1 Rapajko 2 - সান্তালী বাইবেল

Solomon lạgitʼ Dạudakʼ mucạtʼ sikhạuna

¹ Dạudakʼ gujukʼ okte sor hecʼentae khan uni do acʼren hopon Solomon noako sikhạuna emadeteye metadea,

² “Dhạrtiren sanamko okaṭakʼ horte calakʼ hoyokʼtako iń hõ ńitokʼ do ona hortegeń mohnḍa akana. Onate am do keṭejokʼme, ar mitʼṭen keṭecʼ herel hopon leka udugokʼme.

³ Amren Probhu Isorakʼ sanaleka uniyakʼ horte calakʼme ar Moseyakʼ ạn-ạrire ol akan Probhu Isorakʼ joto niạmko, hukumko, sopolhako ar gohawakʼkom dohoya. Nonkate jãhãnakʼgem kạmi ar jãhãtegem calakʼ onḍegem jo bahakʼa.

⁴ Enḍekhan Probhu Isor do iń ṭhen okae gokʼakatʼ ona sanamakʼe purạua. Ona gokʼakʼ do hoyokʼkana, ‘amren bõsko goṭa monte pạtiạr salakʼ iń samaṅre taṛam lạgitʼ sontorte akoakʼ jionko khemao enḍekhan Israelkoakʼ siṅghạsonre duṛubokʼ lạgitʼ amakʼ bõsre hoṛkoakʼ okulạn do baṅ hoyokʼa.’

⁵ “Seruyaren hopon Joab do iń lạgitʼ okaṭakʼe ceka akatʼ ar Israelren lạṛhại phạdkoren banar senaputi cetanre, metakʼme Nerren hopon Abner ar Jetherren hopon Amasa tạkin cetanre okae ceka akatʼ ona dom baḍaegea. Uni do unkine khũn akatʼkinạ, ar sulukokʼ oktere hõ uni do lạṛhại reakʼ dinko leka unkinakʼ mãyãme joro ocoakada ar ona mãyãm do uniyakʼ ḍanḍa totolakʼre ar jaṅga reakʼ panahere laṭkao akana.

⁶ Am do ạkil salakʼ kạmime, ar haṛam umerre uni do sulukte patal purite alom sen ocoaea.

⁷ Menkhan Geliad Barsilairen hoponko cetanre do pạtiạr baṛe tahenme. Ar am sãote amakʼ ṭebilre okoeko jom-ńũiyetʼkan onko talare onko hõ jaegam emakoa. Amren boeha Absalom ṭhen khoniń ńir paskaolen jokhecʼ onko do ạḍiko goṛowạdiń tahẽkana.

⁸ Disạime, Bahurimren Benjạmin gusṭiren Gera hopon Simai hõ am soṅgere menaea. Ar oka hilokʼ Mehaniạmteń senlen enhilokʼ uni do ạḍi bạṛicʼe sarapadiń tahẽkana. Jordanre iń tulucʼ ńapamokʼe hecʼlenre Probhu Isor ńutumteń kiriạlena, uni do bạń gojea.

⁹ Menkhan ńitokʼ do bin dusi mente alom hudisea. Am dom ạkilanicʼ kana; unire cetʼem cekaea ona do amge bhagem bujhạu daṛeakʼa. Uniyakʼ haṛam umerre mãyãmem joro ocoytaea ar patal puritem kolkaea.”

Dạudakʼ gujukʼ

¹⁰ Inạ tayom Dạud do acʼren hapṛamko ṭhene calaoena ar uni do Dạudakʼ nagrahareko topakedea.

¹¹ Uni do Israelko cetanre pongel bochor hạbicʼ raje tahẽkana ar eae bochor do Hebronre ar pegel pe bochor do Jerusalemre.

¹² Ar Solomon do apattetʼakʼ siṅghạsonreye duṛupʼena ar uniyakʼ rajosṭi do ạḍi kajakentaea.

Adoniạwakʼ gujukʼ

^13-14 Tayomte Hagitren hopon Adoniạ do Solomonren eṅgat Bethseba ṭhene senena. Bethaseba do uniye kulikedea, “Am do cetʼ sulukokʼ lạgitʼte nonḍem hecʼakana?” Uniye menkeda, “Hẽ, sulukokʼ lạgitʼgeń hecʼakana. Ińakʼ do am sãote thoṛa galmarao menakʼtińạ.” Bethsebae menkeda, “Ma roṛme.”

