1 Samuel 10 - সান্তালী বাইবেল

¹ Ona tayom Samuel do mitʼṭecʼ sunum reakʼ botol ạgukate Sạulakʼ bohokʼreye dulkeda. Ar cokʼadeteye metadea, “Probhu Isor do acʼren hoṛko cetanre mukhiyạ menteye ojokʼ bahalketʼmea.

² Am do iń ṭhen khon senkate teheń Benjạmin ṭoṭha reakʼ simạna Selsah ńutuman jaegare Rahelakʼ topa ṭhen bar hoṛem ńamkinạ. Unkin dokin lạiyama, ‘okoe gadha eṅgako sendram oḍok akan onko doko ńamakana. Menkhan ńitokʼ amren baba do gadha eṅgako reakʼ cintạ badkate am lạgitʼ cintạreye paṛao akana. Uniye meneda, acʼren hopon lạgitʼ ńitokʼ do cetʼe cekaea?’

³ “Ona tayom am do onḍe khon sen laha nõkʼkate Tabor ṭoṭha reakʼ Elon dare ṭhenem senlen khange Isorren pe hoṛ do sewae lạgitʼ Bethelteko rakapʼ calakʼ kanem ńamkoa. Arem ńela, onko modren mitʼ hoṛ do pea merom boda hopon, ar mitʼ hoṛ do pea piṭhạ ar mitʼ hoṛ do mitʼ celaṅ darkha rasae idiyeda.

⁴ Onko do amko joharama ar barea piṭhạko emama ar am do onkoakʼ ti khon onam hataoa.

⁵ “Ona tayom am do Gibea-elohim nagrahatem calakʼa. Onḍe do Philisṭiren lạṛhại phạdkoakʼ mitʼṭecʼ ḍera menakʼa. Ar nagrahatem seṭerlen khan nonkan mitʼ dol nạbiko sãotem ńapamokʼa onko do Isorakʼ emakʼ katha roṛ roṛte sewae reakʼ cetan jaega khonko pheḍ hijukʼa. Ar onko dolren samaṅ secʼren hoṛko do binạ banam, peṛesaṅ, tiriạ ar tabla ru-ruteko calakʼa.

⁶ Unre Probhu Isor do acʼren jiuteye sarbharaomea, ar onate amhõ onko sãote nạbi leka katham roṛa. Ar eṭakʼ lekan hoṛem hoyokʼa.

⁷ Niạko cinhạ hoylenre am do okaṭakʼ cekae lektam onagem onkaea; Isor do am sãoteye tahena.

⁸ “Am do iń lahate Gilgolte pheḍ calakʼme. Iń do jeredokʼ ar sulukren samaṅokʼakʼ samaṅ lạgitʼ am ṭheniń hijukʼkana. Ar iń ạuriń hijukʼ hạbicʼ am do eae din iń hạbicʼem koyokʼ hora. Ar iń do hecʼkateń lạiyama cetʼ cekae hoyokʼtama.”

Sạul do raje hoyen

⁹ Samuel ṭhen khon calakʼ jokhecʼ Sạul doe ạcuren khan Isor do uniyakʼ mone bodolketʼtaea. Ar enhilokʼge cinhạ lekate roṛakʼ ghoṭnako hoyena.

¹⁰ Sạul ar uniren guti do Gibeate kin seṭeren khan mitʼ dol nạbiko sãotekin ńapamena. Unre Isorren Jiu do Sạule sarbharao ocokedea, ar uni do nạbiko talare senkate Isorakʼ katha lạlạiye ehopʼena.

¹¹ Okoe laha khon Sạulko oprom akade tahẽkan onko do nạbiko sãote Isorakʼ katha roroṛko ńelkede khan apan ạpin memenko ehopʼena, “Kisren hoponakʼ do cetʼ hoyakana? Sạul hõ cetʼ enḍekhan nạbiko modren mitʼ hoṛ kanae?”

¹² Onate onḍenko hoṛko menkeda, “Menkhan noko do okoeren hopon kanako?” Ona iạte “Sạul hõ cetʼ nạbiko modren mitʼ hoṛ kanae?” Ar noa katha do kạhtuk hoyena.

