1 Rapajko 11 - সান্তালী বাইবেল

Solomon kạireye ńuren

¹ Solomon raj do pharaoren hoponera chaḍa arhõ aema bidisiạ maejiukoe dulạṛetʼko tahẽkana. Onko do Moabren, Amoniren, Edomren, Sidonren ar Hittirenko tahẽkana.

² Onko do onako jạtren khongeko hecʼlena one okoe reaṅ Probhu Isor do Israelkoe metatʼko tahẽkan, “Onko do alope baplakoa, ente onko do khạṭige akoren debotako secʼ apeakʼ monko ạwiltapea.” Menkhan Solomon do onkogeye dulạṛketʼkoa.

³ Uniren do eae sae erako tahẽkantaea, ar onko do raj gharońjren hoponerageko tahẽkana; ona chaḍa uniren do pe sae chuṭki era hõko tahẽkantaea. Ar uniren erako do bạṛicʼ horteko idikedea.

⁴ Solomonakʼ haṛam umerre uniren erako do debotako secʼ uniyakʼ monko ạwilketʼtaea. Onate acʼren apat Dạud leka uniyakʼ ontor do Probhu Isor secʼ purạte do baṅ tahẽkantaea.

⁵ Uni do Sidonikoren debota Astoret ar Amonikoren debota Milkom sewawạkine ehopʼena.

⁶ Ar Solomon do Probhu Isorakʼ mẽtʼre okaṭakʼ bạṛicʼakʼkan onageye kạmikeda. Uniren apat Dạud cetʼleka Probhu Isore botoraekan tahẽkan onka do bae kạmikan tahẽkana.

⁷ Jerusalem purub reakʼ buru cetanre uni do Moabren hirkhạwạnicʼ debota Kemos ar Amonikoren hirkhạwạnicʼ debota Molok ńutumte sewawạkin lạgitʼ than boṭkocʼ koe benaokeda.

⁸ Uniren sanam bidisiạ erako okoe do apan ạpin debotako lạgitʼ dhupko jeretʼetʼ tahẽkan ar janwarko dãṛẽyetʼko tahẽkan onko sanamko lạgitʼ hõ onageye kạmikeda.

⁹ Onate Probhu Isor do Solomon cetanre ạḍitetʼe edreyena, ente okoe acʼ ṭhen bar dhaoe ńel ocolen uni Israelkoren Probhu Isor secʼ khon mon do ạcur akantae tahẽkana.

¹⁰ Uni do deb debiko secʼ alo ghańjeṛokʼ lạgitʼe manaledegea menkhan Solomon do Probhu Isorakʼ hukum bae manaoleda.

¹¹ Onate Probhu Isor do Solomone metadea, “Amakʼ noa beohar iạte ar ińakʼ bondobos ar niạmko bam bataoetʼte khạṭige amakʼ rajosṭi doń recʼmea ar amren mitʼṭen gutiyiń emaea.

¹² Menkhan amren ạpum Dạudakʼ katha disạite amakʼ jionre ona do bạń onkaea, menkhan amren hopon ṭhen khon ona doń recʼ hataoa.

¹³ Amakʼ rajosṭi reakʼ jotowakʼ do bạń recʼ cabamea, menkhan ińren guti Dạudakʼ katha ar ińiń bachao akawan Jerusalem reakʼ katha disạite mitʼ gusṭirenko do amren hoponiń danaea.”

Solomonren bạiriko

¹⁴ Inạ tayom Probhu Isor do Solomon upạrte Edomren Hadad bạiri lekateye teṅgokedea. Uni do Edomren raj bõsreye janamlena.

¹⁵ Dạud do tinre Edom disạm upạrteye lạṛhạilena unre uniren senaputi Joab do gocʼ hoṛko topako lạgitʼ Edomteye senlena. Ar onḍe tahen jokhecʼge uni do Edomren sanam herel hoponkoe gocʼketʼkoa.

¹⁶ Joab ar Israelren sanam lạṛhại phạdko do Edomre turui candoko tahẽkana ar onḍenko sanam herel hoponko gocʼ cabaketʼkoa.

