1 Rapajko 14 - সান্তালী বাইবেল

Jerobiam upạrte Ạhiạwakʼ nạbi katha

¹ Ona oktere Jerobiamren hopon Abiạ doe ruạ kạhilena.

² Unre Jerobiam do acʼren bạhuttetʼe metadea, “Am do nonkan kicricʼkom horokʼ bandea jemon Jerobiamren bạhu kanam mente alom oromokʼ. Ar ona tayom do Silotem calakʼa. Onḍe do Ạhiạ nạbi menaea. Unige ińe metadiń tahẽkana, noko hoṛkoren rajiń hoyokʼa mente.

³ Am do soṅgete gel goṭecʼ piṭhạ, thoṛa thuṛi mạṭhại ar mitʼ cukạkʼ dumur rasa uni lạgitʼ idi toraeme. Ar unigeye lạiyama gidrạwakʼ do cetʼ hoyokʼtaea mente.”

⁴ Jerobiamren bạhu do ona lekageye kạmikeda ar Silote Ạhiạwakʼ oṛakʼteye senena. Unre Ạhiạ do nunạkʼe haṛam thalakʼ thulukʼ caba akan tahẽkana; uni do mẽtʼte hõ bae ńeńelkan tahẽkana.

⁵ Menkhan Probhu Isor do Ạhiyại metade tahẽkana, “Jerobiamren bạhu do acʼren hopontetʼ reaṅ kulime lạgitʼ am ṭhene hijukʼ kana. Uniren hopontetʼ doe ruạ kạhil akana. Ar am do niạkom roṛ ruạṛaea. Uni do nonḍe hecʼkate eṭakʼ mitʼṭen maejiu menkateye udugokʼa.”

⁶ Ar Ạhiạ do duạr ṭhen uniyakʼ taṛam reakʼ sabade ańjomketʼ khane menkeda, “Dela bolokʼme, Jerobiamren bạhu. Am do cedakʼ nonka dom udugokʼ kana? Iń do bạṛicʼ khobor emam lạgitʼgeń men ocoakana.

⁷ Am do senkate Jerobiam noa katham lạiyaea, Israelkoren Probhu Isore meneda, ‘iń do hoṛko mod khon amgeń usulletʼmea ar ińren hoṛ Israelko cetanre mukhiyạ lekateń doholetʼmea.

⁸ Ar Dạudakʼ bõs khon rajosṭi recʼ hataokate amiń ematʼme tahẽkana, menkhan ińren guti Dạud leka do bam hoylena. Dạud do ińakʼ hukumkoe bataoetʼ tahẽkana ar mon-ontorte ińre pạtiạre tahẽkana. Ińakʼ mẽtʼre okaṭakʼ bhageakʼ kan eken onageye kạmiyetʼ tahẽkana.

⁹ Am lahate okoeko tahẽkan onko khonhõ am do ḍher bạṛicʼem kạmi akada. Am do apnar lạgitʼ debotakom benao akawana ar chańcre dulakʼ muṭhạnem benao akada. Am dom be kusi ocoakadińa arem bạgi giḍi akadińạ.

¹⁰ Ona iạte iń do Jerobiamakʼ bõs cetanre usạrage muhiniń paṛao ocoya. Uniyakʼ bõs khon mitʼke mitʼ herel hoṛ doń marao utạrkoa- baṅ doe golamkan ar baṅ doe sạdhin kan. Hoṛ do cetʼ leka gõeṭha rapakʼkateko torocʼ ocoyetʼkan onkage Jerobiamakʼ bõskoń marao utạra.

¹¹ Uniyakʼ bõsren okoeko nagrahareko gujukʼ onko do setakoko jomkoa ar bilạn ṭạnḍire okoeko gujukʼ onko do cẽṛẽkoko jomkoa. Iń Probhuge niạ katha doń meneda.’

¹² “Am do ńitokʼ oṛakʼte ruạṛ calakʼme. Ar nagrahatem bolokʼ torage hoponme doe gujukʼa.

¹³ Israelren sanam hoṛ do uni lạgitʼko rakʼ homora arko topakaea. Jerobiamren nijạr hoṛko modre eken unigeye topa ocokʼa, ente Jerobiamakʼ bõsre eken uniren hopontetʼ cetanrege Israelren Probhu Isor do bhuktiye ńelakada.

¹⁴ “Probhu Isor do acʼ apnar ńutumte Israelkoren hoṛko cetanre nonkan mitʼ hoṛe rajea okoe do Jerobiam bõsrenkoe marao utạrko. Ona din do teheńkangea, hẽ, ńitokʼ kangea.

