1 Rapajko 3 - সান্তালী বাইবেল

Ạkil ńam lạgitʼ Solomonakʼ koejoṅ

¹ Solomon do Misorren raj Pharaoren hoponerae baplakedete uni tulucʼ gatekʼ reakʼe ehopʼkeda. Solomonakʼ raj gaṛ, Probhu Isorakʼ oṛakʼ ar Jerusalem beṛhaete pạcri ạuriye sạt hạbicʼ acʼren bạhu do Dạudakʼ nagrahareye dohokedea.

² Ar hoṛko do unrehõ than boṭkocʼkore akoren janwarkoko dãṛẽyetʼko tahẽkana, ente un hạbicʼ hõ Probhu Isor dewa sewawae lạgitʼ jãhãn oṛakʼ hõ baṅ benao akan tahẽkana.

³ Solomon do Probhu Isore dulạṛedekan tahẽkana, onate acʼren apattetʼ Dạudakʼ hukum lekageye senokʼkan tahẽkana; menkhan uni do than boṭkocʼkore janwarkoe dãṛẽyetʼko tahẽkana ar dhupe jeretʼetʼ tahẽkana.

⁴ Mitʼdin raj do janwar samaṅko lạgitʼ Gibeonteye senlena, ente dãṛẽ samaṅko lạgitʼ onḍenakʼ than boṭkocʼge maraṅ utạrakʼ tahẽkana. Ar Solomon do onḍe mitʼ hajar janwarkote jeredokʼ samaṅokʼakʼe samaṅkeda.

⁵ Gibeonre ńindạ jokhecʼ Probhu Isor do kukmũ talate Solomon ṭhene sodorena. Isor do uniye metadea, “Iń ṭhen okam khoj ona reakʼ jotowakʼge amiń emama.”

⁶ Unre Solomone roṛ ruạṛkeda, “Ińren ạpuń amren guti do ḍher pạtiạrem udukʼ akadea, ente uni do amre pạtiạre tahẽkana ar dhorom ar soṛageye tahẽkana. Teheń siṅghạsonre duṛupʼ lạgitʼ am do mitʼṭen hoponem emakawadea ar nonkate amakʼ asambheṛ pạtiạrem udukʼae kana.

⁷ “E ińren Probhu Isor, ińren ạpuń Dạudakʼ jaegare ńitokʼ do amren guti rajem hoyoco akadea. Menkhan ińakʼ umer do komgea, onate bạń baḍaea cetʼ lekate ińakʼ dạyikiń palona.

⁸ Ar amren guti do nonḍe amem bachao akawan hoṛko talarege menaea. Ar onko do nonkan mitʼṭecʼ maraṅ jạtren kanako, one onko do ohoko lekha caba daṛelen.

⁹ Onate amren hoṛko ḍanṭaoko lạgitʼ okaṭakʼ ṭhik ar okaṭakʼ do bhul kan ona baḍae lạgitʼ amren gutiyakʼ ontorre bujhạu lạgitʼ daṛe emaeme; ente amren noko maraṅ jạtrenko ḍanṭaoko reakʼ daṛe do okoeyakʼ menakʼa?”

¹⁰ Solomon noae khojketʼte Probhu Isor do ạḍiye kusiyena.

¹¹ Isor do uniye metadea, “Am do ḍher din bahaokʼ reakʼ, se am lạgitʼ dhon-durib, se amren bạirikoakʼ gujukʼ hõ bam khojlakʼa menkhan mońjte bicạr chinḍạu reakʼ bujgem khojakada,

¹² Onate am okaṭakʼem khojakatʼ onageń emama. Iń do amakʼ ontorre nonkan ạkil ar bud bicạr reakʼ daṛeń emama ńelme noa lahare nonka do celege bako tahẽkana ar tayomte hõ onka do ar bako hoyokʼa.

¹³ Ona chaḍa am oka bam koeyakatʼ ona hõń emam kana. Iń do nonkan dhon-durib ar manotiń emama one am lahaten cele rajakʼge baṅ tahẽkan ar am tayom hõ baṅ tahentakoa.”