¹⁵ Unre uniye menkeda, “Am dom baḍaegea rajosṭi do ińakʼge tahẽkana. Ar Israelren sanamkogeko hudisetʼ tahẽkana ińge rajiń hoyokʼa mente. Menkhan bhạg bodolente rajosṭi do ińren boehawakʼ tire calaoena, ente ona do Probhu Isor ṭhen khongeye ńam akada.

¹⁶ Ńitokʼ am ṭhen ińakʼ mitʼṭecʼ nehõr joṅakʼ menakʼtińạ. Am do alogem ruạṛkạńạ.” Uniye metadea, “Ma roṛme.”

¹⁷ Unre uni do roroṛe ehopʼena, “Am do Solomon rajem metaea Sunemren Abisog do iń tulucʼ jemone baplaye. Uni do amakʼ kathae dohoya.”

¹⁸ Bethsebae roṛ ruạṛkeda, “Bhagegea, amakʼ katha do rajiń lạiyaea.”

¹⁹ Ado Bethseba tinre Adoniạwakʼ katha lại lạgitʼ Solomon raj ṭhene senena unre raj doe beretʼente uniye joharadea ar ona tayom do acʼakʼ siṅghạsonreye duṛupʼena. Raj do acʼ eṅgat lạgitʼ mitʼṭecʼ duṛupʼakʼe ạgu ocoketʼte acʼakʼ jojomsa aṛereye dohokeda ar eṅgattetʼ do onareye duṛupʼena.

²⁰ Bethsebae menkeda, “Mitʼṭecʼ huḍiń machań nehõrama; ar alogem ruạṛkạńạ.” Raje roṛ ruạṛkeda, “E Go, ma roṛme, iń do bạń ruạṛmea.”

²¹ Unre Bethsebae menkeda, “Amren boeha Adoniạ sãote Sunemren Abisegakʼ bapla hoyokʼma.”

²² Solomon do acʼren eṅgattetʼe metadea, “Adoniạ lạgitʼ Sunemrem Abisag do cedakʼem khojekana? Am do uni lạgitʼ rajosṭi hõm koe daṛekińạ, ente uni do ińren maraṅicʼ boeha kanae; hẽ ar uni lạgitʼ, naeke Abiạthar lạgitʼ ar Seruyaren hopon Joab lạgitʼ hõ onam koe daṛekińạ.”

²³ Inạ tayom Solomon raj do Probhu Isor ńutumte kiriạkateye menkeda, “Noa aroj lạgitʼ jodi Adoniạwakʼ jiwi baṅ hataokʼtae enḍekhan Probhu Isor do ińe sạjạyińma, ạḍi bạṛicʼ sạjạige.

²⁴ Okoe do ińren ạpuńakʼ siṅghạsonreye duṛupʼ akadińạ ar acʼakʼ gokʼakʼ lekate iń lạgitʼ mitʼṭen raj bõse teṅgo akawadiń uni jiwetʼ Probhu Isor ńutumte kiriạkateń meneda, teheńge Adoniạ doe gocʼ ocokʼa.”

²⁵ Ona tayom Solomon raj do Jehuyadaren hopon Banaeye hukumadea, ar Banae do Adoniại gocʼkedea.

Abiạtharakʼ ńurokʼ ar Joabakʼ gujukʼ

²⁶ Ona tayom raj do Abiạthare metadea, “Am do amakʼ jaega Anatholte ruạṛ calakʼme. Am do gocʼ ocokʼ lek kanam, menkhan ńitokʼ do bạń gocʼmea, ente ińren ạpuń Dạud oktere Probhu Isorakʼ sindukem gokʼ ạguleda ar iń ạpuńakʼ sanamakʼ duk ar kosṭoren bhạgiyạdarem hoylena.”

²⁷ Nonkate Solomon do Probhu Isorakʼ naeke hudạ khon Abiạthare ocokʼkedea. Probhu Isor do Silore Eliren bõs reaṅ okae menletʼ uniyakʼ ona katha do nonkage purạuena.

²⁸ Niạko khobor do Joabakʼ luturre seṭerena. Uni do Absalom secʼ bae tahẽkanre hõ Adoniạ secʼe tahẽkana, onate uni doe ńir paskaoente Probhu Isorakʼ tạmbure senkate pinḍ reakʼ dereńe sapʼ hapekeda.

²⁹ Solomon raj doe baḍae ocoyena je, Joab do ńir paskaoente Probhu Isorakʼ tạmbureye bolo akana ar pinḍ ṭhen menaea. Unre Solomon do Jehuyadaren hopon Banaeye hukumadea, “Am do senkate uni gojeme.”

