1 Rapajko 16 - সান্তালী বাইবেল

¹ Unre Basa upạrte Hananiren hopon Jehu ṭhen Probhu Isorakʼ niạ katha sodorena,

² “E Basa, am do dhuṛi khoniń halaṅ rakapʼketʼmea ar Israelkoren mukhiyạń hoyoco akatʼmea. Menkhan am do Jerobiamakʼ hortegem taṛameda ar ińren Israel hoṛkom kại ocoyetʼkoa ar onkoakʼ kại gunạkʼte ińem bekusi ocoakadińạ.

³ Onate am ar am bõsrenkoń maraopea. Ar am bõsrenko do Nabatren hopon Jerobiamren bõs lekań hoyocoya.

⁴ Amren okoeko hoṛ nagrahareko gujukʼ onko do setakoko jomkoa ar ṭanḍire okoeko gujukʼ onko do cẽṛẽko jomkoa.”

⁵ Basawakʼ eṭakʼ eṭakʼ kạmiko reakʼ, uniyakʼ lạṛhạire jitạukʼ reakʼ ar uni okakoe ceka akatʼ ona do “Israelkoren rapajkoakʼ Itihãs” ńutumanakʼ puthire ol akana.

⁶ Tayomte Basa do acʼren hapṛamko ṭhene calaoena ar Tirsareko topakadea. Ar uniyakʼ jaegare uniren hopon Ela do raje hoyena.

⁷ Hananren hopon Jehu nạbi hotete Basa ar uniyakʼ bõsko upạrte Probhu Isorakʼ katha do sodorlena, ente Jerobiamakʼ bõsrenko leka uni do Probhu Isorakʼ mẽtʼre oka bạṛicʼakʼ kan ona kạmikote Probhu Isore bekusi ocokedea ar Jerobiamakʼ bõskoe marao giḍikada.

Israelren Ela raj

⁸ Jihudạren raj Asakʼ rajokʼ bargel turui bochor oktere Basaren hopon Ela do Israelren raje hoyena. Uni do Tirsare bar bochore rajlena.

⁹ Simri ńutuman uniren mitʼṭen senaputi do uni upạrteye soṛojontroyetʼ tahẽkana. Elawakʼ tinạkʼ rãt gạḍiko tahẽkan onako reakʼ adha do Simri cetanre bhar tahẽkana. Ela do un jokhecʼ Arsawakʼ oṛakʼre bulokʼ lạgitʼ bubulakʼe ńuńukan tahẽkana. Arsa cetanre do Tirsa reakʼ raj dolanko ńel todarot reakʼ bhar tahẽkana.

¹⁰ Jihudạren raj Asawakʼ rajokʼ bargel eaeyakʼ bochorre Simri do ona oṛakʼre bolokate Elae gocʼkedea. Ar ona tayom uni do Ela bodolte raje hoyena.

¹¹ Raj lekate siṅghạsonre duṛubokʼ etohopʼrege Simri do Basa bõsren sanamkoe gocʼketʼkoa. Uniren gateko peṛako modre cele herel hoṛge jiwetʼ do bae doholetʼkoa.

¹² Jehu nạbi hotete Probhu Isor do Basa upạrte okae roṛletʼ onkage Simri do Basawakʼ bõsren sanamkoe marao giḍikatʼkoa.

¹³ Inạ reakʼ karon do hoyokʼkana, Basa ar uniren hopon Ela do ạḍitetʼkin ghạṭleda, unkin do Israelko hõkin kại ocoletʼkoa. Unkin do boṅga murhutʼkote Israelren Probhu Isorkin khĩs ocoledea.

¹⁴ Elawakʼ eṭakʼ eṭakʼ kạmiko, metakʼme uni okakoe kạmiletʼ ona do “Israelren rapajkoakʼ Itihãs” ńutumanakʼ puthire ol menakʼa.

Israelren Simri raj

¹⁵ Jihudạren raj Asakʼ rajokʼ bargel eaeyakʼ bohcorre Simri do Tirsare eae din raje calaokeda. Ona jokhecʼ Israelren lạṛhại phạdko do Philisṭikoakʼ Gibethonko gherao akatʼ tahẽkana.

¹⁶ Israelko do ḍerare tinreko ańjomkeda, Simri do raj upạrte soṛojontrokate uniye gocʼ akadea unre onko do enhilokʼge ḍerare maraṅ senaputi Omri do Israelren rajko bahalkedea.

¹⁷ Unre Omri ar uni sãoten sanam Israelko do Gibethon khonko rakapʼ calaoente Tirsako gheraokeda.

¹⁸ Simri do nagraha hatena menteye ńelketʼ khan raj doṅgolteye boloyena ar seṅgele lagaoada. Ar unre acʼ hõe lo gocʼena.

