1 Rapajko 12 - সান্তালী বাইবেল

Rehobiam upạrte Israelkoakʼ hul

¹ Rehobiam do Sikemteye senena, ente sanam Israelko do uni raje lạgitʼ onḍeko senakan tahẽkana.

² Unre Nabatren hopon Jerobiam do Misor disạmreye tahẽkana, ente uni do Solomon raj samaṅ khone dạṛletʼ tahẽkana. Ar onḍeye tahẽkanrege uni do Rehobiamakʼ rajokʼ reakʼ khobore ańjomkeda.

³ Hoṛko do Jerobiamko hoho ạgukede khan uni ar sanam Israelko do Rehobiam ṭhen senkateko menkeda,

⁴ “Amren ạpum do ale cetanre mitʼṭecʼ hamal arãṛe lade akawatʼlea, menkhan ńitokʼ ale cetanre lade akan ona hamal arãṛ baṛe rawal kataleme; enḍekhan ale do amle sapʼ sorama.”

⁵ Rehobiame roṛ ruạṛatʼkoa, “Ńitokʼ do ruạr calakʼpe ar pe din hilokʼre hijukʼpe.” Onate onko hoṛ doko ruạṛ calaoena.

⁶ Okoe murubbiko acʼren apattetʼ Solomon oktereko sapʼ soraekan tahẽkan Rehobiam do onko sãote galmaraoketʼteye menkeda, “Ma solha emạńpe onko hoṛ do cetʼ iń roṛ ruạṛakoa?”

⁷ Onkoko roṛ ruạṛadea, “Teheń noko hoṛko tulucʼ bhagem beoharte onkom kusi ocoko ar onkoakʼ nehõr joṅakʼem ańjomtako enḍekhan onko do jiwetʼ bhor am ṭhen gutiko khaṭaokʼa.”

⁸ Menkhan Rehobiam do murubbikoakʼ solha bae hetawatʼte juạn koṛako tulucʼe solhawana, one okoe do acʼ sãoteko haralen ar uniko sapʼ soraekan tahẽkan.

⁹ Uni do onkoe metatʼkoa, “Hoṛko meneda, ‘amren ạpum okaṭakʼ hamal arãṛe gokʼ akawatʼle ona ńitokʼ rawal kataleme.’ Niạ babotre apeakʼ sopolha do cetʼ? Iń do cetʼ iń roṛ ruạṛakoa? ”

¹⁰ Onko juạnko doko roṛ ruạṛadea, “Okoeko hoṛ amren ạpumakʼ hamal arãṛ rawal reakʼ kathako menetʼkan am do onkom metakoa, ińren ạpuńakʼ ḍanḍa khon hõ ińakʼ sicʼ kạṭupʼ do moṭagea.

¹¹ Ar amren ạpum okaṭakʼ hamal arãṛe ladeyatʼko tahẽkan ona do arhõ hamal ocoytakome. Amren ạpum do cạbukteye dalletʼkoa menkhan am do kidiń kaṭkomkotem dalkoa.”

¹² Rajakʼ katha leka pe din hilokʼre Jerobiam ar sanam Israelko do Rehobiam ṭhenko ruạṛ hecʼena.

¹³ Raj do murubbikoakʼ sopolha bae hetawatʼte ạḍi keṭecʼ kathateye roṛ ruạṛatʼkoa.

¹⁴ Uni do onko juạnkoakʼ sopolha lekageye metatʼkoa, “Ińren ạpuń do apeakʼ arãṛe hamal ocoleda menkhan iń do artetʼgeń hamal ocoya. Ińren ạpuń do cạbukteye dalletʼpea, menkhan iń do kidiń kaṭkomkoteń dalpea.”

¹⁵ Nonkate raj do hoṛkoakʼ katha bae luturada. Siloren Ạhiạ hotete Probhu Isor do Nabatren hopon Jerobiamakʼ oka kathae menletʼ ona purạu lạgitʼ Probhu Isor khonge noa ghoṭna do hoyena.

¹⁶ Israelkoko ńelkeda raj do onkoakʼ katha bae ańjomeda unre onko do rajko metadea, “Dạud cetanre jãhãn dạbiteakʼ do bạnukʼtalea. Jisạiren hopon cetanre aleakʼ ạidạri hõ bạnukʼanaṅ. E Israelko Do apan ạpin oṛakʼte ruạṛ calakʼpe. E Dạud, ńitokʼ amakʼ gusṭi do amtege ńel joṅme.” Onate Israelko do apan ạpin oṛakʼteko ruạṛ calaoena.

¹⁷ Menkhan Jihudạ gusṭirenko reakʼ atoko ar nagrahakore okoe Israelkoko girobasokʼ kan tahẽkan Rehobiam do onko cetanre rajokʼe ehopʼena.

