1 Patras 4 - সান্তালী বাইবেল

Isor lạgitʼ jion khemao reaṅ

¹ Onate Mạsi do hoṛmore duke sahaoletʼte ape hõ apnarakʼ ontorre inạ mitʼ monsubạge benao rakabtape, ente hoṛmore okoe duke jom akatʼ uni do kại reakʼ heowa khone thir akana.

² Onate noa dhạrti reakʼ sarecʼakʼ jion uni do dhạrti reakʼ rij roṅte bae khemaoa, bickom Isorakʼ monejoṅakʼ lekageye khemaoa.

³ Okoe Isor bako baḍae akade onko leka ape hõ lahate umtạ umti, bạṛicʼ sana, ńũ bhuteṛokʼ, rij roṅ, matalokʼ, ar hirkhạwakʼ boṅga sewarepe taṛametʼ tahẽkana.

⁴ Menkhan ńitokʼ do onko hoṛge ape ńelteko hahaṛakʼkana, ape do onkoakʼ bạṛicʼ lucạ lamoṭkore ar bape seledokʼkana, onate onko do apeko dusạuetʼpea.

⁵ Menkhan okoe jiwetʼ ar gocʼko bicạrko lạgitʼe sapṛao tearakan menae, onko do uni ṭhen hisạb emokʼ hoyokʼtakoa.

⁶ Gocʼko ṭhen hõ coṅ ona iạte Mạsi reaṅ bhage sombat porcarlen, jemon hoṛmo secʼte manwa leka bicạr hoylentakore hõ Jiu secʼte onko do Isor leka jiwetʼko tahẽdaṛeakʼ.

⁷ Nitokʼ do sanamakʼ reakʼ mucạtʼ okteko seṭer akana. Onate apeakʼ mon do kajak akae dohoytape ar apnarte sambṛaokʼpe jemonpe koejoṅ.

⁸ Sanam khon maraṅ katha do hoyokʼkana, ape apere khạndri dupulạṛ baṛe tahentape ma, ente dupulạṛ do ạḍi utạr kạiye dapala.

⁹ Begor karacʼ kurujokʼte ape apere peṛakʼpe.

¹⁰ Ar ạḍi lekate sodorokʼkan Isorakʼ daya ńamkate okoe hoṛ do pạtiạr salakʼ kạmire onae lagaoetʼkan, onkan hoṛ lekate ape do Isor ṭhen khon okalekan danpe ńamakatʼ ona baṛe ape apere sapʼ sopohotʼ lạgitʼ beoharpe.

¹¹ Jãhãeye porcar khan, enḍekhan nonka lekae porcar ma jemon uni do Isorakʼ moca reakʼ kathae roṛeda mente. Ar jãhãye sapʼ sopohotʼ khan enḍekhan Isor emakʼ daṛete uni doe sapʼ sopohotʼma, jemon Jisu Mạsi hotete jotowakʼre Isorge ṭhonoke ńam. Ente daṛe ar ṭhonok do jaejug hạbicʼ uniyakʼge. Amen.

Khristan lekate duk jom

¹² E gateko, ńitokʼ do biḍạu seṅgel talate calakʼ hoyokʼ kantapete hahaṛakʼ tulucʼ alope hudisa je, apere ạnạṛi jãhãnakʼ hoyokʼkana mente.

¹³ Ona khon bickom Mạsiyakʼ duk jom reakʼ bhạgiyạdarkope hoyakante rạskạkʼpe, jemon uniyakʼ mạhima sodorokʼre ape do rạskạtepe perejokʼ.

¹⁴ Mạsi iạtepe henosta ocokʼkan khan enḍekhan ape dope bhạgangea, ente Isorakʼ mạhimate perecʼ akan Jiu do apere menaea.

¹⁵ Ape modre okoe hõ khũniạhi, kombṛo, bạṛicʼ kạmiyicʼ se eṭakʼkoakʼ babotre duk aloe jomma.

¹⁶ Menkhan Khristan lekate jãhãe duke jomlere aloe lajaokʼma, bickom uniyakʼ do ona ńutum menakʼtaete Isore sarhaoema.

¹⁷ Bicạr reakʼ okte do hoyakana ar ona do Isorakʼ gharońjren hoṛko khonge ehobokʼa. Ar ona bicạr do abo khonge ehopʼlen khan, enḍekhan okoe Isorakʼ bhage sombat bako manao akatʼ onko do cetʼ dosa hoyokʼtakoa?

¹⁸ Sostorre menakʼa, Isor bhokti hoṛkoakʼ bańcao ńam nunạkʼge keṭecʼge khan, kạkạiko ar Isor bebhoktiko do cetʼ dosa hoyokʼtakoa?

¹⁹ Enḍekhan Isorakʼ monejoṅ lekate okoe dukko sahaoetʼkan, onko do akoren pạtiạricʼ sisirjạuicʼakʼ tire apnartetʼko jimạkʼma ar bhage kạmiko kạmi idima.