eṭakʼko do ona ańjomkate Sạulko baḍae ocokedea. Unre Sạul do uniye hohowadea.

³² Dạud do Sạule metadea, “Uni Philisṭi ńelte okoeyakʼ mon hõ alo andesalekʼma. Amren golam doe senokʼa ar uni sãoteye lạṛhạiya.”

³³ Sạule menkeda, “Am do uni Philisṭi sãote cekatem lạṛhạiya? Ente am dom chokragea, ar uni Philisṭi do chokra khonge mitʼṭen lạṛhại bir kanae.”

^34-35 Dạud do Sạule metadea, “Amren golam do acʼ apatren bhiḍikoe gupikoa. Unre jãhãn dhạcri kul se bana hecʼkate pal khon bhiḍiye ạtkirko tahẽkanre iń do ńir senkate dal gocʼkate uniyakʼ moca khon ińren bhiḍikoń rukhiyạyetʼko tahẽkana. Ar ińe teṅgo daramliń khan iń do uniyakʼ goco sapʼkateń humạkʼede tahẽkana ariń gojekan tahẽkana.

³⁶ Dhạcri kul ar banako do amren golamakʼ tite cetʼlekako gocʼ ocoakan, onkage nui bin khatna akan Philisṭi hoṛakʼ dosa hõ hoyokʼtaea, ente uni do jiwetʼ Isorren lạṛhại phạdkoe henosta akatʼkoa.”

³⁷ Dạud do arhõe menkeda, “Probhu Isor, okoe do dhạcri kul ar banako khone rukhiyạ akadiń, unige uni Philisṭi hoṛ khone rukhiyạyińạ.” Unre Sạul do Dạude metadea, “Enḍekhan do calakʼme, Probhu Isor do am sãoteye tahenma.”

³⁸ Noa menkate Sạul do acʼakʼ lạṛhại posak Dạude horokʼadea. Uni do bohokʼre pitạl reakʼ ṭupri ar hoṛmore do mẽṛhẽtʼ aṅgrope horokʼadea.

³⁹ Dạud do acʼakʼ lạṛhại sanaphana cetanre Sạulakʼ tarwaṛeye tolana ar taṛam reakʼe kurumuṭukeda, ente noa lahare tishõ uni do bae hewa akan tahẽkana. Uni do Sạule metadea, “Niạko horokʼkate do bạń sen daṛeakʼa, ente noa lahare tisge bạń horokʼakada. Ar noa menkate uni do onakoe totʼ giḍikada.

⁴⁰ Ona tayom uni do acʼakʼ ṭheṅgae hataokeda ar jharna soḍokʼ khon mõṛẽ goṭecʼ cĩkạ̃ṛ cĩkạ̃ṛ dhiriye bachaoante acʼakʼ gukʼpi jholareye dohokeda. Nonkan jhola do eken gukʼpigeko beoharetʼ tahẽkana. Ar ona tayom do acʼakʼ ginḍwạri sapʼkate uni Philisṭi hoṛ secʼe laha idiyena.

⁴¹ Uni Philisṭi hõ Dạud secʼ sor hijukʼe ehopʼena. Ar uniren ḍhal asenicʼ do uni samaṅ samaṅteye hijukʼkan tahẽkana.

⁴² Uni Philisṭi do Dạud secʼe beṅgetʼ rakapʼketʼ khan uniye chibaṅadea, ente Dạudakʼ umer do komge tahẽkantaea. Ar ńelokʼte uni do ruṅ ruṅ arakʼ ar mońjgeye tahẽkana.

⁴³ Goliạt do Dạude metadea, “Iń do cetʼ seta kạnạń onate ṭheṅgawante iń ṭhenem hijukʼkana?” Uni do acʼren debotako ńutumte Dạude sarapadea.

⁴⁴ Uni do Dạud arhõe metadea, “Dela hijukʼme; amakʼ hoṛmo reakʼ jel do coṭren uḍạukʼ cẽṛẽko ar bir janwarkoń jom ocokoa.”