¹³ Isorakʼ emakʼ katha roṛ sạtkate Sạul do sewae reakʼ cetan jaegateye rakapʼena.

¹⁴ Sạulren kakattetʼ do Sạul ar uniren gutiye kuliketʼkinạ, “Okate ben calaolena?” Sạule menkeda, “Gadha eṅga sendrako lạgitʼ liń senlena, menkhan onko do okarege bạliń ńamletʼkote Sạmuel ṭhen liń calaoena.”

¹⁵ Sạulren kakattetʼe menkeda, “Lạiyạń ben Sạmuel do cetʼe menkeda?”

¹⁶ Sạul do acʼren kakattetʼe metadea, “Uni do pusṭạuteye metatʼlińạ, gadha eṅga doko ńamakana.” Menkhan uniyakʼ rajokʼ reaṅ Samuel oka kathae men akawade ona do kakattetʼ bae lạiyadea.

¹⁷ Tayomte Samuel do Mispare Probhu Isor samaṅre Israelkoe hoho jarwaketʼkoa.

¹⁸ Uni do onkoe metatʼkoa, “Israelkoren Probhu Isore menakada, ‘Misor disạm khon ińgeń oḍok ạgu akatʼpea, ar Misorrenkoakʼ ti khon okako rajosṭi do ape cetanre santaoko calaoetʼ tahẽkan onkoakʼ ti khon hõ ińgeń bańcao akatʼpea.’ ”

¹⁹ Samuel do arhõ menkeda, “Menkhan aperen Isor, okoe do sanam lekan muhin ar muskil khone bańcao akatʼpere hõ, ape do unigepe nihạ̃t giḍi akadea arpe meneda, ‘ale cetanre mitʼṭen raj baṛe emalem.’ Onate ńitokʼ ape do apan ạpin gusṭi ar bõs lekate Probhu Isor samaṅre hạjirokʼpe.”

²⁰ Sạmuel do Israelkoren sanam gusṭikoe hohowatʼkoa. Onko gusṭiko mod khon Benjạmin gusṭiren doko bachao ocoyena.

²¹ Ona tayom Benjạmin gusṭiren sanam bõsko do samaṅ secʼko ạgu ocoyena. Ar onko mod khon Mitri bõsko bachao ocoyena. Nonkate mucạtʼre Kisren hopon Sạule bachao ocoyena. Ar uniyakʼ khoj paṛaoen khan uni do bae ńamlena.

²² Unre hoṛko do Probhu Isorko kulikedea, “Nonḍe do cetʼ ar jãhãe menakʼkoa?” Probhu Isore menkeda, “Ńelpe, uni do asbabko talareye oko akana.”

²³ Unre hoṛko do ńir senente onḍe khon Sạulko ạgukedea. Ar hoṛko talareye teṅgoyen khan uni do sanamko khon mitʼ phuṭ usule ńelena.

²⁴ Unre Samuel do sanamkoe metatʼkoa, “Ape do cetʼ Probhu Isore bachao akade hoṛpe ńelńame kana?” Sanam hoṛko modre uni lekanko do ar okoege bạnukʼkoa. Unre hoṛkoko menkeda, “Raj do jiwetʼ baṛeye tahenma.”

²⁵ Unre Samuel do rajosṭi ḍanṭao reakʼ niạm lekate hoṛko ṭhene lại jạhirkeda. Uni do onako mitʼṭecʼ puthire olkate Probhu Isor samaṅreye dohokeda. Ar ona tayom hoṛko do apan ạpin oṛakʼteye bidạkatʼkoa.

²⁶ Sạul hõ acʼakʼ oṛakʼ Gibeateye ruạṛ calaoena. Ar okoe birbanṭakoakʼ ontorre Isor do udgạue ematʼko eken onkoge uni sãoteko senena.

²⁷ Menkhan mitʼ bar bạṛicʼ hoṛ doko menkeda, “Nui hoṛ do cetʼ lekateye rukhiyạ bona?” Onko do uniko nihạ̃tkedea ar cetʼ sandesge bako emadea. Menkhan khan Sạul do hapegeye tahẽyena.