1 Samuel 15 - সান্তালী বাইবেল

Probhu Isor do Sạul raje nihạ̃tedekan

¹ Sạmuel do Sạule metadea, “Probhu Isor do acʼren hoṛ Israelko cetanre raj hudạre bahale lạgitʼ ińe kolledińạ. Ńitokʼ do Probhu Isorakʼ kathare luturakʼme.

² Sanam daṛean Probhu Isore meneda, ‘Israelko tinre Misor khonko oḍokʼ hijukʼkan tahẽkana unre Amalekiko do onko upạrteko teṅgolente onko doń sạjạikoa.

³ Ńitokʼ am do senkate Amalekiko tulucʼ lạṛhạime ar onkoakʼ cetʼko menakʼ ona jotowakʼem marao giḍikatakoa; onko do alom dayawakoa. Onkoren herel ar maejiuko, koṛa ar-kuṛi gidrạko, toa ńuńukan gidrạko, ḍaṅgra-biḍhiko, ũṭko, gadhako jotom gocʼ cabakoa.’ ”

⁴ Unre Sạul do Telayim nagrahare hoṛkoe hoho jarwaketʼkoa. Onate Israelkoren lạṛhại phạdkoakʼ lekha do bar lakh ar Jihudạ gusṭiren lạṛhại phạdkoakʼ lekha do gel hajar hoyena.

⁵ Sạul do Amalekikoakʼ nagraha ṭhen senkate onḍe rohoṛ gaḍa ṭhene tãṛãkʼ tahẽyena.

⁶ Uni do Kenikoe metatʼkoa, “Israelko tinre Misor khonko oḍok hecʼlena unre ape do onkope dayawatʼko tahẽkana. Onate ape do Amalekiko tala khon eṭakʼ secʼ calao joṅpe, jemon Amalekiko sãote aloń marao giḍipe.” Unre Keniko do Amalekiko tala khonko oḍok calaoena.

⁷ Sạul do unre Hewila ṭoṭha khon Misor purub secʼ Sur hahaṅkar ṭoṭha hạbicʼ sanam Amalekikoe bhagaoketʼkoa.

⁸ Amalekikoren Og raj do jiwetʼteye sapʼkedea ar eṭakʼ sanam hoṛko doe marao cabaketʼkoa.

⁹ Menkhan Sạul ar uniren lạṛhại phạdko do Og jiwetʼko dohokedea ar Amalekikoren mońj mońj ḍaṅgrako, bheḍako, bạchurko ar bheḍa hoponko, metakʼme cetʼko bhageakʼ tahẽkan ona joto doko dohoana. Onako marao giḍikakʼ do bako rạjilena, menkhan okạjwạ ar rogako doko marao giḍikatʼkoa.

¹⁰ Unre Probhu Isor do niạ katha Sạmuel ṭhene sodorkeda,

¹¹ “Sạul do ińakʼ monduk reakʼe hoyakana, ente uni do iń ṭhen khone pharak akana ar ińakʼ hukume bebatao akada.” Niạ katha ańjomkate Sạmuel doe khĩsena ar goṭa ńindạ Probhu Isor ṭhene rakʼ aṅgakeda.

¹² Ar dosar hilokʼ ạḍi setakʼre beretʼkate Sạul sãote ńapamokʼ lạgitʼe senena. Uni do onḍeko lạiyadea, Sạul do Karmel burure acʼakʼ manotakʼ lạgitʼ onḍe mitʼṭecʼ pinḍ benaokate Gilgolteye senakana.

¹³ Unre Sạmuel do Sạul ṭhene senena. Khan Sạul do uniye metadea, “Probhu Isore bhoram ma. Iń do Probhu Isorakʼ hukumiń batao akada.”

¹⁴ Sạmuele menkeda, “Enḍekhan bheḍawakʼ rakʼ do ińakʼ luturre cekate hijukʼ kana? Ar gại-ḍaṅgrawakʼ bhokraokʼ hõ cekateń ańjometʼkana?”

¹⁵ Sạule roṛ ruạṛkeda, “Onko do Amalekiko ṭhen khonko ạguakana. Amren Probhu Isor ńutumte samaṅokʼ lạgitʼ iạtege lạṛhại phạdko do mońj mońj ḍaṅgra ar bheḍako dohoakatʼkoa; tobe sarecʼakʼ jotowakʼ dole marao giḍi akada.”

¹⁶ Sạmuel do unre Sạule metadea, “Thirkokʼme. Calaoen ńindạ Probhu Isor okaṭakʼe men akawạdiń onań lạiyama.” Sạule menkeda, “Ma lạiyạńme.”

¹⁷ Sạmuele menkeda, “Mitʼ din am do amakʼ nońjorre huḍińicʼem tahẽkana, menkhan enrehõ cetʼ Israelkoakʼ sanam gusṭikoren matha do bam hoyakana? Probhu Isorge Israel disạm cetanre raj lekateye ojokʼ bahalketʼmea.

