1 Rapajko 6 - সান্তালী বাইবেল

Mundil benaokʼkan

¹ Misor disạm khon Israelkoko oḍok hecʼen tayom ponsae irạl gelakʼ bochorre Israelko cetanre Solomonakʼ rajokʼ ponakʼ bochor reakʼ Sib candore, metakʼme dosar candore Solomon do Probhu Isorakʼ oṛakʼ benaoe ehopʼena.

² Solomon raj do Probhu Isor lạgitʼ oka oṛakʼe benaoletʼ ona do jeleńte turuigel moka, osarte bargel moka ar usulte pegel moka tahẽkana.

³ Mundil reakʼ asolakʼ kandha samaṅre okaṭakʼ pinḍạ tahẽkan ona do oṛakʼ reakʼ jokha lekate bargel moka osar ar oṛakʼ samaṅ secʼ khon ona reakʼ jeleńtetʼ do gel moka tahẽkana.

⁴ Oṛakʼ reakʼ bhitko lạgitʼ do uricʼ batakoanakʼ khiṛkiye benaoada.

⁵ Ar asolakʼ kandha ar sonot utạrakʼ ṭhạ̃i reakʼ pe aṛe bhit jalatʼte pe mahla mitʼṭecʼ oṛakʼe benaokeda. Ar onare ạḍi utạr khuṛpikoe dohokeda.

⁶ Latar mahla reakʼ kandhako do mõṛẽ moka osar, ar dosar mahla reakʼ kandhako do turui moka osar ar tesar mahla reakʼ kandhako do eae moka kate osar tahẽkana, ente mundil oṛakʼ bhit reakʼ bahre secʼ doe khap akawatʼ tahẽkana. Onate ona pe mahla oṛakʼ benao lạgitʼ mundil reakʼ bhitre jãhãn saṅghako lagao do jạṛuṛ baṅ hoylena.

⁷ Khạdre okako dhiri lakʼ rokʼkate benao hoylen eken onage ạgukate mundil oṛakʼ benaoreko beoharkeda. Ar mundil oṛakʼ tinreko bekʼnaokan tahẽkana unre onḍe do jãhãn kuṭạsi, se ṭeṅgocʼ se jãhãn mẽṛhẽtʼ reakʼ saḍege baṅ ańjomlena.

⁸ Latar mahlate bolokʼ reakʼ duạr do mundil oṛakʼ reakʼ dạkhin secʼre tahẽkana; ar onḍe khon mitʼṭecʼ siṛhi do bar mahla ar ona tayom do pe mahla hạbicʼ rakapʼ akana.

⁹ Nonkate uni do mundil oṛakʼe benaokeda ar sạt hõe sạtkeda. Uni do saṅgha ar debdạru reakʼ kaṭte ona reakʼ chat hõe dapʼkeda.

¹⁰ Mundil oṛakʼ reakʼ pe aṛege uni do thoṛa kandhakoe benao ocokeda. Ona kandhako reakʼ usultetʼ do mõṛẽ moka tahẽkana ar debdạru kaṭ reakʼ saṅghate chate benao ocokeda. Ona saṅgha reakʼ mitʼ secʼ do mundil oṛakʼ bhit reakʼ khap cetanre dohoyena.

¹¹ Probhu Isorakʼ katha do Solomon ṭhen niạge roṛlena,

¹² “Ińakʼ katha lekam senokʼ, ar ińakʼ niạmkom pańjae ar ińakʼ sanam hukumko taberem tahen enḍekhan okaṭakʼ mundilem benaoetʼkan ona reaṅ amren ạpum ṭhen okań gokʼletʼ ona do am hoteteń purạua.

¹³ Ar Israelko talareń girobasokʼa ar ińren hoṛ Israelko do bạń bạgi giḍikoa.”

¹⁴ Solomon do nonkate mundil oṛakʼe benao sạtkeda.

Mundil bhitri saj reakʼ kạmiko

¹⁵ Ot khon chat hạbicʼ uni do debdạru kaṭ reakʼ toktate pạcri reakʼ bhitri secʼe esetʼkeda ar ot do saro kaṭ reakʼ toktateye esetʼkeda.

¹⁶ Mundil oṛakʼre sonot utạrakʼ ṭhạ̃i ńutumanakʼ mitʼṭecʼ bhitri kandha benao lạgitʼ uni do mundil oṛakʼ reakʼ tayom secʼre bargel moka jaega do ot khon chad hạbicʼ debdạru kaṭteye begarkeda.

¹⁷ Sonot utạrakʼ ṭhạ̃i samaṅ reakʼ asolakʼ maraṅ kandha do pongel moka jeleń tahẽkana.

¹⁸ Mundil oṛakʼ tala reakʼ debdạru kaṭ cetanre do nạ̃ṛĩ dare reakʼ jo ar saṛ baha reakʼ muṭhạnkoe rokʼ ocoakatʼ tahẽkana. Onako jotowakʼge debdạru kaṭ reakʼ tahẽkana, menkhan jãhãn dhiri do baṅ ńel ńamlena.