¹⁹ Acʼakʼ kại iạtege uni doe gocʼena, ente Probhu Isorakʼ mẽtʼre oka bạṛicʼakʼ kan onageye kạmikan tahẽkana. Uni do Jerobiam lekae senokʼkan tahẽkana, metakʼme Jerobiam Israelko cetʼ lekae kại ocoyetʼko tahẽkan uni hõ onkageye kạmikeda.

²⁰ Simriyakʼ eṭakʼ eṭakʼ kạmiko ar uniyakʼ hul reakʼ katha do “Israelkoren rapajkoakʼ Itihãs” ńutumanakʼ puthire ol menakʼa.

Israelren Omri raj

²¹ Inạ tayom Israelko do bar hạṭińteko hạṭińena. Onko modren adha do Ginetren hopon Tibni rajeko khojkeda ar eṭakʼ adhako do Omri rajeko khojkeda.

²² Menkhan Omri secʼren hoṛ do Ginetren hopon Tibni secʼren hoṛko bhagaoketʼkoa. Ar onate Tibniye gocʼen khan Omrigeye rajena.

²³ Jihudạren raj Asakʼ rajokʼ pegel mitʼ bochorre Omri do Israelkoren raje hoyena. Uni do gelbar bochor raje tahẽkana, ona modre turui bochor do Tirsareye rajena.

²⁴ Uni do eaegel irạl keji rupạte Semer ṭhen khon Samariạ buruye kirińkeda ar buru coṭre mitʼṭecʼ nagrahae benaokeda ar bururen lahaten mạlik Semerakʼ ńutum lekage nagraha reakʼ ńutume dohokeda.

²⁵ Omri do Probhu Isorakʼ mẽtʼre oka bạṛicʼakʼ kan onageye kạmikan tahẽkana ar uni lahate okoe rajko tahẽkan onko sanamko khon hõ uni do ḍhere kạiyetʼ tahẽkana.

²⁶ Uni do Nabatren hopon Jerobiam lekageye senokʼkan tahẽkana, metakʼme Jerobiam cetʼ leka Israelkoe kại ocoyetʼko tahẽkan Omri hõ onkageye kạmiyetʼ tahẽkana. Onate Israelko do boṅga murhutʼ hotete akoren Probhu Isorko edre ocokedea.

²⁷ Omriyakʼ eṭakʼ eṭakʼ kạmiko reakʼ katha ar lạṛhạire uniyakʼ jitạukʼ reakʼ katha do “Israelren rapajkoakʼ Itihãs” ńutumanakʼ puthire ol menakʼa.

²⁸ Tayomte Omri do acʼren hapṛamko ṭhene calaoena ar uni do Samariạreko topakadea. Ar uniyakʼ jaegare do uniren hopon Ahabe rajena.

Israelren Ahab raj

²⁹ Jihudạren raj Asawakʼ rajokʼ pegel irạl bochorre Omriren hopon Ahab do Israelkoren raje hoyena. Uni do bargel bar bochor Samariạ khon Israelko cetanreye rajokʼkan tahẽkana.

³⁰ Omri hopon Ahab hõ Probhu Isorakʼ mẽtʼre oka bạricʼakʼ kan onageye kạmiyetʼ tahẽkana, uni lahare okoeko rajko tahẽkan onko sanamko khon hõ ḍher bạṛicʼakʼkoe kạmikan tahẽkana.

³¹ Nabatren hopon Jerobiam okakoe kạiletʼ onako do thoṛawakʼgeye metakʼkan tahẽkana. Eken ona do baṅa, uni do Sidonkoren raj Et-bakʼalren hoponera Esebele baplakedea ar Bakʼ-al debota sewawaye ehopʼena.

³² Uni do Samariạre Bakʼal debota lạgitʼ oka mundile benaoletʼ onḍe uni lạgitʼ mitʼṭecʼ pinḍe benaokeda.

³³ Uni do mitʼṭecʼ Asera muṭhạn hoe benaokeda ar ona lahare Israelren sanam rapajko Israelren Probhu Isor tinạkʼko bekusi ocolede uni do acʼakʼ kạmi hotete ona khon hõ bạ̃ṛtiye bekusi ocokedea.

³⁴ Ahabakʼ oktere Bethelren Hiel do Jerikho nagraha arhõe benao ruạṛkeda. Nunren hopon Josuạ hotete Probhu Isorakʼ katha leka ona nagraha reakʼ rehetʼ gathao lạgitʼ Hielren maraṅicʼ hopon Abiramakʼ jiwi alae hoyentaea ar ona reakʼ phaṭok silpiń lagao lạgitʼ do uniren huḍińicʼ hopon Segub hõ jiwi emokʼ hoyentaea.