¹⁸ Uni do mitʼṭecʼ kạmi lạgitʼe kolletʼmea are metatʼme tahẽkana, ‘am do senkate kạiyanko, metakʼme Amalekikom marao giḍikakoa. Onko ạuriko ḍahao maraokʼ hạbicʼ onko tulucʼem lạṛhạiya.’

¹⁹ Am do Probhu Isorakʼ hukum cedakʼ bam ańjomleda? Am do cedakʼ luṭakʼ jinisko cetanre jhãpem emkeda ar Probhu Isorakʼ mẽtʼre oka bạṛicʼakʼ kan onam kạmikeda?”

²⁰ Sạule menkeda, “Menkhan iń do Probhu Isorakʼ hukumiń batao akada. Oka kạmi lạgitʼ Probhu Isore kolledeń onageń kạmi akada. Iń do Amalekikoń marao utạr akatʼkoa ar onkoren raj Og doń sapʼ ạguakadea.

²¹ Ar ḍahao maraoakʼ jinisko khon lạṛhại phạdko do thoṛa mońj mońj ḍaṅgra ar bheḍako ạguakatʼkoa, jemon Gilgolre amren Probhu Isor ńutumte onkoko samaṅ daṛeako.”

²² Unre Sạmuele menkeda, “Probhu Isorakʼ hukumpe batao lekhan uni tinạkʼe kusikʼ, unạkʼ do jeredokʼakʼ samaṅokʼakʼ ar janwar samaṅokʼakʼte bae kusikʼa. Janwar samaṅokʼakʼ khon uniyakʼ hukum manao ar bheḍawakʼ itil khon uniyakʼ katha bataotaege ḍher bhagea.

²³ Huhul ar gunidari kạmi do inạ mitʼ lekan kạikangea; bebatao ar boṅga sewa hõ inạ lekan kại kangea. Am do Probhu Isorakʼ hukum bam batao akatʼte uni hõ am do raj lekateye nihạ̃t giḍi akatʼmea.”

²⁴ Unre Sạul do Sạmuele metadea, “Iń doń kại akada. Ar Probhu Isorakʼ hukum ar amakʼ kathako bạń manao akada. Hoṛko botorte iń do onkoakʼ katha lekageń kạmi akada.

²⁵ Ńitokʼ ińre dayakʼte ińakʼ kại baṛe ikạ kạtińme, ar iń sãote calakʼme jemon iń do Probhu Isoriń sewa daṛeae.”

²⁶ Menkhan Sạmuel do uniye metadea, “Am sãote do bạń calakʼa. Am do Probhu Isorakʼ hukumem bebatao akatʼte Probhu hõ Israelkoren raj lekateye nihạ̃t giḍi akatʼmea.”

²⁷ Niạ menkate Sạmuel do calakʼ lạgitʼe ạcuren khan Sạul do uniyakʼ kicricʼ ańcare sapʼketʼtaea; ar onate uniyakʼ kicricʼ do oṛecʼentaea.

²⁸ Unre Sạmuel do uniye metadea, “Probhu Isor do teheń am ṭhen khon Israelkoakʼ rajosṭi hõ nonkageye recʼ hataokeda ar am khon hõ bhage amakʼ disạmren mitʼ hoṛe emadea.

²⁹ Okoe doe Israelkoren ṭhonokicʼ kan uni do eṛe katha bae roṛa se mon hõ bae bodoltaea. Uni do manwa doe baṅ kana, onate mone bodoltaea mente.”

³⁰ Sạule menkeda, “Iń doń kại akada; enhõ ińakʼ nehõr do niạge, iń jạtren murubbiko ar Israelko samaṅre ińakʼ manot baṛe dohoytińme. Jemon iń do amren Probhu Isorriń sewa daṛeae onate iń sãote dela calakʼme.”

³¹ Onate Sạmuel do Sạul sãoteye senena ar Sạul do Probhu Isore sewawadea.

³² Tayomte Sạmuele menkeda, “Amalekikoren Og raj do iń ṭhen ạguiyepe. Niạ katha ańjomkate Og do ladacʼ luducʼ Samuel ṭhene hecʼena. Uni doe hudiskeda gujukʼ reakʼ haso ńitokʼ do ar bạnukʼa.

³³ Menkhan Sạmuele menkeda, “Amakʼ tarwaṛete ḍher maejiukoren hoponko gocʼ ocoakan onkage maejiuko talare eṅgamren hopon hõe adokʼtaea.” Ar niạ katha menkate Sạmuel do Gilgolre Probhu Isor samaṅre Og raj doe samakʼ khanḍa khunḍikedea.

³⁴ Ona tayom uni do Ramoteye ruạṛ calaoena ar Sạul do Gibeat-Sạul nagrahateye ruạṛena.

³⁵ Sạmuel tinạkʼ din jiwetʼe tahẽkan unạkʼ din uni do Sạul sãote ar bae ńapamlena. Israelko cetanre Sạule rajkedete Probhu Isorakʼ duk reakʼe hoylente Sạmuel do uni lạgitʼe dukokʼ kan tahẽkana.