1 Rapajko 5 - সান্তালী বাইবেল

Solomon do mundil benao lạgitʼe sapṛaokʼkan

¹ Turren raj Hiram do tinreye ańjomkeda, Solomon do acʼ apatakʼ jaegare raj hudạreye ojokʼ bahal ocoakana unre uni do Solomon ṭhen acʼren hoṛkoe kolkatʼkoa, ente Dạud tulucʼ uni do gate peṛa leka jopoṛao tahẽkantaea.

² Solomon do Hiram ṭhen kathae roṛ gotʼkada,

³ “Baḍaegeam ińren ạpuń Dạud do beṛhaeten bạiriko tulucʼe lạṛhạikan tahẽkana, ar Probhu Isor do uniren bạiriko ạuriye jaṅga latarko hạbicʼ uni do acʼren Probhu Isor ńutumte jãhãn dewa sewa oṛakʼ bae benao akatʼ tahẽkana.

⁴ Menkhan ńitokʼ ińren Probhu Isor do joto secʼ khon sulukteye dohoakadińạ. Ar ńitokʼ do cele bạirige bạnukʼkotińa ar jãhãn ghoṭna hõ baṅ hoyakana.

⁵ Ona iạte iń do ińren Probhu Isor ńutumte mitʼṭecʼ mundil iń benaoa. Probhu Isor do ińren ạpuńe metade tahẽkana, ‘amren okoeṭakʼ hopon do amakʼ siṅghạsonreń duṛube unige iń lạgitʼ mitʼṭecʼ mundile benaoa.’

⁶ “Onate hukum emokʼme iń lạgitʼ Lebanon disạm khon debdạru dareko jemon makʼ ạgukʼ. Ińren hoṛ hõ amren hoṛko sãoteko tahena ar am cetʼleka mujurim ṭhik dohoako onkage iń do amren hoṛkoń emakoa. Entem baḍaegea Sidonrenko do dare makʼ ar gegetʼreko gạkhuṛgea.”

⁷ Hiram do Solomon ṭhen khon niạ katha ańjomkate ạḍi kusiyenteye menkeda, “Teheń do Probhu Isorakʼge sarhao hoyokʼtaema, ente noko maraṅ jạtrenko cetanre rajokʼ lạgitʼ Dạud do nonkan mitʼṭecʼ ạkilan hopone dan akawadea.”

⁸ Hiram do Solomon noa khobore kol ruạṛadea, “Amem kol akatʼ khobor doń ńamakada. Debdạru ar saro kaṭ reaṅ do amakʼ joto monsubạgeń purạutama.

⁹ Ińren hoṛko do Lebanon khon jalapurite onako pheḍ ạguya. Ar ona tayom do onakote bhora benaokate jalapuri cetante amakʼ nirik akatʼ ṭhạ̃iteko idi seṭergotʼama. Onko do onḍeko raṛa pheḍa ar am do onakom idijoṅa. Ar ińakʼ khojogokʼakʼ do noage ińren kạmiyạko jemon jomakʼem bebostawako.

¹⁰ Nonkate Hiram do Solomon jạṛuṛae bhor debdạru kaṭ ar saro kaṭkoe emadea,

¹¹ Ar Solomon hõ Hiram ar uniyakʼ oṛakʼren hoṛkoakʼ jomakʼ lạgitʼ pe hajar turui sae ṭon guhum ar pon hajar irạl sae liṭar jạitun reakʼ sunume emadea. Nonkage Solomon do bochorke bochor onae emadea.

¹² Probhu Isor do acʼakʼ gokʼakʼ leka Solomon ạkile emadea. Solomon ar Hiram talare do suluk tahẽkana ar unkin do mitʼṭecʼ bondoboskin bandhaoana.

¹³ Solomon raj do goṭa Israel khon pegel hajar hoṛ kạmireye jormoṭketʼkoa.

¹⁴ Ar jao cando uni do pạli pạlite onko mod khon gel hajar hoṛ Lebanonteye koletʼko tahẽkana. Onko do Lebanonre mitʼ cando ar akoakʼ oṛakʼre bar candokateko tahẽnkan tahẽkana. Onkoakʼ noako kạmi ńel todarot reakʼ bhar do Adoniram cetanre tahẽkana.

¹⁵ Solomon tabere do eaegel hajar gokʼ bhạriạkoko tahẽkana ar buru khon dhiri la ạgui lạgitʼ do irạlgel hajar hoṛko tahẽkana.

¹⁶ Ar onkoakʼ kạmiko ńel todarot lạgitʼ do pe hajar pe sae kạmiyạkoko tahẽkana.

¹⁷ Mundil oṛakʼ reakʼ rehetʼ gathao lạgitʼ onko do rajakʼ hukumte ghaḍlakʼ khon maraṅ maraṅ damanakʼ dhiriko la ạguiyetʼ tahẽkana.

¹⁸ Solomon ar Hiramren mistriko ar Gibearenko do ona dhiriko getʼkate mundil oṛakʼ benao lạgitʼ kaṭ ar dhiriko sapṛaoetʼ tahẽkana.