1 Rapajko 15 - সান্তালী বাইবেল

Jihudạren Abiạm raj

¹ Nobaṭren hopon Jerobiamakʼ rajokʼ gel irạlakʼ bochorre Abiạm do Jihudạren raje hoyena.

² Uni do Jerusalemre pe bochore rajlena. Uniren eṅgatakʼ ńutum do Maka; uni do Abisalomren hoponerae tahẽkana.

³ Abiamren apattetʼ okakoe kạiletʼ uni hõ onako kạmigeye ehopʼena. Uniren hapṛam Dạud leka uniyakʼ ontor do Probhu Isor secʼ purạte do baṅ tahẽkantaea.

⁴ Enhõ Dạudakʼ katha disạite uniren Probhu Isor do Jerusalemre mitʼṭecʼ mạliye emena, metakʼme uniyakʼ siṅghạsonre duṛubokʼ lạgitʼ mitʼṭen hopone emena ar Jerusalem do ḍahao maraokʼ khone rukhiyạkeda,

⁵ ente Probhu Isorakʼ mẽtʼre okaṭakʼ ṭhikakʼ kan onage Dạud doe kạmiyetʼ tahẽkana. Eken Uriạ hitti hoṛakʼ ghoṭna chaḍa uniyakʼ goṭa jionre Probhu Isorakʼ oka hukumge bae bemanotleda.

⁶ Rehobiam ar Jerobiam talare okaṭakʼ lạṛhại ehopʼlen ona do Abiamakʼ jiwetʼ bhor tahẽkana.

⁷ Abiamakʼ eṭakʼ eṭakʼ kạmiko, metakʼme uni okaṭakʼe kạmiyetʼ tahẽkan ona do “Jihudạ rajakʼ Itihãs” ńutumanakʼ puthire ol menakʼa. Abiam ar Jerobiam talare do lạṛhại hoyokʼkan tahẽkana.

⁸ Tayomte Abiạ do acʼren hapṛamko ṭhene senena, ar Dạudakʼ nagrahareko topakadea. Ar uniyakʼ jaegare do uniren hopon Asaye rajena.

Jihudạren Asa raj

⁹ Israelkoren raj Jerobiamakʼ rajokʼ bargel bochor oktere Asa do Jihudạren raje hoyena.

¹⁰ Uni do pongel mitʼ bochor hạbicʼ Jerusalemreye rajena. Uniren goṛomtetʼ buḍhiyakʼ ńutum do Maka tahẽkana. Uni do Abisalomren hoponerae tahẽkana.

¹¹ Uniren hapṛam Dạud leka Asa do Probhu Isorakʼ mẽtʼre okaṭakʼ bhageakʼ kan onageye kạmikan tahẽkana.

¹² Uni do disạm khon herel mundil kusumbikoe laga ńirketʼkoa ar hapṛamkoren benao sanam boṅga muṭhạnko hõe sạṅgiń giḍikatʼkoa.

¹³ Uni do acʼren goṛomtetʼ buḍhi Maka hõ rạni hudạ khone ocokʼkedea, ente uni do hirkhạwạnicʼ Asera muṭhạne benaoleda. Ar Asa do ona muṭhạne makʼ rạputʼketʼte kedron soḍokʼre idikateye atar giḍikada.

¹⁴ Uni do than boṭkocʼko bae marao utạrletʼre hõ jiwetʼ bhor Probhu Isorgeye botoradea.

¹⁵ Uni ar acʼren apattetʼ okako sona-rupạ ar eṭakʼ eṭakʼ jinisko Isor ńutumtekin begar doholetʼ uni do onako Isorakʼ oṛakʼteye ạgukeda.

¹⁶ Asa ar Israelren Basa raj do jiwetʼ bhor ạkin talarekin lạṛhại kan tahẽkana.

¹⁷ Israelren Basa raj do Jihudạren hoṛko upạrte senkate Rama nagraha do gaṛ lekae benao rakapʼkeda jemon Jihudạren raj Asa ṭhen okoe hõ aloko sen hecʼ daṛeakʼ.

¹⁸ Probhu Isorakʼ oṛakʼre ar apnarakʼ raj khajańci oṛakʼre okako sona ar rupạko tahẽkan onako sanamakʼe oḍokkeda. Onako do acʼren gutikoakʼ tite Aramren raj Benhadad ṭhene kolkeda. Benhadad do Tabrimonren hopon Hesbonren goṛomtetʼ koṛae tahẽkana. Uni do unre Damesekreye rajokʼkan tahẽkana. Asa do uni ṭhene roṛgotʼkada,

¹⁹ “Ińren ạpuń ar amren ạpum leka dela, alaṅ hõ mitʼṭecʼ laṅ bondobos laṅ bandhaoma. Iń do noako sona ar rupạko dan lekateń kolatʼmea. Am do ńitokʼ Israelren raj Basa sãote okaṭakʼ bondobos menakʼ ona baṛe rạpudme, enḍekhan uni do iń ṭhen khone ruạṛ calakʼa.”