¹⁹ Mundil oṛakʼ talare Probhu Isorakʼ bondobos sinduk dohoy lạgitʼ Solomon do nonkan sonot utạrakʼ ṭhạ̃iye benaokeda.

²⁰ Ona ṭhạ̃i do bargel moka jeleń, bargel moka osar ar bargel moka usul tahẽkana. Uni do khạṭi sonate ona reakʼ bhitri secʼe tol ocokeda ar pinḍ hõ debdạru kaṭteye esetʼkeda.

²¹ Mundil oṛakʼ reakʼ asolakʼ kandha reakʼ bhit hõ uni do sonateye esetʼ ocokeda ar sonot utạrakʼ ṭhạ̃i samaṅre sona reakʼ sikṛiye lagaoada. Ona sonot utạrakʼ ṭhạ̃i reakʼ bhit hõ sonateye esetʼkeda.

²² Mundil oṛakʼ reakʼ bhitri secʼ uni do goṭage sonateye tolkeda, Ar sonot utạrakʼ ṭhạ̃i reakʼ pinḍ hõ sonateye tolkeda.

^23-26 Ar sonot utạrakʼ ṭhạ̃ire uni do jạitun kaṭren mitʼ joṛ Kerube benaoketʼkinạ. Unkin Kerubkinakʼ goṛhon ar muṭhạn do mitʼge tahẽkana. Ar unkin Kerub do gel moka kate usulkin tahẽkana. Kerubkinakʼ banar phạ̃kṛạ̃kʼ do mõṛẽ moka kate jeleń tahẽkan tạkina. Mitʼ phạ̃kṛạ̃kʼ reakʼ mucạtʼ khon dosar phạ̃kṛạ̃kʼ reakʼ mucạtʼ hạbicʼ do gel moka tahẽkana.

²⁷ Sonot utạrakʼ ṭhạ̃ire uni do Kerubkinakʼ phạ̃kṛạ̃kʼ do laplapageye dohokatʼ tạkina. Mitʼṭecʼ Kerubakʼ phạ̃kṛạ̃kʼ do mitʼṭecʼ bhitre ar eṭagicʼ Kerubakʼ phạ̃kṛạ̃kʼ do eṭakʼ bhite joṭetʼ tiyokʼ akatʼ tahẽkana ar oṛakʼ talare unkinakʼ eṭakʼ phạ̃kṛạ̃kʼkin do apan ạpin phạ̃kṛạ̃kʼ reakʼ agaltetʼkin jopokʼ tiyokʼ akatʼ tahẽkana.

²⁸ Ar Kerubkin banarge sonateye tol esetʼkatʼkinạ.

²⁹ Mundil oṛakʼ reakʼ barea kandha reakʼ goṭa bhitge Kerub, khijur dare ar saṛ bahako reakʼ muṭhạnkoe rokʼ ocoakatʼ tahẽkana.

³⁰ Ar banar kandha reakʼ ot hõ sonateye tol ocokeda.

³¹ Sonot utạrakʼ ṭhạ̃i reakʼ silpiń do jạitun kaṭteye benao ocokeda. Ar ona duạr reakʼ cetan ganaḍe ar dene banar cạukạṭ do mõṛẽ poholanakʼ tahẽkana.

³² Banar kapaṭre uni do Kerub, khijur dare ar saṛ bahako reakʼ muṭhạnkoe goṛhonada ar sonateye tol ocokeda ar unkin Kerubkin ar khijur darekore hõ sonageye kuṭạm bạisạuada.

^33-34 Asolakʼ kandha reakʼ duạr lạgitʼ do jạitun reakʼ kaṭte mitʼṭecʼ pon kona cạukaṭgeye benaoada ar saro kaṭte do barea silpińe benao ocokeda. Ar kobja lagao akatʼ barea toktate mimitʼ kapaṭko do benao hoyena. Onate kapaṭ do lạṭumokʼkan tahẽkana.

³⁵ Ona kapaṭko cetanre uni do Kerubko, khijur dare ar saṛ baha reakʼ muṭhạn rokʼkate sona reakʼ pate bạisạuada.

³⁶ Ar napaete la-getʼakatʼ pe sạr reakʼ dhiri ar debdạru dare reakʼ mitʼ sạr reakʼ moṭa kaṭte do bhitri raca reakʼ beṛhaeteakʼ bhitkoe benaokeda.

³⁷ Probhu Isorakʼ oṛakʼ do Ponakʼ bochor reakʼ Sib candore rehetʼ bạisạulena.

³⁸ Goṭawakʼ lekate mundil oṛakʼ reakʼ sanamakʼ kạmi do gelmitʼ bochor reakʼ Bul cando, metakʼme irạlakʼ candore sạt utạrena. Solomon do niạ mundil benao sạtte eae bochor lagaoade tahẽkana.