1 Samuel 13 - সান্তালী বাইবেল

Philisṭiko sãote lạṛhại lạgitʼ sapṛaokʼ

^1-2 Sạul do juạn umerre raj hoykate Israel disạmre thoṛa bochor rajosṭi calao tayom Israelko tala khon pe hajar hoṛe bachaoana. Onko modre bar hajar hoṛ do uni sãote Mikmasre ar Bethel reakʼ buru ṭoṭhareko tahẽyena ar mitʼ hajar do Benjạmin gusṭirenkoakʼ Gibeare Jonathon sãoreko tahẽyena. Ar eṭakʼ Israelko do akoakʼ oṛakʼteye kolkatʼkoa.

³ Ar Gebeare Philisṭikoren lạṛhại phạdko do okareko ḍera akan tahẽkan ona do Jonathone akromonkeda ar ona do Philisṭikoko ańjomkeda. Unre Sạul do disạm reakʼ sanam jaegare sakwa oroṅkateye menkeda, “Ibrikoko ańjomma.”

⁴ Onate Israelren sanam hoṛko ańjomkeda, Sạul do Philisṭikoren lạṛhại phạdkoakʼ ḍerae akromon akada ar Philisṭiko do Israelkoko hirkhạwako kana. Unre Israelkoko hoho ocoyena jemon onko do Gilgolte senkate Sạul sãoteko midokʼ.

⁵ Unre Philisṭiko do Israelko sãote lạṛhại lạgitʼ mitʼ ṭhenko jarwayena. Ar onko sãote pegel hajar rãt gạḍiko, turui hajar aswariko ar jalapuri reakʼ gitil leka alekha lạṛhại phạdko tahẽkana.

⁶ Israelren lạṛhại phạdko do ạḍi muhinreko paṛao akana menteko ńelketʼ khan onko do danderkore, jhupuṭoṛokore, buru khorloṅkore, cạṭạni lopakʼkore, ḍonḍhorkore ar khạ̃yukʼkoreko okoyena.

⁷ Ar ḍher Ibriko do jordan gaḍa paromkate Gad ar Gilead ṭoṭhateko calaoena. Menkhan Sạul do Gilgolreye tahẽyena, ar uni sãoten lạṛhại phạdko do botorte thartharaokʼko ehopʼena.

⁸ Sạul do Samuelakʼ katha leka uni lạgitʼ eae din hạbicʼe koyokʼ horkeda, menkhan Sạmuel do Gilgolte bae hecʼlena. Ar acʼren lạṛhại phạdko hõ uni bạgikate hante nate calakʼko ehopʼena.

⁹ Onate Sạul do jeredokʼ samaṅokʼakʼ ar sulukren samaṅokʼakʼ reakʼ jinis acʼ ṭhen ạgui lạgitʼe metatʼkoa. Ar acʼge ona jeredokʼ samaṅokʼakʼe samaṅkeda.

¹⁰ Ar samaṅokʼakʼe samaṅ sạtketʼ khan Samuel doe seṭerena. Unre Sạul do uni joharae lạgitʼ uni sãote ńapamokʼ lạgitʼe oḍok senena.

¹¹ Sạmuel do uniye metadea, “Noa do cetʼem cekakeda?” Sạule roṛ ruạṛkeda, “Ińiń ńelkeda, hoṛko do ińko bạgiyạńkana ar am hõ ṭhik oktere bam hecʼlena, ar note Philisṭirenko hõ Mikmasre hecʼkateko ḍera akana.

¹² Onateń hudiskeda, Philisṭiko do Gilgolre akromoniń lạgitʼko hijukʼkana menkhan Probhu Isorakʼ daya ńam lạgitʼ do bạń kurumuṭu kana. Onate ińakʼ monsubạ baṅ tahẽkanre hõ ona jeredokʼ samaṅokʼakʼ iń samaṅkeda.”

¹³ Sạmuele menkeda, “Am do bebuj lekam kạmiakada. Amren Probhu Isor okae hukumatʼme tahẽkan ona do bam manaoleda. Onam manao lekhan Israelko cetanre amakʼ rajokʼ do jaejug hạbicʼe dohoketama.

¹⁴ Menkhan ńitokʼ amakʼ rajokʼ do ḍher din baṅ ṭikạu tahena. Probhu Isor do acʼakʼ kusileka mitʼṭen hoṛe ńam akadea ar unige acʼren hoṛkoren mukhiyạ menteye bahal akadea, ente uniyakʼ hukum do bam ańjom akada.”

¹⁵ Inạ tayom Samuel do Gilgol bạgikate Benjạmin ṭoṭha reakʼ Gibeateye senena. Sạul do acʼ sãoten hoṛkoe lekhaketʼkoa ar onko do turui saeko tahẽkana.

Israelkoakʼ lạṛhại reakʼ sajbaj

¹⁶ Tayomte Sạul ar acʼren hopontetʼ Jonathan ar onko sãoten hoṛko do Benjạmin ṭoṭha reakʼ Gibeate senkateko tahẽyena ar Philisṭiko do Mikmasre ḍera akangeko tahẽyena.

¹⁷ Ar Philisṭikoakʼ ḍera khon pe dol huhul lạṛhại phạdko oḍokena. Onko modren mitʼ dol do Ophra hor aṛe reakʼ Sual ṭoṭha secʼko calaoena.

¹⁸ Ar mitʼ dol do Bet-horon secʼ ar eṭakʼ dol do ona buru ṭoṭha secʼ one onḍe khon hahaṅkar ṭoṭha reakʼ Seboyim buru lodam ńelńamokʼ.

¹⁹ Onako dinre Israel disạmre cele kamarge bako tahẽkana onate Philisṭiko doko hudisetʼ tahẽkana kamarko tahẽlen khan Ibriko do tarwaṛe ar borlomko benaokea.

²⁰ Ar onate onko do nahel reakʼ phal, kuḍi, ṭeṅgocʼ ar datrom dhar ocoy lạgitʼ Philisṭiko ṭhen calakʼ hoyokʼkan tako tahẽkana.

²¹ Ar nahel reakʼ phal, kuḍi, phala ar kuńcko dhar ocoy lạgitʼ dam lekate irạl gram rupạ lagaoako kan tahẽkana.

²² Onate lạṛhại jokhecʼ ńelena, Sạul ar uniren hopontetʼ Jonathan chaḍa unkin sãoten ar okoe lạṛhại phạdkoakʼ tire jãhãn tarwaṛe se borlomge baṅ tahẽkana.

²³ Ar Philisṭiren lạṛhại phạdko do ḍera khon oḍokkate Mikmas reakʼ horre senkateko tahẽyena.