¹⁷ Menkhan Hadad do acʼ apatren adom kạmiyạko sãote Misorteye dạṛleda. Ona jokhecʼ uni do gidrạgeye tahẽkana.

¹⁸ Onko do Midiạn khon mohnḍakate Paranteko parom senlena ar onḍe khon thoṛa hoṛ soṅgekate Misorren Pharao raj ṭhenko senlena. Ar Pharao do oṛakʼ-duạr khet-baṛge ar jomakʼko Hadade emadea.

¹⁹ Pharao do Hadad cetanre nunạkʼ kusiye tahẽkana je, uni do acʼ bạhu Tahpenesren bokot kuṛi sãote Hadade baplakedea.

²⁰ Tahpenesren bokot kuṛiyakʼ kukhire Hadadren do mitʼṭen hopone janamena; uniyakʼ ńutum do Genubat tahẽkana. Tahpenes do uni gidrạ raj oṛakʼreye dohokedea ar uni do onḍege eṅgat towa nunuye bạgikeda. Ar Genubat do onḍe Pharaoren hopon ar hoponerako tulucʼgeye tahẽyena.

²¹ Misorre tahenrege Hadad doe ańjomkeda, Dạud do acʼren hapṛamko sãoteye topa ocoakana ar senaputi Joab hõe gocʼena. Unre Hadad do Pharaoe metadea, “Ńitokʼ do sen ocoạńme jemon ińakʼ disạmteń ruạṛ sen daṛeakʼ.”

²² Pharaoe kulikedea, “Nonḍe do cetʼ reakʼ okulạn menakʼtamte, amakʼ disạmte ruạṛ calakʼem menjoṅ kana?” Hadade roṛ ruạṛkeda, “Cetʼ reakʼge okulạn do baṅ hoyokʼkana, menkhan enhõ iń do ruạṛ calakʼ hoyokʼtińạ.”

²³ Solomon upạrte Isor do ar mitʼṭen bạiriye teṅgokedea. Uni doe hoyokʼkana Elijadaren hopon Reson. Uni do acʼren kisạ̃ṛ Sebaren raj Hadadser ṭhen khone dạṛ akatʼ tahẽkana.

²⁴ Dạud do tinre sebaren lạṛhại phạdkoe gocʼetʼko tahẽkana unre Reson do thoṛa hoṛkoante luluṭ dole benaokeda ar acʼ do onaren mukhiyại hoyena. Noko hoṛko do Damesek nagrahako hatketʼte onḍe rajosṭi calaoko ehopʼ akan tahẽkana.

²⁵ Solomon tinạkʼ din jiwetʼe tahẽkan unạkʼ din Reson do Israelko sãote bạiriye tahẽkana ar onako dinre Hadad hõ Israelko upạrteye kạmikan tahẽkana. Israelko upạrte mitʼṭen bạiri menkate Reson do Aram disạmreye rajokʼkan tahẽkana.

Solomon upạrte Jerobiamakʼ hul

²⁶ Nabatren hopon Jerobiam hõ Solomon raj upạrteye hulkeda. Uni do Solomonren mitʼṭen gutiye tahẽkana, uni do Sereda atoren mitʼṭen Ephrayim hoṛe tahẽkana. Uniren eṅgattetʼakʼ ńutum do Serua; uni do rạnḍigeye tahẽkana.

²⁷ Raj upạrte Jerobiamakʼ hul reakʼ do mitʼṭecʼ karon tahẽkana. Solomon do Milo nagraha tinreye benaoetʼ tahẽkana ar acʼren apat Dạudakʼ nagraha reakʼ pạcrikoe jut aro ocoyetʼ tahẽkana.

²⁸ Unre Jerobiam do onḍeye kạmikan tahẽkana ar kạmi reakʼ ạḍi ńutum tahẽkantaea. Solomon do uni koṛa metakʼme Jerobiam do bes kạmiyạ hoṛ kanae menteye ńelkede khan uni do Josephakʼ bõsren sanam gutiko ńel todarotko reakʼ bhare emadea.