¹⁵ Probhu Isor do Israelkoe ńẽtʼketʼkoa, onate onko do dakʼre hilạukʼ kan pạṭiol ghãs lekako hoyokʼa. Ar okaṭakʼ disạm onkoren hapṛamkoe ematʼko tahẽkan ona mońj disạm khone or totʼkoa ar Phurạt gaḍa hanasareye giḍikakoa, ente onko do Asera muṭhạn benaokate Probhu Isorko edre ocoakadea.

¹⁶ Jerobiam okakoe kại akatʼ ar Israelko okae kại ocoakatʼko ona iạte Probhu Isor do onkoe bạgi giḍiyakoa.”

¹⁷ Inạ tayom Jerobiamren bạhu doe ruạṛ calaoena ar Tirsa nagrahateye seṭerena. Ar duạr reakʼ ganaḍeye lebetʼketʼ sãote hopontetʼ doe gocʼena.

¹⁸ Probhu do acʼren guti Ạhiạ nạbi hotete oka kathae roṛletʼ onkage Israelren sanam hoṛ do hopontetʼ lạgitʼko homorkeda arko topakadea.

Jerobiamakʼ gujukʼ

¹⁹ Jerobiamakʼ eṭakʼ eṭakʼ kạmi, uniyakʼ lạṛhạiko ar rajokʼ reakʼ katha do “Israel rajkoakʼ Itihãs” ńutumanakʼ puthire olakana.

²⁰ Ar bargel bar bochor rajokʼ tayom uni do acʼren hapṛamko ṭhene senena ar uniyakʼ jaegare uniren hopon Nadab do raje hoyena.

Jihudạren Rehobiam raj

²¹ Solomonren hopon Rehobiam do Jihudạreye rajokʼkan tahẽkana. Ar tinre raje hoylena unre uniyakʼ umer do pongel mitʼ bochor tahẽkana. Ar Probhu Isor do Israel gusṭirenkoakʼ sanam jaega mod khon okaṭakʼ nagraha acʼ tahen lạgitʼe bachaoan tahẽkan ona Jerusalem nagrahare Rehobiam do gel eae bochorre rajena. Uniren eṅgatakʼ ńutum do Nama tahẽkana; uni do Amoni jạtrene tahẽkana.

²² Ar Jihudạren hoṛko do Probhu Isorakʼ mẽtʼre oka bạṛicʼakʼ kan onage kạmiko ehopʼena. Akoren hapṛamko khon hõ akoakʼ kại hotete Probhu Isorakʼ pit do arhõ bạ̃ṛtiko rakapʼ ocoketʼtaea.

²³ Ona chaḍa onko do ako lạgitʼ mitʼke mitʼ usul burure ar mitʼke mitʼ dare buṭạkore than boṭkocʼko benaokeda ar sonot dhiri ar Asera muṭhạnko benao joṅana.

²⁴ Onkoakʼ disạmre do herel kusumbi hõko tahẽkana. Ar okoe jạtrenko Probhu Isor do Israelko samaṅ khone sạṅgiń giḍiletʼko onkoakʼ sanam hirkhạwanakʼ kạmiko do Jihudạren hoṛko kạmikan tahẽkana.

²⁵ Rehobiamakʼ rajokʼ mõṛẽakʼ bochorre Misorren Sisak raj do Jerusaleme akromonkeda.

²⁶ Uni do Probhu Isorakʼ oṛakʼ ar raj oṛakʼ reakʼ sanam dhon-duribkoe luṭ idikeda. Uni do sanamakʼgeye idikeda, uni do Solomone benao ocoletʼ sona reakʼ ḍhalko hõe luṭ idikeda.

²⁷ Onate Rehobiam raj do onako bodolte rupạ reakʼ ḍhalkoe benao ocokeda. Ar raj dolan reakʼ duạr ṭhen okoe lạṛhại phạdko horhoyetʼ tahẽkan onkoren senaputi ṭhen onako rukhiyại lạgitʼ bhare emkeda.

²⁸ Raj do Probhu Isorakʼ oṛakʼte tinreye bolokʼkan tahẽkana unre Pahradarkoren lạṛhại phạdko do onako ḍhal sapʼkate uni sãoteko calakʼkan tahẽkana ar tayomte pahra oṛakʼre arhõko dohokakʼ kan tahẽkana.

²⁹ Rehobiamakʼ eṭakʼ eṭakʼ kạmi, metakʼme uni okakoe cekayetʼ tahẽkan ona joto do “Jihudikoren rajkoakʼ Itihãs reakʼ puthire ol menakʼa.

³⁰ Rehobiam ar Jerobiam talare do jaoge lạṛhại hoyokʼkan tahẽkana.

³¹ Tayomte Rehobiam do acʼren hapṛamko ṭhene senena ar Dạud nagrahareko topakadea. Uniren eṅgatakʼ ńutum do Nama; uni do mitʼṭen Amoni jạtren maejiue tahẽkana. Rehobiam tayom do acʼren hopon Abiam uniyakʼ jaegare raje hoyena.