1 Samuel 14 - সান্তালী বাইবেল

Philisṭikoko bhagao ocoyen

¹ Mitʼdin Sạulren hopontetʼ Jonathan do acʼren khanḍa bhanḍa asenicʼ koṛae metadea, “Dela, Philisṭikoakʼ ḍera telaṅ calakʼa.” Menkhan uni do acʼren apattetʼ hõ bae baḍae ocoledea.

² Unre Sạul do Gibea simạna reakʼ Migron ńutumanakʼ mitʼṭecʼ jaegare ḍạlim dare buṭạreye duṛupʼ akan tahẽkana. Ar uni sãote turui sae hoṛko tahẽkana,

³ onko modre do Ahiạ ńutuman mitʼ hoṛe tahẽkana ar uniyakʼ hoṛmore do ephod tahẽkantaea. Ahiạ do Ehiṭubren hopone tahẽkana, ar Ahiṭub do Ikabotren boehae tahẽkana, ar Ikabot do Pinehasren hopone tahẽkana ar Pinehas do Eliren hopone tahẽkana; ar Eli do Silore Probhu Isorren naekeye tahẽkana. Unre Jonathanakʼ oḍok calakʼ reakʼ katha do okoege bako baḍaekan tahẽkana.

⁴ Ar okaṭakʼ ciritʼ horte paromkate Jonathan do Philisṭikoren lạṛhại phạdkoakʼ ḍera ṭhen calakʼ reakʼ kathae menletʼ ona ciritʼ hor reakʼ banar aṛege dhiri reakʼ usul pạcri leka khaṛage tahẽkana. Ona mitʼ aṛe reakʼ ńutum do Boses ar eṭakʼ aṛe reakʼ ńutum do Sene tahẽkana.

⁵ Ona reakʼ mitʼ aṛe do utạr reakʼ Mikmas secʼ ar eṭakʼ aṛe do dạkhin reakʼ Geba secʼ.

⁶ Jonathan do acʼren khanḍa bhanḍa asenicʼ koṛae metadea, “Dela, alaṅ do begor khatna akan hoṛkoakʼ ḍera telaṅ calakʼa. Pasecʼ Probhu Isor do abon lạgitʼ jãhãnakʼe cekaea, ente uni do acʼakʼ sana lekage thoṛa hoṛkote hõ ar ḍher hoṛko bhagao daṛeakoa.”

⁷ Khanḍa bhanḍa asenicʼ uni koṛae menkeda, “Amakʼ mone joṅakʼ lekage baṛe hoyokʼma. Ar amakʼ monsubạ lekageń calakʼa.”

⁸ Jonathane menkeda, “Enḍekhan dela, onko samaṅ secʼ laṅ calakʼa ar onko ṭhen laṅ ńel ocokʼa.

⁹ Onkoko metalaṅ khan, ‘teṅgokʼ ben, ale do aben ṭhenle hijukʼkana,’ enḍekhan alaṅ do onḍe khon ar balaṅ lahakʼa ar balaṅ rakapʼ calakʼa.

¹⁰ Arko metalaṅ khan, ‘ale ṭhen rakapʼ hijukʼ ben,’ enḍekhan laṅ rakapʼ calakʼa. Ar Probhu Isor aboakʼ tireye jimạ akatʼko onage hoyokʼa alaṅ ṭhen uniyakʼ cinhạ do.”

¹¹ Niạ menkate unkin do Philisṭikoren lạṛhại phạdko samaṅre senkate kin ńel ocoyena. Unre Philisṭiko doko menkeda, “Hạnkin ńelkinpe, danderrekin okolen unkin dokin oḍok hijukʼkana.”

¹² Onkoakʼ ḍeraren hoṛko do Jonathan ar uniren khanḍa bhanḍa sasapʼicʼ hoṛko metadea, “Ale ṭhen rakapʼ hijukʼben nahãkʼle ńel ocobena.” Unre Jonathan do acʼren khanḍa bhanḍa asenicʼe metadea, “Iń tayomte rakapʼ hijukʼme. Probhu Isor do Israelkoakʼ tireye jimạ akatʼkoa.”

