1 Rapajko 10 - সান্তালী বাইবেল

Solomon ṭhen Seba disạmren rạni

¹ Solomonakʼ namḍak ar uni hotete sodorakʼ Probhu Isorakʼ sarhao reakʼ katha ańjomkate Seba disạmren rạni do kuṭhin kuṭhin kuklikote uni biḍạue lạgitʼe hecʼena.

² Uni do ḍher hoṛko ar ũṭkoante Jerusalemte hecʼkateye seṭerena. Unre ũṭ cetanre ḍher sona, jut so mosolako, ar damanakʼ mạnik dhiriko tahẽkana. Uni do Solomon ṭhen hecʼkate monre cetʼko tahẽkantae ona jotowakʼe baḍae ocokedea.

³ Ar Solomon do uniyakʼ joto kukli reakʼ roṛ ruạṛe emadea. Raj ṭhen nonkan cetʼge kuṭhin do baṅ tahẽkana one okaṭakʼ do bae bujhạu oco daṛeade.

⁴ Sebaren rạni do Solomonakʼ ạkil ar uniyakʼ raj dolankoe ńelkeda.

⁵ Uni do arhõe ńelkeda uniyakʼ ṭebil reakʼ jomakʼ, uniren kạmiyạkoakʼ tahen jaega, mońj mońj horokʼ bande akatʼ uniren sapʼsosorko, uniren darkha rasa dudulko ar ona siṛhi, one okaṭakʼ siṛhite uni do Probhu Isorakʼ oṛakʼteye rakapʼ calakʼkan tahẽkan. Ar noako ńelte uni doe ṭhak utạrena.

⁶ Uni do raje metadea, “Ińakʼ disạm khon amakʼ kạmi ar ạkil reaṅ okaṭakʼ kathań ańjomletʼ ona do sạrikangea.

⁷ Menkhan nonḍe hecʼkate ińakʼ mẽtʼte ạuriń ńel hạbicʼ bạń pạtiạukʼkan tahẽkana. Sạrige, niạ reakʼ adha hõ iń ṭhen do baṅ lại akana. Okaṭakʼ khobor iń ńamakatʼ amakʼ ạkil ar dhon do ona khon hõ ạḍi bạ̃ṛtigea.

⁸ Amren hoṛ do ạḍi sukre menakʼkoa! Ar okoe do jao okte am samaṅreko tahenkan ar amakʼ ạkil reakʼ kathako ańjometʼ onko kạmiyạko doko bhạgangea.

⁹ Amren Probhu Isorakʼ sarhaoge baṛe hoyokʼtae ma, one okoe do am cetanreye kusi akante Israelakʼ siṅghạsonreye duṛupʼ akatʼme. Uni do Israelko jaejug hạbicʼe dulạṛetʼkote hok bicạr ar dhorom rukhiyại lạgitʼgeye raj akatʼmea.”

¹⁰ Uni do pon ṭon tala khon hõ bạ̃ṛti sona, ar ạḍi utạr jut so mosolako ar damanakʼ mạnik dhiriko raje emadea. Sebaren rạni do Solomon tinạkʼ jut so mosolakoe emade unạkʼ do tishõ disạmre ar baṅ ạgu akan tahẽkana.

¹¹ Ona chaḍa Hiramakʼ okako jahajte Ophir khon sonako ạguiyetʼ tahẽkan onako jahajte sero kaṭko ar mạnik dhiriko hõko ạguiyetʼ tahẽkana.

¹² Ar raj do onako sero kaṭte Probhu Isorakʼ oṛakʼ ar raj dolan reakʼ khunṭiko ar sekʼreń dolko lạgitʼ binạ banamko ar peṛesaṅkoe benao ocokeda. Teheń hạbicʼ ar tishõ unạkʼ sero kaṭ do disạmre ar baṅ ạguakan tahẽkana ar ńelhõ bań ńelakan tahẽkana.

¹³ Solomon raj do dan lekate ạḍi lekanakʼ jinisko Sebaren rạniye emade tahẽkana. Ona chaḍa rạni cetʼkoe khojletʼ ona sanamakʼge uni doe emadea. Inạ tayom rạni do acʼren hoṛkoante acʼakʼ disạmteye ruạṛ calaoena.

Solomon rajakʼ ṭhonok

¹⁴ Jao bochor Solomon ṭhen oka sona hijukʼkan tahẽkan ona reakʼ ojon do bargel turui ṭon tahẽkana.

