1 Samuel 11 - সান্তালী বাইবেল

Jabes Gileadkoakʼ bańcaokʼ

¹ Amoniạ Nahas do senkate Jabes-Gileade esetʼ ạcurkeda. Unre Jabesren hoṛko do Nahasko metadea, “Ale sãote mitʼṭecʼ bondobos bandhaome, enḍekhan ale do am taberele tahena.”

² Amoniạ Nahas do roṛ ruạṛatʼkoteye metatʼkoa, “Mitʼṭecʼ sorto iạte ape sãoteń bondobos daṛekea. Ar ona do hoyokʼ kana, ape sanamkoakʼ jojom sa reakʼ mẽtʼ hoṭor todtape hoyokʼa. Arpe onkaete sanam Israel jạtrenkoń bemanotkoa.”

³ Niạ katha ańjomkate Jabesren murubbiko do Nahasko metadea, “Eae din somoe emalem. Ar inạ talare Israel disạm reakʼ sanam jaegare hoṛkolkate khoborle kola. Ar jãhãe ale rukhiyạle lạgitʼ bae hijukʼ enḍekhan ale do am taberele tahena.”

⁴ Hoṛko do tinre khobor emokʼ lạgitʼ Sạulakʼ nagraha Gibeate senkate onḍenko hoṛko lạiyatʼkoa unre onḍenko hoṛ do kạuạ rạuwạ rarakʼko ehopʼena.

⁵ Ar unre Sạul do gupi ṭạnḍi khon ḍaṅgrakoante oṛakʼteye ruạṛ hijukʼkan tahẽkana. Uni do, “Cetʼ hoyakana menteye kuliyana? Ar cedakʼ hoṛ doko rakʼeda?” Unre Jabesren hoṛ do okako lại oṭokatʼ onako baḍae ocokedea.

⁶ Hoṛkoakʼ kathae ańjomketʼ khan Isorren Jiu do Sạul cetanreye hecʼena, ar edrete uni doe seṅgelena.

⁷ Uni do barea ḍaṅgrae hataoketʼkinte unkine samakʼ kaṭra kuṭrạketʼ kinạ. Ar ona tayom onako kaṭra kuṭrạ do hoṛ kolkate Israel disạm reakʼ sanam jaegareye kolkeda ar noa katha lại pasnao lạgitʼe metatʼkoa, “Jãhãege Sạul ar Sạmuel sãote bae midokʼ onkoren gại ḍaṅgrawakʼ halot hõ nonkage hoyokʼtakoa.” Probhu Isor do Israelkoakʼ monre mitʼṭecʼ botore rakapʼ ocoketʼtakoa, ar onko do mitʼte jotoko oḍok hecʼena.

⁸ Sạul do Besekre onkoe lekhaketʼkoa. Onate Israelren lạṛhại phạdkoakʼ lekha do pe lakh ar Jihudạren do pe gel hajarko hoyena.

⁹ Gibearen hoṛko do Jabes khon okoe khoborko ạguletʼ onkoko metatʼkoa, “Jabes-Gileadren hoṛko senkatepe metakoa, gapa tikin bhitritege onko doko bańcao ocokʼa.” Ar noa katha Jabesren hoṛko baḍaeketʼ khan ạḍiko kusiyena.

¹⁰ Onko do Amonrenko metatʼkoa, “Gapage ale do ape taberen hoṛle hoyokʼa. Ar apeakʼ oka kusi onage ale cetanre kạmipe.”

¹¹ Dosar hilokʼ Sạul do acʼren hoṛko pe dolteye hạṭińketʼkoa. Ona tayom aṅga marsalokʼ okte onko do Amonrenkoakʼ ḍerate bolokate tikin hạbicʼko gocʼketʼkoa. Ar tinạkʼ jiwetʼko tahẽyen onko doko chirchạtur cabayena, ar mitʼ sãote bar hoṛ hõ bạkin tahẽlena.

Sạul raj hudạreye bahal ocokʼkan

¹² Hoṛko do hecʼkate Samuelko metadea, “Okoeye menleda Sạul do ale cetanre bae raj daṛeakʼa? Onko do aleakʼ tire jimạkakome; onko dole gocʼ cabakoa.”

¹³ Menkhan Sạule menkeda, “Teheń do celege baṅ gocʼko hoyokʼa, ente teheń dinre Probhu Isor do Israelkoe bańcao akatʼkoa.”

¹⁴ Unre Samuel do hoṛkoe metatʼkoa, Dela, abo do Gilgolte senkate Sạulakʼ raj hudạ reakʼ katha arhõbon lại jạhira.”

¹⁵ Onate hoṛko do Gilgolte senkate Probhu Isor samaṅre Sạul do raj hudạreko bahalkedea. Ar onḍe Probhu Isor ńutumte sulukren samaṅokʼakʼko samaṅkeda ar Sạul ar Israelrenko do ạḍiko rạskạyena.