¹³ Jonathan do kaḍa koḍoye rakapʼ calaoena ar uniren khanḍa bhanḍa asenicʼ hoṛ hõ uni tayomteye rakapʼena. Ar Philisṭiko do Jonathanakʼ tire gujukʼko ehopʼena ar uniren khanḍa bhanḍa asenicʼ hoṛ hõ uni tayomte Philisṭiko gocʼkoe ehopʼena.

¹⁴ Jonathan ar uniren khanḍa bhanḍa asenicʼ hoṛ do lạṛhại ehobokʼrege adha ekor jaegare bargel hoṛkin gocʼketʼkoa.

Israelkoakʼ jitạukʼ

¹⁵ Unre Philisṭikoakʼ lạṛhại ṭạnḍi reakʼ ḍerare ar sanam lạṛhại phạdko talare mitʼṭecʼ maraṅ botor rakapʼatʼkoa; onate Mikmas reakʼ ḍera ar huhul dolren lạṛhại phạdko hõ botorte thar tharaokʼko ehopʼena, ar ona sãote dhạrti laṛaokʼ hõ hoyena. Ona maraṅ botor do Isor ṭhen khonge hecʼatʼkoa.

¹⁶ Benjamin ṭoṭha reakʼ Gibeare Sạulren paharadar lạṛhại phạdkoko ńelkeda, Philisṭi lạṛhại phạdko doko chirchạtur akana.

¹⁷ Unre Sạul do acʼ sãoten hoṛkoe metatʼkoa, “Lạṛhại phạdko jarwakate sapṛaokope ar ńelkope, okoe abo talare bạnukʼkoa.” Ar onko doko ńelkeda Jonathan ar uniren khanḍa bhanḍa asenicʼ do onḍe bạnukʼkinạ.

¹⁸ Sạul do Ahiyại metadea, “Am do Isorakʼ sinduk ạguiyme.” (Onako dinre sinduk do Israelko ṭhenge tahẽkana.)

¹⁹ Sạul do tinre naeke sãoteye galmaraokan tahẽkana unre Philisṭikoakʼ ḍerare gulmal hoyokʼ ańjomena ar ḍher idikʼtege tahẽyena. Onate Sạul do naekeye metadea, “Tahẽ ocoge, baṅ lagaokʼa.”

²⁰ Inạ tayom Sạul ar uniren lạṛhại phạdko do sanamko mitʼdomte lạṛhại lạgitʼko oḍok calaoena. Onkoko ńelkeda, Philisṭiko do ako ako upạrtege tarwaṛeko calaoeda ar onko talare maraṅ ạulạuge ńelokʼkana.

²¹ Inạ lahare okoe Ibriko do Philisṭiko talareko tahẽkan onko ar okoe ḍerateko senlen unre onko hõ Sạul ar Jonathan sãoten Israelko sãoteko seletʼena.

²² Ar Ephrayim buru ṭoṭhareko oko akan tahẽkan Israelko hõ Philisṭikoko dạṛeda mente ańjomketʼ khan onko hõ oḍok hecʼkate lạṛhạireko seletʼena ar Philisṭikoko khudạu idiketʼkoa.

²³ Nonkate Probhu Isor do enhilokʼ Israelkoe bańcaoketʼkoa, ar Bet-Aben paromkate hõ lạṛhạitegeko tahẽyena.

Jonathan do dumur rasae jometʼkan

²⁴ Enhilokʼ Israelko do ạḍi kosṭote dinko paromkeda, ente Sạul do mitʼṭecʼe kiriạ ocoletʼkoa, ạuri ạyubokʼ hạbicʼ ar bạiriko cetanre ạuriye halae hạbicʼ jãhãege jãhãnakʼko jom enḍekhan onko cetanre sarap baṛe paṛaokʼ ma. Onate enhilokʼ hoṛko do okoehõ cetʼge bako jomleda.

²⁵ Onko do nonkan mitʼ jaegare senkateko boloyena onḍe do dare nạ̃ṛĩko tahẽkana. Ar onḍe ot cetanre thoṛa dumur rasako ńamkeda.

