1 Rapajko 7 - সান্তালী বাইবেল

Solomonakʼ raj dolan

¹ Solomon do raj doṅgol benao sạtte gelpe bochor lagaoade tahẽkana.

² Uni do raj doṅgolre Lebanon bir oṛakʼ ńutumanakʼ mitʼṭecʼ oṛakʼe benaokeda. Niạ oṛakʼ do mitʼsae moka jeleń, mõṛẽgel moka osar ar pegel moka usul tahẽkana. Debdạru kaṭ reakʼ pon sạr khunṭiko cetanre debdạru kaṭ reakʼ saṅghako bạisạu tahẽkana.

³ Khunṭi cetanre bạisạu akatʼ saṅghako cetanre do debdạru kaṭteko dapʼkeda; ar mimitʼ goṭecʼ sạrre gelmõṛẽ goṭecʼkate pongel mõṛẽ goṭecʼ saṅgha tahẽkana.

⁴ Oṛakʼ beṛhaeteakʼ bhit samna sạmni do pe sạrte jalna dohoyena.

⁵ Duạr reakʼ cạukaṭko do pon kona tahẽkana; ar jalnako hõ pe sạrte samna sạmni benao tahẽkana.

⁶ Ona tayom uni do kham khunṭi ńutumanakʼ mitʼṭecʼ oṛakʼe benao ocokeda. Ona do jeleńte mõṛẽgel moka ar osarte do pegel moka. Ar ona samaṅre do mitʼṭecʼ sateanakʼ pinḍại doho ocokeda, ar ona sate do khunṭiko cetanre bạisạu tahẽkana. Ona khunṭiko samaṅre sate latarre mitʼṭecʼ saṅgha hõ tahẽkana.

⁷ Bikʼcạr oṛakʼ ńutumte uni do mitʼṭecʼ oṛakʼe benaokeda; onḍe do uniyakʼ siṅghạson tahẽkana. Noa oṛakʼ do bikʼcạr lạgitʼ benao hoyena. Oṛakʼ reakʼ bhit do latar khon cetan hạbicʼ debdạru kaṭteye esetʼkeda.

⁸ Ar acʼakʼ tahen oṛakʼ do bikʼcạr oṛakʼ tayomre inạ mitʼ lekageye benao ocokeda. Pharaoren okoeṭakʼ hoponerae baplalede uni lạgitʼ hõ inạ lekage ar mitʼṭecʼ oṛakʼe benao ocokeda.

⁹ Raj dolan reakʼ maraṅ bakher raca ar sanam dolanko reakʼ rehetʼ khon chat hạbicʼ jotoge ṭhik jokhate getʼakʼ damanakʼ dhirite benaolena. Ona dhiriko do ạrikote somante getʼakʼ tahẽkana.

¹⁰ Dolanko reakʼ rehetʼ do maraṅ maraṅ damanakʼ dhirite gathao tahẽkana. Onako reakʼ adomakʼ do gel moka arhõ adom adomakʼ do irạl moka tahẽkana.

¹¹ Rehetʼ dhiriko cetanre do ṭhik jokhate getʼakʼ damanakʼ dhiriko ar debdạru kaṭ tahẽkana.

¹² Pinḍạ sudhạ Probhu Isorakʼ oṛakʼ bhitri reakʼ bakher raca lekage raj doṅgol reakʼ maraṅ bakher raca beṛhaeteakʼ bhitko hõ napaete getʼ akatʼ pe sạr dhiri ar debdạru dare reakʼ mitʼ sạr dạriạ kaṭte benao akan tahẽkana.

Mundil oṛakʼ reakʼ sajbajko

¹³ Solomon raj do Turte hoṛ kolkate Hirame hoho ạgu ocokedea.

¹⁴ Uniren eṅgattetʼ do mitʼṭecʼ rạnḍi maejiu ar Naphtali gusṭiren hoponerae tahẽkana. Uniren apattetʼ do Turren hoṛe tahẽkana. Ar Hiram do pitạl kạrigole tahẽkana. Hiram do pitạl reakʼ sanam lekan kạmikoe baḍaekan tahẽkana ar ona kạmire uni do ạḍi gạkhuṛ kạrigole tahẽkana. Uni do Solomon raj ṭhene hecʼena ar okako kạmiye emocoyen onakoe kạmikeda.

Pitạl reakʼ khunṭikin

¹⁵ Hiram do pitạl reakʼ barea khunṭiye benaokeda. Ona mimitʼ goṭecʼ reakʼ jeleń do gel irạl moka ar beṛhaeteakʼ beṛ do bargel moka tahẽkana.

¹⁶ Ar ona khunṭikin cetanre emakʼ lạgitʼ uni do pitạl reakʼ barea chatnakine dul benaokeda. Chatnakin reakʼ usul do mõṛẽ moka kate tahẽkana.

^17-18 Mimitʼ goṭecʼ khunṭi chatnare lạgitʼ uni do pitạl reakʼ goṛhon akatʼ eae goṭecʼ sikṛi ar bar sạr pitạl reakʼ ḍạlim jo muṭhạne benaokeda.

