1 Patras 5 - সান্তালী বাইবেল

Manḍerren maraṅ mukhiyạko lạgitʼ sikhạuna

¹ Iń do Mạsiyakʼ duk sasetren goha kạnạń ar Mạsiyakʼ oka ṭhonok sodorokʼ onaren hõ bhạgiyạdar kạnạń. Onate ape modre okoe doko manḍerren maraṅ mukhiyạko kan iń do onkoren ar mitʼṭen maraṅ mukhiyạ lekate noa sikhạunań emako kana.

² Ape talare menakʼ Isorakʼ palren gupiko hoyokʼpe. Ńel todarotkope hoyokʼkante onkope ńelkoa ona do baṅ, bickom apnarakʼ monejoṅ lekatege gupikope, ente Isor do ape ṭhen onageye khojkana. Porho ńam lạgitʼ do alope kạmiya, menkhan gagoj monte kạmipe;

³ ape tabere okoe menakʼko onko cetanre mạliki alope calaoa, bickom nonkanko hoyokʼpe jemon ape ńelteko cetʼ daṛeakʼ.

⁴ Enḍekhan maraṅ gupiyicʼe ńel ocokʼre ape do jit reakʼ mala lekate uniyakʼ ṭhonokren bhạgiyạdarkope hoyokʼa, ar ona do tis hõ baṅ mosodokʼtapea.

⁵ Onkage E juạnko, ape do aperen murubbiko tabere tahenpe. Ar jotokoge nindhạn tahente mimitʼko sapʼ sopohotʼpe, ente sonot sostor reakʼ katha leka, “Isor do phulạukʼkankoe teṅgo darametʼkoa, menkhan nindhạnko doe dayawako kana.”

⁶ Onate Isorakʼ ektiạri samaṅre apnartetʼ copodokʼpe, jemon ṭhik oktere uni doe usulpe.

⁷ Apeakʼ sanam dạndiko unire lade giḍikakʼpe, ente uni do ape reaṅe dạndikʼ kana.

⁸ Apnar sambṛaokʼpe ar sontor akae tahenpe, ente aperen bạiri Soetan do hạnḍrạukʼkan dhạcri kul lekae dhãoṛa dhạ̃uṛi baṛaekana jãhãegeye utʼgotʼkaea mente.

⁹ Pạtiạure jamaṛ akae tahente Soetan teṅgo daramepe, entepe baḍaegea, goṭa dhạrtire aperen biswạsi boehako do inạ mitʼlekan duk sasetgeko jomeda.

¹⁰ Joto secʼteye dayawape kan Isor do acʼakʼ jaejug ṭhonokren bhạgiyạdarko hoyokʼ lạgitʼe hohoakatʼpea, ente ape do Mạsi tulucʼpe kolom mitʼ akana. Ar thoṛa din dukpe jomle anecʼ Isor do acʼgeye sạbit utạrpea are kajak ocopea, daṛeye emapea ar keṭecʼ rehetʼ cetanreye teṅgopea.

¹¹ Uniyakʼ ektiạri do jaejug habicʼ tahẽakae tahen ma. Amen.

Mucạtʼ katha

¹² Siluạnus, okoe do ińren pạtiạrạnicʼ boehań metaekan, uni hotete noa ciṭhi do thoṛa kathate ape ṭheniń olkeda, jemon iń do apeń udgạu daṛeape ar Isorakʼ sạriạkʼ reakʼ dayaren gohań em daṛeakʼ. Ape do Isorakʼ noa dayare ṭarhao akan tahenpe.

¹³ Isor do ape sãote okoekoe bachao akatʼko Babel reakʼ ona manḍerren hoṛko do joharko emape kana, ar ińren hopon Mark hõe joharape kana.

¹⁴ Dulạṛ reakʼ cokʼte jopoharpe. Ar okoe do Mạsirenpe hoyakan, ape jotoko tulucʼ suluk baṛe tahen ma.