²⁶ Onkoko ńelkeda, mitʼṭecʼ chata khon dumur rasa do ńurokʼkana menkhan kiriạ akan iạte botorte okoe hõ bako jomleda.

²⁷ Menkhan Jonathan do bae baḍaekan tahẽkana, acʼren apattetʼ do hoṛko mitʼṭecʼe kiriạ ocoakatʼkoa mente. Onate uni do acʼakʼ ti reakʼ ṭheṅga agalte chatareye gutukeda ar rasa hataokate tite jojome ehopʼena. Ar uniyakʼ hoṛmore daṛe do ruạṛ hecʼena.

²⁸ Unre mitʼṭen lạṛhại phạd do uniye metadea, “Amren ạpum do lạṛhại phạdko kajak mitʼṭecʼe kiriạ ocoakatʼkoa, ‘jãhãege teheń jãhãnakʼe jom enḍekhan uni cetanre sarap paṛaokʼa.’ Onate hoṛko do nunạkʼko nijor akana.”

²⁹ “Unre Jonathane menkeda, “Iń baba do hoṛkoe kosṭo ocoyetʼkoa. Ńelpe, niạ rasa thoṛagan mocareń idiketʼ sãote hoṛmore daṛe do ruạṛ hecʼadińạ.

³⁰ Bạiriko ṭhen khon luṭakʼ jomakʼko khon teheń hoṛkoko jom daṛeakʼ khan ạḍi bhage hoekokʼa, ar Philisṭiko do arhõ ḍher bon gocʼ daṛekekoa.”

³¹ Israelko do enhilokʼ Mikmas khon Ayalon hạbicʼ Philisṭiko gocʼ idiketʼkoa arko laṅga cabayena.

³² Onate onko do luṭ reakʼ jinisko cetanre hatko emketʼte bhiḍi, ḍaṅgra, mĩhũ sapʼkate otre gurkate mãyãm sudhạ jel jojomko ehopʼena.

³³ Unre hoṛko do senkate Sạulko metadea, “Ńelme, onko do mãyãm sudhạ jelko jomketʼte Probhu Isor upạrteko kạiyeda.” Uniye menkeda, “Ape do bepạtiạrkope hoyakana. Do, begor bilomte mitʼṭecʼ maraṅ dhiri nonḍe giṛgạu ạguiype.”

³⁴ Ona tayom uniye menkeda, “Hoṛko talare senkatepe metakoa onko do jemon akoren phẽṭaṛ se bheḍa nonḍe iń ṭhen ạgukateko gurkoma ar ona tayomko jomma. Mãyãm sudhạ jel jomkate okoehõ jemon Probhu Isor upạrte aloko kại.” Ar enhilokʼ hoṛko do akoren phẽṭaṛ ạgukate onḍeko gurketʼkoa.

³⁵ Ar Sạul do Probhu Isor ńutumte onḍe mitʼṭecʼ pinḍe benaokeda. Ar onage Probhu Isor ńutumte uniyakʼ benaoakʼ pạhil pinḍ hoyena.

³⁶ Tayomte Sạule menkeda, “Dela bon, teheń ńindạ do Philisṭiko bon lagakoa ar setakʼ hạbicʼ onkoakʼ jinisko bon luṭtakoa. Onkoren mitʼṭen hõ jiwetʼ do babon dohokoa.” Hoṛkoko roṛ ruạṛkeda, “Am okaṭakʼ bhagem hudisetʼ ona baṛe onkaeme.” Menkhan naekeye menkeda, “Dela bon, abo do pạhilre Isor ṭhen bon kuliyange.”

³⁷ Unre Sạul do Isore kulikedea, “Iń do cetʼ Philisṭikoń laga ńirkoa? Onko do cetʼ Israelkoakʼ tirem jimạkoa?” Enhilokʼ Isor do Sạul cetʼge bae roṛ ruạṛadea.

³⁸ Ona iạte Sạule menkeda, “Lạṛhại dolren mukhiyạko, dela nonḍe hijukʼpe. Teheńakʼ niạ kại do cekate hoyena, ona reakʼ khoj khobor bon hataoa.