¹⁴ Amren ạpum Dạud leka ińakʼ sanam niạm ar hukumkom manao idi ar ińakʼ hortem taṛam enḍekhan ḍher diniń bahao ocomea.”

¹⁵ Inạ tayom Solomon doe ebhenena are bujhạukeda, uni doe kukmũkan tahẽkana. Tayomte Solomon do Jerusalemteye ruạṛ calaoena ar Probhu Isorakʼ goha tạmbu samaṅreye teṅgoyena ar ạḍi utạr janwarkote jeredokʼ samaṅokʼakʼ ar sulukren samaṅokʼakʼe samaṅkeda. Ar ona tayom do acʼren sanam kạmiyạko lạgitʼ mitʼṭecʼe bhojkeda.

Solomonakʼ ạkilanakʼ bicạr

¹⁶ Mitʼdin barea kusumbi maejiu do raj ṭhenkin hecʼena.

¹⁷ Unkin modre mitʼ hoṛ doe menkeda, “E ińren mạlik, ạliń do mitʼ oṛakʼrege liń tahẽnkana. Ar onḍe liń tahẽkanre ińren do mitʼṭen koṛa gidrạń janamkedea.

¹⁸ Ińren gidrạwakʼ janam pe din tayom nui maejiuren hõ mitʼṭen koṛa gidrại hoyentaea. Ona oṛakʼre do ar celege bako tahẽkana, eken ạliń bar hoṛge liń tahẽkana.

¹⁹ Ńindạ jokhecʼ nui maejiu do acʼren gidrại ten gocʼkedetaea.

²⁰ Ar tala ńindạ amren kạ̃ṛmĩ do tinreń jạpitʼ akatʼ tahẽkana, unre uni do beretʼkate ińren gidrạ hataokate acʼakʼ hạmbutʼreye dohokedea ar acʼren gocʼicʼ gidrạ do ińakʼ hạmbutʼreye doho oṭokadea.

²¹ Ado ạuri aṅga marsalokʼre ińren gidrạ do toa nunuwae lạgitʼ iń beretʼen khan gidrạ do gocʼgeń ńelkedea. Ar setakʼ marsalen khan mońjteń ńelkedea uni do ińren gidrạ doe baṅkana.”

²² Unre eṭakʼ maejiu doe menkeda, “Baṅ, baṅ, jiwetʼ gidrạ doe ińren kana ar gocʼicʼ do uniren.” Menkhan pạhilicʼ maejiu do ạḍi murukteye menkeda, “Baṅa, gocʼicʼ doe amren kana ar jiwetʼicʼ doe ińren kana. Nonkate unkin do raj samaṅrege jhogṛakʼ kin ehopʼena.

²³ Raje metatʼkinạ, “Nuiye meneda, ‘ińren gidrạ doe jiwetʼgea.’ Ar hạni hõe meneda, ‘baṅa, amren gidrạ doe gocʼgea ar ińren doe jiwetʼicʼ kana.’ ”

²⁴ Unre raje menkeda, “Mitʼṭecʼ tarwaṛe ạguwạńpe.” Ar raj do mitʼṭecʼ tarwaṛeko ạguadea.

²⁵ Uni doe hukumkeda, “Jiwetʼicʼ gidrạ do talate paṛagepe ar nukin hạṭiń ạkinpe.”

²⁶ Ado okoeren gidrạ jiwetʼgeye tahẽkan uni do gidrạ lạgitʼ mon khad badaoentaete raje metadea, “E ińren mạlik, nehõram kạnạń, gidrạ do alogem gojea; unige emaeme baṛe.” Menkhan eṭakʼ maejiu doe menkeda, “Uni do ińren hõ baṅ ar amren hõ aloe hoyokʼma. Uni do talate paṛage hoyokʼa.”

²⁷ Unre raj doe hukumkeda, “Jiwetʼicʼ gidrạ do pạhilicʼ maejiu emaepe. Ar alope paṛagea; ente uni kangeae uniren eṅgattetʼ do. ”

²⁸ Rajakʼ bicạr ańjomkate Israelren sanamkoakʼ monre raj cetanre botor caṛhaoena, ente onkoko ńelkeda, bicạr chinḍạu lạgitʼ Isor do monre ạkile emakawadea.