1 Samuel 12 - সান্তালী বাইবেল

Israelko ṭhen Samuelakʼ mucạtʼ katha

¹ Inạ tayom Sạmuel do Israelkoren sanamkoe metatʼkoa, “Ape okakope men akawạdiń onako jotowakʼ doń ańjom akada ar ape cetanre mitʼṭen raj hõń bahal akawatʼpea.

² Ńelpe, ńitokʼ do ape ạyurpe lạgitʼ aperen do mitʼṭen raj menaea. Iń doń haṛamena, ariń pạnḍu caba akana, ar ińren hoponkin hõ ape samaṅrege menakʼkinạ. Iń do juạn umer khon teheń hạbicʼ apeń ạyur ạguakatʼpea.

³ Iń do nonḍege minạńa; ar iń upạrte apeakʼ jãhãnakʼ roroṛteakʼ menakʼtape khan enḍekhan Probhu Isor ar uniren ojokʼ bahal akan hoṛko samaṅrege roṛpe. Ar goha emokʼpe, okoeren ḍaṅgra se gadha behok lekateń hatao akadea mente? Ar jãhãe ṭhen khon ghus hataokate mocań bond akatʼ tińạ mente? Noako reakʼ jãhãṭakʼgeń kạmi akatʼ khan tobe khan ona reakʼ khuti puruniń emokʼa.”

⁴ Unre hoṛko menkeda, “Baṅa, am do ale okoe cetanre hõ bam behok akada, ar okoe cetanre hõ bạṛicʼ do bam beohar akada ar okoe ṭhen khon hõ cetʼge bam hatao akada.”

⁵ Sạmuel do onkoe metatʼkoa, “Teheń do Probhu Isor kangeae goha do, ar uniren ojokʼ bahal akan hoṛko hõ goha kanako, ape do iń ṭhen khon jãhãn jinisge bape ńamleda.” Unre hoṛkoko menkeda, “Uni kangeae goha do.”

⁶ Samuel do hoṛko arhõe metatʼkoa, “Hẽ, Probhu Isorge goha do, one okoe do Mose ar Arone bahalletʼkin ar aperen hapṛamko Misor disạm khon kin oḍok ạguletʼko tahẽkan.

⁷ Enḍekhan niạ dhao do apege sapṛaokʼpe. Probhu Isor do ape ar aperen hapṛamko lạgitʼ okako dhorom reakʼe kạmi akatʼ ona jotowakʼ reaṅ Probhu Isor samaṅrege apeakʼ doskoń udukʼapea.

⁸ “Jakob do Misor disạmteye senena, ar aperen hapṛamko tinre Probhu Isor ṭhenko rakʼkeda unre Probhu do Mose ar Arone kolketʼkinạ. Unkin do Misor disạm khon aperen hapṛamkokiń oḍok ạguketʼkoa ar niạ disạmrege girobasokʼ lạgitʼkin bondobosatʼkoa.

⁹ Menkhan onko do Probhu Isorko hiṛińkedea. Onatege uni do golam hoyokʼ lạgitʼ Hasorren senaputi Siserawakʼ tire, Philisṭikoakʼ tire, ar Moab disạmren rajkoakʼ tire onkoe jimạkatʼkoa. Onko do aperen hapṛamko sãoteko lạṛhạiyena.

¹⁰ Unre aperen hapṛam do Probhu Isor ṭhen rakʼketʼteko menkeda, ‘ale dole kại akada; ale do Probhu Isor bạgikate Bakʼal ar Astoretle pujạ akawatʼkinạ; ńitokʼ bạirikoakʼ ti khon baṛe rukhiyạleme, ar ale do amgele sewawama.’

¹¹ Unre Probhu Isor do Jerubakʼal, ar Barak, Jephtoha ar Samuel tekoe kolletʼkote ape beṛhaeten bạirikoakʼ ti khone rukhiyạketʼpea. Ar ona tayom ape nirạite girobasokʼpe ehopʼena.

¹² “Menkhan Amonkoren Nahas raj do tinre ape upạrte lạṛhại lạgitʼ hijukʼkanpe ńelkedea unre Probhu Isor do aperen raje tahẽkanre hõ ińpe metadińạ, ‘ale cetanre mitʼṭen raje hoyokʼma.’

¹³ Ńitokʼ ńelpe, nui kangeae aperen raj do, one unipe khojlede arpe bachao akawan. Probhu Isor do ape cetanre mitʼṭen raje bachao bahal akadea.

¹⁴ Ape do Probhu Isorpe botorae, arpe sewawae ar uniyakʼpe bataotaete uni upạrte bape taṛam, ar okoe apeye ḍanṭaope uni aperen raj ar aperen Probhu Isorakʼ sana lekape calakʼ, enḍekhan do bhagegea.

¹⁵ Menkhan Probhu Isorakʼ bape batao ar uniyakʼ hukum upạrtepe taṛam, enḍekhan cetʼleka aperen hapṛamko sạjạiye ematʼko tahẽkan onkage ape hõe emapea.

¹⁶ “Ńitokʼ do ma sapṛaokʼpe; Probhu Isor apeakʼ mẽtʼãhã samaṅre oka maraṅakʼe kạmi ona ńelpe.

¹⁷ Ńitokʼ do guhum gegetʼ somoe kana, se baṅa? Iń do Probhu Isoriń metaea jemon uni do huḍur ar dakʼe kol. Ar unrepe baḍae daṛeakʼa arpe ńela, rajpe koeyante Probhu Isor ṭhen tinạkʼ maraṅpe behok akada mente.”

¹⁸ Inạ tayom Samuel do Probhu Isor ṭhene koekeda ar uni do enhilokʼge huḍur ar dakʼe kolkeda. Unre sanamkoge Probhu Isor ar Sạmuelko botoratʼkinạ.

¹⁹ Unre onko sanamko do Samuelko metadea, “Amren Probhu Isor ṭhen amren gutiko lạgitʼ koeme jemon alole gujukʼ, ente rajle koeante aleakʼ judạ judạ kạiko sãote niạ kại hõ juṭucʼentalea.”

²⁰ Samuele roṛ ruạṛkeda, “Alope botorokʼa. Apepe kại akatʼrehõ enhõ Probhu Isor ṭhen khon pharakokʼ baṅkate goṭa ontorte uni sewawaepe.

²¹ Uni khon do alope sạṅgińokʼa, entepe onkale khan ape do eṛe debotako ṭhenpe calakʼa. Onko doko ạuṛiyakʼgea ar bako bhạlại daṛeapea onko do rukhiyạ hõ bako rukhiyạ daṛeapea.

²² Probhu Isor do acʼakʼ maraṅ ńutum iạte acʼren hoṛko tisge bae bạgi daṛeakoa, ente uni do acʼakʼ sanatege acʼren hoṛe hoyocoakatʼpea.

²³ Iń do ape lạgitʼ koejoṅ tishõ aloń thirokʼte Probhu Isor upạrte aloń kại. Iń do dhorom ar sạriyakʼ reakʼ horte calakʼ reakʼiń cetʼapea.

²⁴ Ape do eken Probhu Isor botoraepe ar apeakʼ goṭa ontorte pạtiạr salakʼ uni sewawaepe. Hudispe, ape lạgitʼ uni do tinạkʼ maraṅ maraṅakʼe kạmi akada.

²⁵ Menkhan behokakʼpe kạmi idi enḍekhan ape ar aperen raj sanamgepe marao utạrokʼa.”