²⁹ Mitʼdin Jerobiam do Jerusalem bahreteye oḍok senena. Ar Siloren Ạhiạ nạbi sãote horreye ńapamena. Unre Ạhiạwakʼ hoṛmore mitʼṭecʼ nãwã cador tahẽkana. Ar horre unkin chaḍa ar celege bako tahẽkana.

³⁰ Unre Ạhiạ do acʼakʼ cador hataokate gel bar ṭhecʼe getʼ kuṭrạkeda.

³¹ Ar ona tayom do Jerobiame metadea, “Gel goṭecʼ kuṭrạ halaṅ rakabme, ente Israelren Probhu Isor do ame metamkana, ‘ńelme, iń do Solomonakʼ ti khon rajosṭiń recʼ hataoa ar gel goṭecʼ rajosṭi do amiń emama.

³² Menkhan ińren guti Dạud lạgitʼ ar Israelren sanam gusṭiko reakʼ ṭoṭha khon ińiń bachao akawan Jerusalem lạgitʼ eken mitʼ gusṭi do Solomon secʼko tahena.

³³ Iń doń onkaea, ente onko gel gusṭirenko do ińko bạgi giḍi akadińạ ar Sidonren debi Astarot, ar Moabren debota Kemos ar Amonikoren debota Milkomko sewawae kana. Solomonren apattetʼ Dạud okae cekayetʼ tahẽkan onko do bako onkayeda. Onko do ińakʼ mẽtʼre oka ṭhikakʼ baṅkan onako kạmikana, ar ińakʼ niạm ar hukumko hõ bako bataoeda.

³⁴ Enhõ Solomonakʼ ti khon goṭa rajosṭi do bạń hataoa. Ińren guti Dạud, okoe doń bachaoan tahẽkan ar okoe do ińakʼ hukum ar niạmkoe bataoetʼ tahẽkan uni lạgitʼge Jerusalem do jion bhor raj hudạń dohoya.

³⁵ Iń do uniren hoponakʼ ti khon rajosṭiń hataoa ar amakʼ tire gel gusṭirenko reakʼ bhariń emama.

³⁶ Ar ińakʼ tahen oṛakʼ lekateń bachao akawan Jerusalem nagraha do jemon iń samaṅre ińren guti Dạudakʼ mitʼṭecʼ mạli tahen onate uniren hopon do mitʼ gusṭirenko reakʼ bhariń emaea.

³⁷ Menkhan iń do amge Israelko cetanre raj doń hoyocomea ar amakʼ ontor reakʼ sana lekatem rajokʼa.

³⁸ Ińakʼ hukum lekam kạmi ar ińakʼ hortem calakʼ ar ińren guti Dạud leka ińakʼ hukum ar niạmkom pańjaete ińakʼ mẽtʼ samaṅre okaṭakʼ ṭhik onam kạmi enḍekhan iń do am sãoteń tahena. Ar Dạud lekage amakʼ bõsrenko do raj hudạreń teṅgo keṭecʼkoa ar amakʼ tire Israelkoń jimạkoa.

³⁹ Onkoakʼ bebatao iạte iń do Dạud bõsrenkoń copotʼkoa, menkhan piṛhike piṛhi do baṅa.”

⁴⁰ Ona iạte Solomon do Jerobiam goje lạgitʼe kurumuṭiyetʼ tahẽkana, menkhan uni do Misorren raj Sisak ṭhene dạṛkeda ar Solomon ạuriye gujukʼ hạbicʼ onḍegeye tahẽyena.

Solomonakʼ gujukʼ

⁴¹ Solomonakʼ rajokʼ reaṅ eṭakʼ eṭakʼ ghoṭna reakʼ kathako, metakʼme uniyakʼ kạmi ar ạkil reakʼ kathako do uniyakʼ rajosṭi reakʼ Itihas puthire ol akana.

⁴² Solomon do Jerusalemre pongel bochor hạbicʼ goṭa Israel jạtrenko cetanreye rajlena.

⁴³ Ona tayom uni do acʼren hapṛamko ṭhene calaoena. Ar acʼren apat Dạudakʼ nagrahareko topakadea. Ona tayom acʼren hopon Rehobiam do uni bodolteye rajena.