1 Rapajko 4 - সান্তালী বাইবেল

Solomonren kạmiyạko

¹ Solomon raj do goṭa Israelko cetanre rajokʼe ehopʼena.

² Uniren maraṅ kạmiyạko doko hoyokʼkana: Sadokren hopon Asriạ nui do rajren sosolhayicʼ naekeye tahẽkana.

³ Sisraren banar hopon Elihoreph ar Ahiạ do rajren olokʼ hoṛ kin tahẽkana; Ahiludren hopon Jehosaphat do Itihãs olokʼicʼe tahẽkana;

⁴ Jehuyadaren hopon Banae do maraṅ senaputiye tahẽkana; Sadok ar Abiạthar do naeke kin tahẽkana;

⁵ Nathanren hopon Asriạ do eṭakʼ eṭakʼ raj karbariạko cetanreye tahẽkana; Nathanren hopon Sabud do rajren gate ar sosolhayicʼe tahẽkana;

⁶ Ahisar cetanre do raj doṅgol ńel todarot reakʼ bhar tahẽkana; Abdaren hopon Adoniram do kạmiyạ hoṛko cetanren sordare tahẽkana.

⁷ Solomon do sanam Israelko cetanre gelbar goṭen cakʼlaokoe bahalketʼkoa. Onko do raj ar raj gharońjrenko lạgitʼ jomakʼko juṛạuetʼ tahẽkana. Onko mimitʼko do bochorre mitʼ candokate jomakʼko jogaṛ akokan tahẽkana.

⁸ Onkoakʼ ńutum do hoyokʼkana: Ephrayim buru ṭoṭharen Ben-Hur.

⁹ Makas, Salbim, Bet-Semes ar Elon-Beth-Hanonren Bin-Deker.

¹⁰ Arubothre, Sekhore ar Hepher reakʼ sanam ṭoṭhare do Bin-Hesed cetanre tahẽkana.

¹¹ Naphat-Dorrer reakʼ sanam ṭoṭhare do Bin-Abinadab. Uni do Solomonren hoponera Taphate baplaledea.

¹² Tanakre, Megidore ar Sorethan ṭhen ar Jesreyel dạkhin reakʼ Bet-San nagraha khon Abel Mehola ar Jokmea hạbicʼ Bet-San reakʼ sanam ṭoṭhare do Ahiludren hopon Bana cetanre tahẽkana.

¹³ Ramot Geliadre do Bin-Geber. Uni do Geliad Manasiren hopon Jayir reakʼ sanam ato ar Bason reakʼ Argab ṭoṭharen cakʼlaoicʼe tahẽkana. Argab ṭoṭha do pạcrite esetʼ ṭoṭha tahẽkana ar Rupạ reakʼ hurkạṛakʼ duạr sudhạ maraṅ maraṅ turuigel goṭecʼ atokoge.

¹⁴ Mohaniyamre do Ediren hopon Ahinadab.

¹⁵ Naptalire do Ahimas. Uni do Solomonren hoponera Basomate baplaledea.

¹⁶ Aser ar Bealotre do Hasae hopon Banae.

¹⁷ Isakarre do Parua hopon Jehosaphat.

¹⁸ Benjạminre do Elaren hopon Simiyi.

¹⁹ Geliadre, metakʼme Emorikoren Sihon raj ar Basonren raj Ogakʼ disạmre do Uri hopon Geber. Niạ ṭoṭhare do unige acʼ eskar cakʼlaoyicʼe tahẽkana.

Raj oṛakʼre dinạm hilokʼ reakʼ jomakʼ

²⁰ Jihudạ ar Israelkoakʼ lekha do jalapuri aṛe reakʼ gitil leka tahẽkana. Ar ạḍi sukre tahẽkate onko do dinko khemaoetʼ tahẽkana.

²¹ Phurạt gaḍa khon ehopʼkate Misor ar Philisṭikoakʼ disạm reakʼ simạ hạbicʼ sanam rajosṭiko do Solomonakʼ gobolrege tahẽkana. Solomon tinạkʼ din jiwetʼe tahẽkan unạkʼ dinge niạko disạmren hoṛko do bhejako emaekan tahẽkana ar uni gobolreko tahẽkana.

²² Solomon lạgitʼ dinạm hilokʼ okako jomakʼ jạruṛokʼkan tahẽkan ona do nonka leka: mõṛẽ ṭon tala holoṅ, gelmitʼ ṭon suji,

²³ gel goṭen posao ḍaṅgra, ạtiń ṭạnḍiren bargel ḍaṅgra ar mitʼsae bhiḍiko; ona chaḍa jhaṅkar jel, selepʼ jel, ṭiklạkʼ jel, lodgopʼ lodgopʼ sim-geḍeko.

²⁴ Solomon do Phurạt gaḍa pạchim secʼ reakʼ sanam rajosṭiko, metatʼme Tipsa khon Gasa hạbicʼe rajokʼkan tahẽkana ar uniyakʼ rajosṭi reakʼ sanam jaegakore do suluk tahẽkana.

²⁵ Solomonakʼ jionre Jihudạ ar Israel, metakʼme, Dan khon Berseba hạbicʼ sanamkoge apan ạpin darkha nạ̃ṛĩ ar loa dareko tahẽkana ar onko do khạtirjomako girobasokʼ kan tahẽkana.

²⁶ Solomonakʼ rãt gạḍi lạgitʼ do pongel hajar oṛakʼ ar gelbar hajar aswariko tahẽkana.

²⁷ Disạm cakʼlaoko do akoakʼ pạli reakʼ candore Solomon raj ar uniyakʼ ṭebilre okoeko jometʼkan tahẽkan onko sanamko lạgitʼ jomakʼko jogaṛetʼ tahẽkana. Arko ńel todarotetʼ tahẽkana jemon okaṭakʼ reakʼ hõ uniyakʼ ṭonṭa alo hoyokʼtae.

²⁸ Rãt gạḍiren sadomko ar eṭakʼ sadomko lạgitʼ onkoren mitʼke mitʼ kạmi reakʼ bhar lekate onko do Jao ar busupʼko ạguiyetʼ tahẽkana.

Solomonakʼ ạkil

²⁹ Isor do jalapuri aṛe reakʼ gitil leka asambheṛ bud ạkil ar bicạr chinḍạu ar bujhạu reakʼ daṛe Solomone danadea.

³⁰ Purub disạm ar Misorren sanam ạkilan hoṛko khon Solomonakʼ ạkil do ḍherge tahẽkana.

³¹ Sanam hoṛko khon, se Esraeren Ethon ar Mahalelren hopon Hemen, Kolkol ar Dorda khon hõ ḍher ạkilane tahẽkana. Uniyakʼ ńutum do aḍepase sanam jạtrenko talare pasnao idiyentaea.

³² Uni do pe hajar kạhtukkoe ol akada ar mitʼ hajar mõṛẽ goṭecʼ sereńe joṛao akada.

³³ Uni do Lebanon reakʼ debdạru dare khon ehopʼkate bhitre janamokʼ ghãs hạbicʼ sanam dare reakʼe biborone lại akada. Uni do janwarko, cẽṛẽko, leńokʼ ṭunḍaṅkan jiwiyanko ar hakoko reaṅe lại akada.

³⁴ Dhạrtiren okoeko raj do Solomonakʼ ạkil reaṅko ańjomakatʼ tahẽkan onko do uniyakʼ ạkil reakʼ katha ańjom lạgitʼ akoren hoṛko koletʼko tahẽkana. Ar nonkate sanam jạtren hoṛ do uni ṭhenko hijukʼkan tahẽkana.