¹⁵ Ona chaḍa bekʼpariko ar bạnij bepariko hõ sonako ạguiyetʼ tahẽkana.

¹⁶ Solomon raj do sona kuṭạm capṛa ocokate barsae ḍhalkoe benao ocokeda. Mimitʼ goṭecʼ ḍhalre eae keji irạl sae gram sona lagaolen tahẽkana.

¹⁷ Ona chaḍa kuṭạm capṛa akatʼ sonate uni do pe sae kạṭicʼ ḍhalko hõe benao ocokeda. Ona mimitʼ goṭecʼ ḍhalre bar kejikate sona tahẽkana. Uni do Lebanon bir oṛakʼre onakoe dohokeda.

¹⁸ Inạ tayom raj do hạti sonḍa reakʼ mitʼṭecʼ maraṅ okocʼ siṅghạsone benao ocokeda ar khạṭi sonateye tolkeda.

¹⁹ Ona siṅghạson reakʼ siṛhi do turui goṭecʼ dhapko tahẽkana ar siṅghạson tayom cetan secʼ do gulạnḍge tahẽkana. Duṛubokʼ jaega reakʼ banar secʼ do ti dohowakʼ tahẽkana ar ona jalatʼre do teṅgo akan mitʼṭen dhạcri kulakʼ muṭhạn tahẽkana.

²⁰ Ona turui goṭecʼ dhap reakʼ banarsa aṛerege mimitʼ goṭecʼkate jotote gelbar goṭen dhạcri kulakʼ muṭhạn tahẽkana. Onkan siṅghạson do eṭakʼ eṭakʼ rajosṭikore ar tishõ baṅ benao akan tahẽkana.

²¹ Solomonakʼ ńuńuwakʼ sanam bhajanko hõ sona reakʼ ar Lebanon bir oṛakʼ reakʼ sanam bhajanko hõ khạṭi sonate benao tahẽkana. Rupạ reakʼ benaoakʼ do cetʼge baṅ tahẽkana, ente Solomonakʼ oktere rupạ reakʼ dam ḍher do baṅ tahẽkana.

²² Doreãore Hiramakʼ jahaj sãote rajakʼ hõ maraṅ maraṅ Tạrsis jahajko tahẽkana. Pe bochor por por onako jahajte sona, rupạ, hạti sonḍa, hạṛũko ar marakʼkoko ạguiyetʼko tahẽkana.

²³ Solomon raj do dhạrtiren eṭakʼ sanam rapajko khon ạkilan ar kisạ̃ṛ idikʼtegeye tahẽyena.

²⁴ Solomonakʼ ontorre Isor do oka ạkile emade ona ạkilte perecʼ katha ańjom lạgitʼ dhạrti reakʼ sanam disạm khon uni sãote ńapamokʼ lạgitʼko kurumuṭuyetʼ tahẽkana.

²⁵ Ar okoeko hijukʼkan tahẽkan onko sanamkoge thoṛa baṅ thoṛa jãhãnakʼ sandesko ạguiyetʼ tahẽkana. Onako modre sona ar rupạ reakʼ bhajanko, kicricʼ khạnḍwạkʼko, khanḍa bhanḍako, jut so mosolako, sadomko ar khaccorkoko tahẽkana.

²⁶ Solomon do ạḍi utạr rãt gạḍiko ar sadomkoe jogaṛketʼkoa. Uniyakʼ rãt gạḍiko do mitʼ hajar ponsae ar sadomkoakʼ lekha do gelbar hajar tahẽkana. Uni do onako rãt gạḍiko dohoy lạgitʼ nagrahako ar Jerusalemre acʼ ṭhene dohoyetʼko tahẽkana.

²⁷ Jerusalemre rupạ do dhiri leka, ar debdạru kaṭko do latar buru ṭoṭha reakʼ loa dareko lekae hoyocokeda.

²⁸ Misor ar Kilikiạ khon do Solomon lạgitʼ sadomko ạgu ocokʼkan tahẽkana. Rajren bạnij bepariko do Kilikiạ khonko kiriń ạguiyetʼko tahẽkana.

²⁹ Misor disạm khon ạguwakʼ mimitʼ rãt gạḍiko reakʼ dam do eae keji irạl sae gram rupạ ar mimitʼ goṭen sadomakʼ dam do eae keji irạl sae gram rupạ tahẽkana. Onko bepariko do Hittiko ar Aramren sanam rapajko ṭhenko ạkhrińetʼko tahẽkana.