²⁰ Asa rajakʼ kathate Benhadad doe rạjiyena ar Israelkoakʼ ato ar nagrahako upạrte acʼren subedarkoe kolketʼkoa. Uni do Ison, Dan, Abel-Betmaka ar goṭa Kinerot ar ona sãoteakʼ Napthali ṭoṭhae hatkeda.

²¹ Ado Basa niạ kathae ańjomketʼ khan Rama nagraha kajakte benao rakab reakʼ kạmiye bondketʼte Tirsateye ruạṛ calaoena.

²² Ona tayom Asa raj do Jihudạren sanamko cetanre hukume emkeda, ar okoe hõ bae badletʼkoa. Onate hoṛko do Ramare Basae beohar akatʼ dhiri ar sanam kaṭko idikeda. Ar Asa raj do onakote Benjạmin reakʼ Geba ar Mispa gaṛ lekae benaokeda.

²³ Asakʼ eṭakʼ eṭakʼ kạmiko, lạṛhạire jitạukʼ reakʼ katha, ar uni cetʼkoe cekaletʼ ar okako ato nãwãteye benao aroletʼ ona do “Jihudạ rapajkoakʼ Itihãs” ńutumanakʼ puthire ol menakʼa. Haṛam umerre Asa do jaṅgare mitʼṭecʼ rog ńamkedea.

²⁴ Tayomte Asa do acʼren hapṛamko ṭhene calaoena ar acʼren hapṛam Dạudakʼ nagrahare acʼren hapṛamko sãoteko topakadea. Ar uni hopon Jehosaphet do uniyakʼ jaegareye rajena.

Israelren Nadab raj

²⁵ Jihudạren raj Asakʼ rajokʼ dosar bochorre Jerobiamren hopon Nadab do Israelren raje hoyena. Uni do Israelko cetanre bar bochore rajlena.

²⁶ Ar Probhu Isorakʼ mẽtʼre okaṭakʼ bạṛicʼakʼ kan onage uni doe kạmikan tahẽkana. Uni do acʼren apat lekae calakʼkan tahẽkana, metakʼme acʼren apat Israelko cetʼ lekae kại ocoletʼko onkage uni hõe kạmikeda.

²⁷ Isạkar gusṭiren Ạhiạren hopon Basa do Nadab upạrteye soṛojontrokeda. Nadab ar Israelko do tinre Philisṭikoakʼ Gibethonko gherao ạcurkeda unre Basa do Gibethonre Nadabe gocʼkedea.

²⁸ Jihudạren raj Asakʼ rajokʼ tesarakʼ bochorre Basa do Nadabe gocʼkedea ar uniyakʼ jaegareye rajena.

²⁹ Uni do raj hoykate Jerobiam gharońjren sanamkoe gocʼ cabaketʼkoa. Probhu Isor do acʼren guti Siloren Ạhiạ nạbi hotete oka kathae roṛletʼ ona lekage Basa do Jerobiamakʼ gharońjren sanamkoe marao cabaketʼkoa.

³⁰ Niạ reakʼ karon do hoyena, Jerobiam do apnartetʼe kạileda ar Israelko hõe kại ocoletʼkoa ar onae onkaketʼte uni do Israelkoren Isorakʼ pite caṛhao ocoketʼtaea.

³¹ Nadabakʼ eṭakʼ eṭakʼ kạmiko, metakʼme uni okakoe kạmiletʼ ona do “Israelkoren rapajkoakʼ Itihãs” ńutumanakʼ puthire ol akana.

³² Asa ar Israelkoren raj Basa do rajokʼ bhor lạṛhạitege kin tahẽyena.

Israelren Basa raj

³³ Jihudạren raj Asakʼ rajokʼ tesarakʼ bochorre goṭa Israel disạm cetanre Ạhiạren hopon Basa do Tirsare rajokʼe ehopʼena. Uni do bargel pon bochore rajena.

³⁴ Uni do Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana. Uni do Jerobiam lekageye calakʼkan tahẽkana, metakʼme Jerobiam cetʼleka Israelkoe kại ocoletʼko uni hõ onkageye kạmikeda.