1 Rapajko 13 - সান্তালী বাইবেল

Isore kolakade mitʼṭen hoṛ

¹ Jerobiam do janwar samaṅko lạgitʼ tinre pinḍ aṛereye teṅgo akan tahẽkana unre Probhu Isorakʼ katha leka Isorren mitʼṭen hoṛ do Jihudạ khon Bethelteye seṭerena.

² Uni do Probhu Isorakʼ katha leka pinḍ upạrteye roṛ saḍekeda, “E pinḍ, E pinḍ, Probhu Isor do niạ kathae meneda, ‘Dạud bõsre Josiạ ńutuman mitʼṭen hopone janamokʼa. Ar usul than boṭkocʼkore okoe naekeko ńitokʼ am cetanre janwarko samaṅetʼko uni do onko naekeko am cetanreye samaṅkoa ar manwakoakʼ jaṅ hõe atar giḍikatakoa.’ ”

³ Ar enhilokʼge Isorren hoṛ do mitʼṭecʼ cinhạ reakʼ kathae menkeda. Uni doe menkeda, “Probhu Isor do niạ cinhạ reakʼ kathae roṛeda, noa pinḍ do oṛejokʼa ar ona cetan reakʼ torocʼ hõ taral basal ocokʼa.”

⁴ Bethel reakʼ pinḍ upạrte Isorren hoṛakʼ katha ańjomkate Jerobiam do pinḍ cetanre ti tiạrkateye menkeda, “Uni sabepe.” Menkhan uni hoṛ sabe lạgitʼ okaṭakʼ tiye tiạrketʼtae ona do borocʼentaea. Ona do ar bae or ruạṛ daṛeada.

⁵ Ona chaḍa Probhu Isorakʼ katha leka Isorren hoṛe roṛketʼ cinhạ leka pinḍ do oṛecʼena ar ona reakʼ torocʼ do taral basalena.

⁶ Unre raj do Isorren hoṛe metadea, “Amren Probhu Isor nehõraeme ar iń lạgitʼ koeme jemon ińakʼ ti do arhõ mońj ruạṛokʼ.” Onate Isorren hoṛ do Probhu Isore nehõradea ar rajakʼ ti do arhõ lahate leka hoyentaea.

⁷ Raj do Isorren hoṛe metadea, “Ińakʼ oṛakʼre hecʼkate jom-ńũiyme ar iń do mitʼṭecʼ sandesiń emama.”

⁸ Menkhan Isorren hoṛ do raje roṛ ruạṛadeteye metadea, “Amakʼ sompotti reakʼ adham imạńre hõ am sãote do bạń calakʼa se nonḍe jãhãn jomakʼ se dakʼ hõ bạń ńũiya.

⁹ Niạ reakʼ karon do, Probhu Isorakʼ katha leka niạ hukumiń ńam akada, iń do jemon jãhãn jomakʼ se ńũiyakʼ hõ aloń ńũi ar oka horteń hecʼakan ona horte hõ aloń ruạṛ calakʼ.”

¹⁰ Onate uni do oka horte Bethel khone hecʼlen ona horte ruạṛ baṅkate eṭakʼ horteye mohnḍayena.

Bethelren haṛam nạbi

¹¹ Unre mitʼṭen haṛam nạbi do Bethelreye girobasokʼ kan tahẽkana. Ar enhilokʼ Isorren hoṛ okaṭakʼe cekayetʼ tahẽkan unre uniren hoponko do senkate sanamakʼko lạiyadea. Ar uni hoṛ raj okae metade tahẽkan onko do akoren apat onako lạiyadea.

¹² Onkoren apattetʼ doe kuliketʼkoa, “Uni do oka horteye ruạṛena?” Jihudạren uni Isorren hoṛ oka horteye ruạṛ calaoen ona do uniren hoponko ńelledea.

¹³ Unre uni do acʼren hoponkoe metatʼkoa, “Iń lạgitʼ ma gadha palanạńpe.” Arko palanade khan uni do onareye decʼena.

¹⁴ Ar ona tayom do Isorren hoṛ sendraye lạgitʼe oḍok calaoena. Uni do mitʼṭecʼ ela dare buṭạre uni hoṛ duṛupʼ akane ńelkede khane kulikedea, “Amge cetʼ Isorren uni hoṛ do, one Jihudạ disạm khonem hecʼakan?” Uni doe roṛ ruạṛkeda, “Hẽ, iń doń uni kangea.”

¹⁵ Unre nạbi do uniye metadea, “Iń sãote dela ruạṛme ar jom-ńũime.”

¹⁶ Isorren hoṛe menkeda, “Am sãote iń do bạń ruạṛ sen daṛeakʼa ar niạ jaegare jomakʼ se ńuiyakʼ hõ bạń jom-ńũ daṛeakʼa.

¹⁷ Isor doe hukum akadińạ, jemon nonḍe do jom hõ aloń jom ar ńũ hõ aloń ńũi ar oka horteń hecʼakan ona horte aloń ruạṛokʼ.”