³⁹ Israelkoren babańcaoicʼ jiwetʼ Probhu Isor ńutumteń kiriạkʼ kana, ińren hopon Jonathan hõ onae onka akatʼ khan khạṭige uni hõ gujukʼ hoyokʼtaea.” Menkhan hoṛko do jotoge hape akanko tahẽyena.

⁴⁰ Sạul do unre sanam Israelkoe metatʼkoa, “Ape do mitʼ secʼre teṅgokʼpe, iń ar ińren hopon Jonathan tạliń do eṭakʼ secʼre liń teṅgokʼa.” Hoṛkoko menkeda am okaṭakʼ bhagem hudisetʼ onage onkaeme.”

⁴¹ Unre Sạul do Israelkoren Probhu Isore metadea, “Niạ reakʼ roṛ ruạṛaleme baṛe.” Ar unre Sạulren hopon Jonathan cetanre dos do paṛaoena ar sarecʼ hoṛko do chaṛko ńamkeda.

⁴² Sạule menkeda, “Iń ar ińren hopon Sạul talare gulibãṭ hoyokʼma.” Ar onate dos do Jonathan cetanre paṛaoena.

⁴³ Sạul do unre Jonathane metadea, “Lạiạńme, am do cetʼem ceka akada?” Jonathan do uniye metadea, “Ińakʼ ṭheṅga agalte thoṛagan dumur rasań jomakada, ar onate cetʼ iń do gujukʼ hoyokʼtińạ?”

⁴⁴ Sạule menkeda, “Hẽ Jonathan, am do gujukʼtege hoyokʼtama. Isor do am sạjạiye emamma, ar khạṭige sạjạiye emama.”

⁴⁵ Menkhan hoṛko do Sạulko metadea, “Okoe iạte Israelko niạ maraṅ bańcaoko ńamakatʼ uni Jonathan do cetʼ gujukʼ hoyokʼtea? Tisge baṅa; jiwetʼ Isor ńutumtele kiriạkʼ kana, uniyakʼ mitʼṭecʼ upʼ hõ otre do baṅ ńurokʼtaea, ente uni teheń okae ceka akatʼ ona do Isor sãote tahẽkategeye onka akada.” Nonkate hoṛko do Jonathanko rukhiyạkedea, ar uni do bae gocʼ ocolena.

⁴⁶ Inạ tayom Sạul do ar Philisṭiko bae khudạuletʼkoa, ar Philisṭiko hõ akoakʼ disạmteko ruạṛ calaoena.

⁴⁷ Sạul do Israelkoren raj hoyen tayom disạm beṛhaeten sanam bạiriko sãote, metakʼme Moabrenko, Amonrenko, Edomrenko, Sobaren rajko ar Philisṭiko sãoteye lạṛhạilena. Ar jãhã secʼge uniye calakʼkan tahẽkan onḍege ạḍiye khutiketʼtakoa.

⁴⁸ Uni do birbanṭa leka lạṛhạikate Amalekikoe bhagaoketʼkoa ar luluṭkoakʼ ti khon Israelkoe rukhiyạketʼkoa.

⁴⁹ Jonathan, Jesbi ar Molkisui ńutuman Sạulren do pe hoponko tahẽkantaea. Uniren maraṅicʼ hoponeratakʼ ńutum do Merob ar huḍińicʼ hoponeratakʼ ńutum do Mikhal tahẽkana.

⁵⁰ Uniren bạhuttetʼakʼ ńutum do Ahinoạm tahẽkana. Uni do Ahimasren hoponerae tahẽkana. Sạulren maraṅ subedarakʼ ńutum do Abner tahẽkana. Uni do Sạulren kakattetʼ Nerren hopone tahẽkana.

⁵¹ Sạulren apat Kis ar Abnerren apat Ner do Abiyelren hoponkin tahẽkana.

⁵² Sạulakʼ rajokʼ oktere Philisṭiko sãote maraṅ lạṛhại hoylena. Jãhãe daṛean hoṛ se birbanṭa herel hoṛe ńelle khange uni do lạṛhại phạdreye hataoedekan tahẽkana.