1 Rapajko 19 - সান্তালী বাইবেল

Eliạ do Horebteye dạṛetʼkan

¹ Eliạ okakoe cekaketʼ ar cetʼleka nạbikoe gocʼketʼko Ahab do ona sanamakʼ Isebele lạiyadea.

² Ar Isebel do sanam katha ańjomkate hoṛ kolkate Eliạ ṭhene roṛ gotʼkada, “Gapa niạ okte bhitrite amakʼ jiwi onko hoṛkoakʼ leka bạń hoyocoe enḍekhan debotako jemon sạjạiko emạń ar ona do ạḍi bạṛicʼ sạjạige.”

³ Noa iạte Eliạ do botor caṛhaoadete jiwi bańcaotae lạgitʼe dạṛkeda. Uni do Jihudạ ṭoṭha reakʼ Ber-sebate seṭerkate acʼren guti do onḍegeye bạgi oṭowadea,

⁴ Menkhan acʼ do hahaṅkar talate mitʼ din reakʼ horteye laha idiyena. Ar onḍe mitʼṭecʼ rothem jhạuạ latarre duṛupʼkate gujukʼ lạgitʼe koekeda. Uni doe menkeda, “E Probhu Isor, ḍherge hoyakana. Nitokʼ do ińakʼ jiwi baṛe hataotińme; ente ińren hapṛamko khon mońj do bạnuńa.”

⁵ Inạ tayom uni do ona jhạuạ latarre giticʼenteye jạpitʼkeda. Ona jokhecʼ mitʼṭen serma goḍet do uni joṭetʼkedeteye metadea, “Ma beretʼme, ar jomme.”

⁶ Uni doe beṅgetʼketʼ khan acʼakʼ bohokʼ secʼre dhipạu akan dhirire rapakʼ akatʼ mitʼṭecʼ piṭhạ ar cukạkʼre dakʼe ńel ńamkeda. Ar ona jom baṛakate uni do arhõe giticʼ ruạṛena.

⁷ Probhu Isorren goḍet do dosar dhao arhõ hecʼkate joṭetʼ kedeteye metadea, “Ma beretʼme, ar jomme, ente unạkʼ jeleń hor calakʼ reakʼ daṛe do bạnukʼtama.”

⁸ Onate uni do beretʼkateye jomkeda. Ar ona jomkateye daṛeyente uni do pongel siń pongel ńindạ taṛamate Isorakʼ Horeb buruteye seṭerena.

⁹ Ar onḍe mitʼṭecʼ danderreye giticʼ aṅgayena. Onḍe Probhu Isor do Eliạ ṭhen seṭerenteye kulikedea, “E Eliạ, nonḍe do cetʼem ceka kana?”

Eliạ tulucʼ Probhu Isorakʼ galmarao

¹⁰ Uni doe roṛ ruạṛkeda, “Sanam daṛeanicʼ Probhu Isor do jemon acʼakʼ paona bhotiye ńam onate ạḍiń gagojokʼ kana, ente Israelko do amakʼ teṅgoakʼ bondobosko bạgi akawada, ar amakʼ pinḍkoko rạputʼ giḍi akada ar amren nạbikoko gocʼ akatʼkoa. Ar iń eskarge sarecʼ minạńa ar nitokʼ do ińhõ gojeń reakʼko kurumuṭu kana.”

¹¹ Unre Probhu Isore menkeda, “Am do oḍok hecʼkate buru coṭre iń samaṅre teṅgokʼme.” Un jokhecʼ Probhu Isor do onkateye parom calakʼkan tahẽkana, ar uni samaṅre mitʼṭecʼ maraṅ daṛeanakʼ hoe do burukoe oṛecʼketʼte bar hạṭińena ar sanam dhiriko do rạputʼ gejerena, menkhan ona hoere Probhu Isor do bae tahẽkana. Ar ona hoe tayom do dhạrti laṛaoena, menkhan onare hõ Probhu Isor do bae tahẽkana.

¹² Dhạrti laṛao tayom do seṅgel ńelena, menkhan ona seṅgel talare hõ Probhu Isor do bae tahẽkana. Ona seṅgel tayom do khae khoe leka sabad ańjomena.

¹³ Ar Eliạ do ona ańjomkate acʼakʼ oyonakʼte mẽtʼãhãe betʼketʼtaea ar bahrete senkate dander reakʼ moca ṭhene teṅgoyena. Ona tayom uni do niạ kathae ańjomkeda, “E Eliạ, nonḍe do cetʼem ceka kana?”

¹⁴ Uni doe roṛ ruạṛkeda, “Sanam daṛeanicʼ Probhu Isor do jemon acʼakʼ paona bhoktiye ńam onate iń do ạḍiń gagojokʼ kana, ente Israelko do amakʼ teṅgoakʼ bondobosko bạgi akawada, ar amakʼ pinḍkoko rạputʼ giḍi akada ar amren nạbikoko gocʼ akatʼkoa. Eken iń eskarge sarecʼ minạńa ar ńitokʼ do iń hõ gojeń reakʼko kurumuṭu kana.”

¹⁵ Unre Probhu Isor do uniye metadea, “Oka hortem hecʼakan ona hortege ruạṛ senkate Damesek reakʼ hahaṅkarte calakʼme. Ar onḍe seṭerkate Hasayel do Aramren raj mentem ojokʼ bahalea.

¹⁶ Ona chaḍa Nimsiren goṛomtetʼ koṛa Jehu do Israelren raj mentem ojokʼ bahalea, ar amakʼ hudạre nạbi hoyokʼ lạgitʼ do Abel Meholaren Saphat hopon Elisayem ojogea.

¹⁷ Ar Hasayelakʼ tarwaṛe khon jãhãegeko paskaokʼ onko do Jehu hoteteko gujukʼa ar Jehuwakʼ tarwaṛe khon okoeko paskaokʼ onko do Elisa hoteteko gujukʼa.

¹⁸ Menkhan iń do Israelren eae hajar herel hoponkoń sarecʼ doho akawana, okoe do Bakʼal-deb ṭhen bako ikhṛum akan ar cokʼ hõ bako cokʼ akawade.”

Elisae do nạbiye hoyen.

¹⁹ Tayomte Eliạ do onḍe khone oḍok calaoente Saphatren hopon Elisa sãoteye ńapamena. Uni do gelbar joṛa ḍaṅgrawante jumiye cacas kan tahẽkana ar uni do siyokʼ jokhecʼ tayom utạrakʼ nahelreye tahẽkana. Ar Eliạ do uni ṭhen senkate acʼakʼ oyonakʼ bocʼkate uniye lade oṭoadea.

²⁰ Unre Elisae do acʼren ḍaṅgrakin bạgi oṭokate Eliạ tayom tayomteye ḍạṛ idikeda. Ar Elisaeye menkeda, “Nehõrokʼ kạnạń, ińren go-baba tạkin baṛe cokʼ maṛaṅ ocoạńme. Ar ona tayom do am sãoteń senokʼa.” Eliại roṛ ruạṛkeda, “Do calakʼme, menkhan disạime, noa do Isorakʼ kạmikana.”

²¹ Onate Elisa do uni bạgikateye ruạṛ calaoena. Uni do acʼren ḍaṅgrae gurketʼ kinạ ar nahel kaṭte jele isinketʼte hoṛkoe ematʼkoa ar onko do onako jomkeda. Ar ona tayom do Eliạ sãote calakʼ lạgitʼe oḍok hecʼena ar uniren sapʼ dapʼicʼe hoyena.