¹⁸ Okoe do kạmi lạgitʼko jormoṭ ocokʼkan tahẽkan ar onko cetanre okoeyakʼ bhar tahẽkan Rehobiam do uni Adoram Israelko ṭhene kolkadea, “Menkhan onko do dhirite uniko tiń gocʼkedea. Unre Rehobiam raj do acʼakʼ rãt gạḍire decʼkate Jerusalemteye dạṛkeda.

¹⁹ Nonkate Israelko do Dạud bõsrenko cetanreko hulkeda; ar teheń hạbicʼ hõ onkage menakʼa.

²⁰ Jerobiamakʼ ruạṛ hijukʼ reakʼ khobor ańjomkate Israelko do hoṛ kolkate akoakʼ sabhareko hoho ạgukedea ar sanam Israelko cetanre uniko rajkedea. Ar eken Jihudạ gusṭikoren hoṛkoge Dạudakʼ bõsre pạtiạrko tahẽyena.

Samayawakʼ nạbi katha

²¹ Jerusalemte seṭerkate Rehobiam do Jihudạ ar Benjạmin gusṭiren sanam hoṛko lạṛhại lạgitʼe jarwaketʼkoa. Onate mitʼ lakh irạlgel hajar lạṛhại phạdko hoyena. Noa do hoyena jemon Israelko sãote lạṛhạikate rajosṭi do arhõ jemon Solomonren hopon Rehobiamakʼ tire ruạṛ hijukʼ.

²² Menkhan Isorren hoṛ Semaya ṭhen Isorakʼ niạ katha do sodorena,

²³ “Am do Jihudạren raj Solomonren hopon Rehobiam, Jihudạ ar Benjạmin gusṭiren sanam hoṛko ar sarecʼ sanam hoṛkom metakoa,

²⁴ Probhu Isore meneda apnar Israelko upạrte lạṛhại lạgitʼ do alo jemonko oḍok calakʼ. Onko do oṛakʼteko ruạṛokʼma, ente noa do Probhu Isorakʼ kạmikana.” Onate onko do Probhu Isorakʼ kathako bataoketʼte Probhu Isorakʼ hukum leka oṛakʼteko ruạṛ calaoena.

Jerobiamakʼ boṅga sewa

²⁵ Ona tayom Jerobiam do Eprayim buru ṭoṭha reakʼ Sikem do gaṛ nagraha lekae benaokeda ar onḍe girobasokʼe ehopʼena. Uni do onḍe khon senkate Penuel hõ gaṛ lekae benaokeda.

²⁶ Jerobiame hudiskeda, “Pasecʼ raj do arhõ Dạudakʼ bõsre ruạṛ calakʼa.

²⁷ Ente hoṛko Jerusalemre Probhu Isorakʼ oṛakʼre samaṅokʼakʼ porob lạgitʼko calakʼ khan onko do akoren kisạ̃ṛ Jihudạren raj Rehobiam gobolreko tahẽ ruạṛokʼa. Ar onko do ińko gojeńa ar Rehobiam ṭhenko ruạṛ calakʼa.”

²⁸ Unre Jerobiam raj do sopolhakate sonaren barea mĩhũi benao ocoketʼkinạ. Ar ona tayom do hoṛkoe metatʼkoa, “Jerusalemte calakʼ do ape lạgitʼ ạḍi kosṭogea. E Israelko, nokin kangeakin aperen debota do, nokinge Misor disom khon apekin oḍok ạgu akatʼpea.”

²⁹ Unkin mĩhũ modre mitʼṭen do Bethelre ar eṭagicʼ do Danreye dohoketʼkinạ,

³⁰ onate hoṛko do sewae lạgitʼ Dan hạbicʼ calakʼko ehopʼena. Ar noage onko lạgitʼ do maraṅ kạige hoyentakoa.

³¹ Jerobiam do usul boṭkocʼkore mundile benaokeda ar nonkan hoṛko tala khon naekeye bahalketʼkoa one okoe do Liwi bõsrenko baṅkan.

³² Jihudạ ṭoṭha talare oka porob hoyokʼkan tahẽkan ona porob leka irạlakʼ cando reakʼ gel mõṛẽakʼ din hilokʼre uni do Bethelre hõ mitʼṭecʼ porob reakʼe bebostakeda ar acʼe benao akade mĩhũ ńutumte pinḍ cetanre janware samaṅkedea. Uni do Bethel reakʼ usul than boṭkocʼkore hõ acʼ benaoakʼ mundilre naekekoe bahalketʼkoa.

³³ Irạl cando reakʼ gel mõṛẽakʼ dinre Bethelre acʼ benaoakʼ pinḍre uni do janwarkoe samaṅketʼkoa. Ona reakʼ okte do apnar bachaoakʼge tahẽkantaea. Nonkate uni do Israelko lạgitʼ mitʼṭecʼ porobe hoyocokeda ar janwarko samaṅko lạgitʼ pinḍe benaokeda.