⁴⁵ Unre Dạud do uni Philisṭiye metadea, “Am do tarwaṛe, borlom ar chorawante iń ṭhenem hijukʼkana, menkhan iń do phạdkoren Probhu Isor ńutumte am ṭheniń hijukʼ kana, one okoe dom henosta akawade.

⁴⁶ Teheńge Probhu Isor do ińakʼ tireye soprotmea. Ar iń do amiń bhindạṛmea ar bohokʼ iń makʼ kuṭrạitama. Ar teheńge Philisṭiren lạṛhại phạdkoakʼ mạ̃ṛĩ do coṭren cẽṛẽko ar otren janwarkoń jom ocokoa. Ona ńelte dhạrtiren sanamgeko baḍae daṛeakʼa, Israelkoren do mitʼṭen Isor menaetakoa.

⁴⁷ Ar tinạkʼ hoṛ nonḍe menakʼko onko hõko baḍae daṛeakʼa, tarwaṛe se borlomte Probhu Isor do bae bańcaoa, ente niạ lạṛhại do Probhu Isorakʼ kangea; ar uni do aleakʼ tireye jimạpea.”

⁴⁸ Uni Philisṭi hoṛ do tinre Dạud darame lạgitʼe laha hijukʼkan tahẽkana unre Dạud hõ uni ṭhen lạṛhại thạrko secʼe ńir laha idiyena,

⁴⁹ ar acʼakʼ jhola khon mitʼṭecʼ dhiriye hataoketʼte ginḍwạrireye dohokeda ar ghiriạ ghiriạte uni Philisṭi hoṛ do cạndireye capatʼkedea ar ona do uniyakʼ cạndire gạḍiạuena. Ar dhiriteye josen são sãote uni Philisṭi hoṛ do taberte otreye bhindạṛena.

^50-51 Unre Dạud do ńir senkate uni Philisṭi hoṛakʼ tarwaṛe bocʼkate uniye gocʼkedea ar uniyakʼ bohokʼe makʼ kuṭrạketʼtaea. Nonkate Dạud do eken ginḍwạri ar mitʼṭecʼ dhirite uni Philisṭiye bhagaokedea. Uniyakʼ tire jãhãn tarwaṛe baṅ tahẽkanre hõ uni do Philisṭi hoṛe ńẽtʼkedea are gocʼkedea. Philisṭiko tinreko ńelkeda akoren birbão hoṛe gocʼena unre onko do dạdạṛko ehopʼena.

⁵² Unre Israel ar Jihudạren hoṛ do ridgạu menteko hohokeda ar Philisṭiko Gat ar Ekron hạbicʼko laga idiketʼkoa. Onate Philisṭikoren ghạl akan hoṛ do Sarayim khon Gat ar Ekron hạbicʼko gocʼena.

⁵³ Ar Israelko do khudạu khonko ruạṛen tayom onkoakʼ ḍerako luṭketʼtakoa.

⁵⁴ Dạud do uni Philisṭi Goliạtakʼ bohokʼ Jerusalemteye idikeda, ar uniyakʼ khanḍa bhanḍa ar lạṛhại reakʼ sanaphana do acʼakʼ tạmbureye dohokada.

⁵⁵ Dạud do uni Philisṭi sãote lạṛhại lạgitʼ calakʼe ńelkede khan Sạul do acʼren subedar Abnere kulikedea, “Henda abner, nui doe okoeren hopon kana?” Abnere roṛ ruạṛkeda, “E moharaj, amakʼ jiwi jiwetʼ lekage, iń do ohoń lại daṛelea.”

⁵⁶ Unre raje menkeda, “Khoj hataome uni koṛa doe okoeren hopon kana.”

⁵⁷ Ona tayom Dạud do uni Philisṭi hoṛ gocʼkateye ruạṛ hecʼen khan Abner do Sạul ṭhene idikedea. Unre Goliạtakʼ bohokʼ do uniyakʼ tire tahẽkana.

⁵⁸ Sạul do uniye kulikedea, “E bạbu, am dom okoeren hopon kana?” Dạude menkeda, “Iń do Bethlehem atoren amren golam Jisạiren hopon kạnạń.”