¹⁹ Khunṭi reakʼ muthnikin cetanre pon moka do sikiyạm baha reakʼ muṭhạn tahẽkana.

²⁰ Ar muthnikin reakʼ latar secʼ do gulạnḍge tahẽkana. Ona gulạnḍ beṛhaete do sikṛiko lagao tahẽkana. Mimitʼ muthni reakʼ beṛhaeteakʼ sikṛi sãote sạr sạrte pitạl reakʼ bar sae dạlim joko hõ bạisạu tahẽkana.

²¹ Hirạm do ona banar pitạl reakʼ khunṭi do mundil reakʼ pinḍạreye bạisạukeda. Dạkhin secʼ okaṭakʼe bạisạuketʼ ona reakʼ ńutum do Jạkine dohokeda (metakʼme, “Okoeye bạisạuketʼ ”) ar Utạr secʼre okae dohoketʼ ona reakʼ ńutum do Boase dohokeda (metakʼme “Onarege daṛetetʼ do”).

²² Sikiyạm baha leka goṛhon pitạl reakʼ muthnikin do ona khunṭikin cetanrege bạisạu tahẽkana. Ar nonkate ona khunṭi benao reakʼ kạmi do sạtena.

Pitạl reakʼ chańc

²³ Ona tayom Hirạm do pitạl reakʼ chãńcreye dulketʼte dakʼ dohoy lạgitʼ maraṅ okocʼ mitʼṭecʼ gulạnḍge karaheye benao ocokeda, ona karahe reakʼ kaṅkha khon kaṅkha hạbicʼ jokha do gel moka tahẽkana, khạndri do mõṛẽ moka, ar kaṅkha beṛhaeteakʼ jokha do pegel moka tahẽkana.

²⁴ Karahe reakʼ kaṅkha latarre do mimitʼ mokare gel goṭecʼkate bar sạrte pitạl nạ̃ṛĩ dareko reakʼ jo tahẽkana. Okaṭakʼ chańcre karahe benao hoylen ona chańcrege jo reakʼ nạmunako tahẽkante joto do mitʼṭecʼ jinisge hoyena.

²⁵ Ona karahe do gelbar goṭecʼ pitạlren ḍaṅgrako cetanre doṛom akan tahẽkana; onko modre pea do utạr secʼ, pea do pạchim secʼ, pea do dạkhin secʼ, pea do purub secʼko samaṅ akatʼ tahẽkana ar onkoakʼ ṭiki do bhitri secʼ tahẽkana.

²⁶ Ona karahe do pon kạṭupʼ dạriạ tahẽkana. Ar ona reakʼ kaṅkha do bạṭi reakʼ kaṅkha, sikiyạm baha muṭhạn leka tahẽkana. Onare do pongel pon hajar liṭar dakʼ sahobokʼ kan tahẽkana.

²⁷ Hiram do Pitạl reakʼ gel goṭecʼ gaṛsãoḍi lekan jiniskoe benaokeda. Ona mimitʼ goṭecʼ reakʼ jokha do pon moka jeleń, pon moka osar ar pe moka usul tahẽkana.

Pitạl reakʼ pherem

²⁸ Gaṛsãoḍi beṛhaeteakʼ pitạl reakʼ pat do pheremre bạisạu tahẽkana.

²⁹ Ar ona pat cetanre do dhạcri kul, daṅgra ar Kerubakʼ muṭhạnko tahẽkana ar dhạcri kul ar daṅgra latarre do baha leka noksa akawatʼ tahẽkana. Gaṛsãoḍi reakʼ cetan pherem sãote bạisạu akatʼ mitʼṭecʼ gamla dohoy lạgitʼ binḍi tahẽkana.

³⁰ Mimitʼ goṭecʼ gaṛsãoḍi do pitạl reakʼ kuṭhạ sudhạ pitạl reakʼ ponea caka tahẽkana. Ar gamla doṛomokʼ lạgitʼ pon konare pitạl reakʼ ponea ṭibhi tahẽkana. Ona hõ bahako lekage noksa akawatʼ tahẽkana.

³¹ Gamla dohoy reakʼ binḍire do mitʼṭecʼ gulạnḍge phaelao jaega tahẽkana. Ona phaelao jaega reakʼ jokha do hoyokʼkana mitʼ moka tala. Ona phaelao jaega do beṛhaete rokʼ akatʼ goṛhonakʼ tahẽkana. Ar gamla do ona phaelao jaegareko bạisạuketʼ khan binḍi khon gamla reakʼ usul do mitʼ moka hoyena. Gaṛsãoḍi reakʼ patko do gulạnḍ baṅ, menkhan ponkona tahẽkana.

³² Patko latarre do ponea caka tahẽkana ar caka reakʼ kuṭhạko do gaṛsãoḍi sãote joṛạo mitʼakan tahẽkana. Ar mimitʼ goṭecʼ caka do mitʼ moka tala kate usul tahẽkana.

³³ Cakako do rãt gạḍi reakʼ caka lekage tahẽkana; kuṭhạ, caka reakʼ beṛ, sik ar tala reakʼ bukạtetʼ jotoge dulakʼ tahẽkana.

