1 Rapajko 17 - সান্তালী বাইবেল

Bhonḍa kạhũ hotete Eliạ do jomakʼe ńamketʼ

¹ Gilead reakʼ Tisbe atoren Eliạ do Ahabe metadea, “Iń okoeyiń sewawaekan Israelren uni jiwetʼ Probhu Isorre kiriạkateń meneda, iń ạuriń men hạbicʼ darakan bochorkore sisir hõ baṅ ńurokʼa, ar dakʼ hõ bae daga.”

² Tayomte Probhu Isor do Eliạ metadea,

³ “Niạ jaega bạgikate am do purub secʼ calakʼme ar jordan purub reakʼ Kirit soḍokʼ ṭhen oko hataṛkokʼme.

⁴ Ar ona soḍokʼ reakʼ dakʼem ńũiya ar onḍe jomakʼ idiyam lạgitʼ iń do mitʼṭecʼ bhonḍa kạhũń ṭhik doho akadea.”

⁵ Onate Probhu Isor do Eliạ okae metade tahẽkan onageye kạmikeda. Uni do Jordan purub reakʼ Kirit soḍokʼte senkateye tahẽyena.

⁶ Ar bhonḍa kạhũ do setakʼ ar ạyupʼ jokhecʼ piṭhạ ar jele idiaekan tahẽkana ar uni do ona soḍokʼ reakʼ dakʼe ńũiyetʼ tahẽkana.

Sarephatren rạnḍi maejiu

⁷ Disạmre bae dakʼetʼ tahẽkante ona soḍokʼ reakʼ dakʼ hõ ańjetʼena.

⁸ Unre Probhu Isorakʼ niạ katha Eliạ ṭhen sodorena,

⁹ “Ńitokʼ do Sidonren Sarephat ṭhen senkate tahenme. Onḍe iń do jomakʼ jogaṛam lạgitʼ mitʼṭen rạnḍi maejiu iń ṭhik doho akadea.”

¹⁰ Ona iạte uni do Sarephatteye calaoena. Ar atote bolokʼ horreye seṭeren khan mitʼṭen rạnḍi maejiu sahan ńańam kane ńelkedea. Ar uni hohoadeteye metadea, “Ńũi lạgitʼ thoṛa dakʼem ạgu daṛekińạ?”

¹¹ Maejiu do tinreye calakʼkan tahẽkana unre arhõ hohoadeteye metadea, “Dayakate iń lạgitʼ mitʼ kecakʼ piṭhạ hõ ạgu daraeme.”

¹² Uni maejiue roṛ ruạṛkeda, “Amren jiwetʼ Probhu Isor ńutumte kiriạkateń meneda, iń ṭhen do mitʼṭecʼ piṭhạ hõ bạnukʼa. Hanḍhare eken mitʼ muṭ holoṅ ar cukạkʼre thoṛa sunum menakʼa. Iń do oṛakʼte idi lạgitʼ thoṛagan sahaniń halaṅeda; onate iń ar ińren hoponiń lạgitʼ thoṛa jomakʼ iń benaoa. Ar ona tayom do jom kateliń gujukʼa.”

¹³ Eliạ do uniye metadea, “Alom botorokʼa. Am okam menketʼ oṛakʼte senkate onage onkaeme. Menkhan amakʼ oka menakʼtam ona khon pạhilte iń lạgitʼ mitʼṭecʼ ḍetʼḍetʼ piṭhạ benaokate nonḍe ạguạńme. Ar ona tayom do am ar amren hopon lạgitʼ benaome.

¹⁴ Israelren Probhu Isor do niạ kathae meneda, dakʼ ạuriye emokʼ hạbicʼ holoṅ reakʼ hanḍha ar sunum reakʼ cukạkʼ hõ baṅ khạlikʼa.”

¹⁵ Unre senkate uni do Eliạ lạgitʼ okae men ocolen onae tearkeda. Onate Eliạ ar uni maejiu ar uniren hopon do ḍher din hạbicʼko jomkeda.

¹⁶ Eliạ hotete Probhu Isor oka kathae men ocolen onkage holoṅ reakʼ hanḍha ar sunum reakʼ cukakʼ do baṅ khạlilena.

¹⁷ Thoṛa din tayom uni maejiuren hopon doe ruạyena. Ar ruạ kạhilte uni doe gocʼena.

¹⁸ Maejiu do unre Eliại metadea, “E Isorren hoṛ, iń do cetʼ iń khuti akatʼtama? Am do cetʼ ińakʼ kại reakʼ katham disạ ocoyińte ińren hopon goje lạgitʼem hecʼakana?”

¹⁹ Eliại roṛ ruạṛkeda, “Dini amren hopon iń ṭhen ạguiyem.” Uni do maejiuakʼ hobor khon uni hopontetʼe hataokedete oka oṛakʼre acʼe tahẽkan onḍeye idikedea ar acʼakʼ aṭetʼreye giticʼkedea.

²⁰ Ona tayom Probhu Isor hohoadeteye metadea, “E Probhu, ińren Isor, iń okoeṭakʼ rạnḍi maejiuakʼ oṛakʼren tahenkan uniren hoponem gocʼ ocoakadete cedakʼ unire noa duk dom paṛao ocoyeda?”

²¹ Ona tayom uni do pe dhao gidrại taber loṭomkedete Probhu Isore hohowadea, “E Probhu ińren Isor, gidrạwakʼ jiwi baṛe ruạṛ kataeme.”

²² Probhu Isor do Eliạwakʼ kathae ańjomkeda ar ar uniren hopon do jiwiye ńam ruạṛkeda are jiwetʼ ruạṛena.

²³ Unre Eliạ do gidrại hoborkedete latar kandhateye pheḍkedea. Ona tayom uniren eṅgattetʼ ṭhene jimạkedeteye metadea, “Nũkʼũe ńeleme, amren hopon do jiwetʼge menaea.”

²⁴ Uni maejiu do unre Eliại metadea, “Iń do ńitokʼ iń bujhạu daṛeakʼ kana am dom Isorren hoṛ kana, ar Probhu Isor am hotete okae men ona do sạrigea.”