¹⁸ Uni nạbiye roṛ ruạṛkeda, “Iń do am lekan mitʼṭen nạbi kangeạń. Probhu Isorakʼ katha leka mitʼṭen dut do ińe men akawạdińa jemon ińakʼ oṛakʼteń ruạṛ idime jemon am do senkatem jom-ńũ daṛeakʼ.” Menkhan uni do eṛe kathae metadea.

¹⁹ Ar unre Isorren hoṛ do uni sãoteye ruạṛ calaoena ar uniyakʼ oṛakʼreye jom-ńũkeda.

²⁰ Unkin do unhõ ṭebil ṭhen kin duṛupʼ akan tahẽkanrege okoe do Isorren hoṛe ruạṛ ạgulede uni ṭhen Probhu Isorakʼ katha do sodorena.

²¹ Ar unre uni nạbi do Jihudạ khon hecʼakan Isorren hoṛ ãṭ aṛaṅteye metadea, “Probhu Isor do niạ kathae meneda, am do Probhu Isorakʼ katham bebatao akada ar Probhu Isor emakʼ hukum bam manao akada.

²² Oka jaegare jom-ńũi reakʼe manaletʼme onḍege am do ruạṛ senkatem jom-ńũkeda. Onate amren hapṛamkoakʼ topare am do bam topa ocokʼa.”

²³ Isorren hoṛ doe jom-ńũ sạtketʼ khan nạbi do mitʼṭen gadha cetanre uni lạgitʼe palankeda.

²⁴ Ado Isorren hoṛe mohnḍayen khan mitʼṭen dhạcri kul do horre uniye ńamkedea are gocʼkedea. Ar uniyakʼ mạ̃ṛĩ do horre giḍi akan tahẽyena ar ona mạ̃ṛĩ sorre gadha ar dhạcri kul teṅgo akan kin tahẽyena.

²⁵ Ar hoṛko do ona horteko parom calakʼkan tahẽkanre giḍi akan mạ̃ṛĩ ar ona aṛere mitʼṭen dhạcri kul hõ teṅgo akanko ńelkedea. Ar onko do uni haṛam nạbiyakʼ atore senkateko lạikeda.

²⁶ Ona katha ańjomkate nạbi doe menkeda, “Uni doe Isorren hoṛ kana okoe do Probhu Isorakʼ hukum bae bataoletʼ. Ar Probhu Isorakʼ okaṭakʼ katha uniye metade tahẽkan onkage uni do dhạcri kulakʼ tireye jimạkedea ar dhạcri kul do uniye or cirạkedeteye gocʼkedea.”

²⁷ Ona tayom nạbi do acʼren hoponkoe metatʼkoa, “Gadhare iń lạgitʼ palanpe.” Ar uniren hoponko doko onkakeda.

²⁸ Ona tayom uni do senkateye ńelkeda horre mạ̃ṛĩ do giḍi akana ar ona sorre gadha ar mitʼṭen dhạcri kul do teṅgo akan menakʼkinạ. Dhạcri kul do ona mạ̃ṛĩ bae jom akada ar gadha hõ bae ghạl akadea.

²⁹ Isorren hoṛ topaye ar rakʼ homor lạgitʼ nạbi do uniyakʼ mạ̃ṛĩye rakapʼketʼte gadhareye ladekeda ar acʼakʼ atoteye ruạṛ senena.

³⁰ Uni do acʼ lạgitʼ benao akatʼ topare uniye topakadea. Uni ar acʼren hoponko do niạ menkate uni lạgitʼ homor halaṅko ehopʼena, “Hae boehatiń, hae!

³¹ Uni topa baṛakate nạbi do acʼren hoponkoe metatʼkoa, “Isorren hoṛ okareye topa ocoakan onarege iń hõń gocʼlen khan topayińpe, ar ińakʼ jaṅ do uniyakʼ jaṅ aṛerege dohokakʼpe;

³² ente Bethel reakʼ pinḍ ar Samariạ reakʼ sanam atoko reakʼ usul than boṭkocʼko reakʼ mundil upạrte Probhu Isorakʼ katha leka onako reaṅ uniye roṛ saḍe akatʼakʼ do khạṭige hoyokʼa.”

Jerobiamakʼ maraṅ ghạṭ

³³ Niạ tayom hõ Jerobiam do acʼakʼ bạṛicʼ hor khon bae ruạṛlena bickom than boṭkocʼko lạgitʼ sanam hoṛko mod khon naekeye bahalketʼkoa. Okoe naeke hoyokʼe khojketʼ unige usul than boṭkocʼren naeke lekateye bahalede kan tahẽkana.

³⁴ Niạko kạmi Jerobiam bõsrenko lạgitʼ do kại hoyena jemon onko doko ḍahao maraokʼte dhạrti khonko caba utạrokʼ.