³⁴ Mimitʼ gaṛsãoḍi reakʼ pon konare ponea ganḍo tahẽkana.

³⁵ Gaṛsãoḍi cetanre pitạlte benaoakʼ tala moka mitʼṭecʼ gulạnḍge jinis tahẽkana.

³⁶ Ona gulạnḍakʼ jinis reakʼ bahre secʼ do hạṭiń, hạṭiń Kerub, dhạcri kul ar khijur dareko reakʼ muṭhạnko rokʼ goṛhon akatʼ tahẽkana. Mimitʼ hạṭiń reakʼ phakre do ṭibhi khunṭiko tahẽkana, ar ona ṭibhiko cetanre do baha leka noksako benao tahẽkana. Ona gulạnḍakʼ jinis do gaṛsãoḍi sãotege benao hoylena.

³⁷ Nonkate uni do gel goṭecʼ gaṛsãoḍiye benaokeda. Onako do mitʼ chãcrege dul hoylena ar ona reakʼ jokha ar muṭhạn do mitʼ lekage tahẽkana.

³⁸ Uni do mimitʼ gaṛsãoḍiko lạgitʼ mitʼṭecʼ kate pitạl reakʼ gel goṭecʼ gamlae benao ocokeda. Mimitʼ gamla reakʼ beṛ do pon moka osar tahẽkana ar onare irạl sae irạl gel liṭar dakʼ sahobokʼkan tahẽkana.

³⁹ Uni do mundil oṛakʼ reakʼ dạkhin secʼ mõṛẽ goṭecʼ ar utạr secʼ mõṛẽ goṭecʼ gaṛsãoḍiye dohokeda; ar dạkhin purub konare do mitʼṭecʼ maraṅ okocʼ gamlae dohokeda.

Mundil reakʼ asbabko

⁴⁰ Ona chaḍa uni do eṭakʼ eṭakʼ bhajanko, bạṭiko ar kạ̃ṛchuko hõe benaokeda. Nonkate Hiram do Probhu Isorakʼ oṛakʼ lạgitʼ Solomon raj hotete okako kạmiye ehopʼletʼ onae sạtkeda. Onako do hoyokʼkana:

⁴¹ Barea kham khunṭi, ar onakin cetan reakʼ gulạnḍge barea muthni, ar ona muthni cetanre sajaokʼ lạgitʼ banar sạr noksa akatʼ uńakʼ sikṛiko;

⁴² Ona sikṛiko lạgitʼ pon sae dạlim jo ar tham khunṭi muthni reakʼ chatna sajao lạgitʼ mimitʼ sạr sikṛi lạgitʼ bar sạr ḍạlim jo;

⁴³ gel goṭecʼ gaṛsãoḍi ar gel goṭecʼ gamla;

⁴⁴ maraṅ okocʼ karahe ar ona latarren gelbar goṭen ḍaṅgrako;

⁴⁵ torocʼ karaheko, kạ̃ṛchuko ar bạṭiko. Hirạm do Solomon rajakʼ hukumte Probhu Isorakʼ oṛakʼ lạgitʼ okako jiniskoe benaoletʼ ona do jhak jhak pitạl reakʼ tahẽkana.

⁴⁶ Jordan reakʼ bilạn ṭạnḍire Sukot ar Sorethan tala reakʼ mitʼ jaegare raj do noako jinis ot reakʼ chãcreye dul benao ocoleda.

⁴⁷ Jinisko lekhate nunạkʼ ḍher tahẽkana, Solomon do onako bae soṅ ocoleda; onate pitạl reakʼ ojon do baṅ baḍaelena.

⁴⁸ Probhu Isorakʼ oṛakʼ reakʼ okako jinis Solomon raje benao ocoletʼ ona do hoyokʼkana: Sona reakʼ pinḍ, samaṅakʼ piṭhạ dohowakʼ sona reakʼ ṭebil;

⁴⁹ khạṭi sona reakʼ diuhe dohowakʼ ar onako do sonot utạrakʼ jaegare tahẽkana, jojomsa aṛere mõṛẽ goṭecʼ ar leṅgasa aṛere mõṛẽ goṭecʼ; sona reakʼ baha, diuhe ar cimtạ;

⁵⁰ khạṭi sona reakʼ bạṭiko, sultạ saphae reakʼ cimṭạko, bạṭiko, kạ̃ṛchuko ar seṅgel aṅgra dohoy reakʼ celaṅko ar bhitri kandha reakʼ, metakʼme sonot utạrakʼ duạr lạgitʼ ar mundil oṛakʼ reakʼ maraṅ kandha reakʼ duạr lạgitʼ sona reakʼ kobjako.

⁵¹ Nonkate solomon raj do Probhu Isorakʼ oṛakʼ reakʼ sanamakʼe kạmi sạtkeda. Ona tayom uni do acʼren apat Dạud okako jinis Probhu Isor ńutumteye begar doholetʼ onakoe ạgukeda. Onako modre do sona, rupạ ar eṭakʼ eṭakʼ bhajanko tahẽkana. Ar uni do Probhu Isorakʼ oṛakʼ reakʼ khajańci kandhare onakoe dohokeda.