³⁰ Onate Banae do Probhu Isorakʼ tạmbure bolokate Joabe metadea, “Raj do oḍok hijukʼ lạgitʼe hukum akada.” Menkhan Joabe menkeda, “Baṅ, iń do nonḍegeń gujukʼa.” Banae do ona khobor raje baḍae ocokedeteye menkeda, “Joab do noa roṛ ruạṛadińa.”

³¹ Unre raj do Banaeye hukumadea, “Uni okaṭakʼe menetʼkan onage onkaeme. Uni gocʼkate topakae me. Joab okoe bin dusạn hoṛkoakʼ mãyãme joro ocoakatʼ onako reakʼ dos do iń ar ińren ạpuńakʼ bõs khon nonkage ocokʼ giḍikakʼme.

³² Ar uni tinạkʼ mãyãme joro ocoakatʼ ona reakʼ do Probhu Isorgeye hala ruạṛaea, ente ińren ạpuń begor baḍae ocoyete uni do bar hoṛe gocʼketʼkinạ. Unkin do lạṛhại phạdkoren senaputi Nerren hopon Abner ar Jihudạ lạṛhại phạdkoren senaputi Jether ren hopon Amasa.

³³ Unkinakʼ mãyãm reakʼ dos do Joab ar uniyakʼ bõsren hoṛkoakʼ bohokʼ cetanre jaejug hạbicʼ tahenma. Menkhan Dạud ar uni bõsren hoṛko cetanre ar uniyakʼ gharońj ar uniyakʼ siṅghạson cetanre Probhu Isorakʼ sạjại do jaejug hạbicʼ tahenma.”

³⁴ Unre Jehuyadaren hopon Banae do senkate Joabe gocʼkedea. Ar hahaṅkar ṭoṭhare acʼakʼ oṛakʼreko topakadea.

³⁵ Unre raj do Joab bodolte Jehuyadaren hopon Banae do senaputiye bahalkedea ar Abiạtharakʼ jaegare do Sadoke bahalkedea.

³⁶ Ona tayom raj do hoṛ kolkate Simaiye hoho ạgukedeteye metadea, “Am do Jerusalemre mitʼṭecʼ oṛakʼ benaokate onḍege tahenme, ar okatehõ alom oḍok baṛakʼa.

³⁷ Ar oka hilokʼ onḍe khon oḍok kate kedron nalam paromokʼa enhilokʼ baḍaeme, am do khạṭigem gujukʼa; amakʼ mãyãm reakʼ dos do amakʼ bohokʼ cetanrege paṛaokʼa.”

³⁸ Simai do raje roṛ ruạṛadea, “Am do bhagegem menakada. Ińren kisạ̃ṛ maharaj okae menakatʼ amren guti do onageye kạmiya.” Inạ tayom Simai do ḍher din Jerusalemreye tahẽyena.

³⁹ Menkhan pe bochor tayom Simairen barea guti do Makaren hopon Gatren raj Akhis ṭhenkin dạṛkeda. Simaiko metadea, uniren guti do Gatre menakʼ kinạ.

⁴⁰ Unre Simai do gadhare decʼkate acʼren guti sendrakin lạgitʼ Gatte Akhis ṭhene senena ar onḍe khon unkine ruạṛ ạguketʼ kinạ.

⁴¹ Tayomte Solomonko baḍae ocokedea, Simai do Jerusalem khon Gatte senkate arhõe ruạṛ hecʼena.

⁴² Unre raj do Simai hoho ạgukedeteye metadea, “Iń do cetʼ Probhu Isor ńutumte kiriạkate bạń sontorletʼmea, oka hilokʼem oḍokokʼa enhilokʼ do khạṭigem gujukʼa mente? Unre am do ińem metadiń tahẽkana bhagegem roṛakada ar ona lekageń senokʼa.

⁴³ Enḍekhan cedakʼ am do Probhu Isor ṭhenem kiriạlena ar ińakʼ hukum bam bataoleda?”

⁴⁴ Solomon do Simai arhõe metadea, “Ińren ạpuń Dạud cetanre okaṭakʼem behok akatʼ ona do amakʼ ontore baḍaegea. Ńitokʼ do Probhu Isorge amakʼ behokakʼ kạmi lạgitʼ kuṛạiye emama.

⁴⁵ Menkhan Solomon raj cetanre do bhor tahena, ar Dạudakʼ siṅghạson do Probhu Isor samaṅre jaejug hạbicʼ ṭarhao akan tahena.”

⁴⁶ Raj do inạ tayom Jehuyadaren hopon Banaeye hukumadea ar Banae do senkate Simaiye gocʼkedea. Nonkate Solomonakʼ rajosṭi do kajakte ṭarhao tahẽyena.