1 Patras 3 - সান্তালী বাইবেল

Bạhu ar jãwãe lạgitʼ sopolha

¹ Onkage E maejiuko, ape do aperen jãwãeko ṭhen gobol akan tahenpe, jemon jãhãe hoṛ Isorakʼ kathare bako pạtiạulenre hõ apeakʼ colonte onko do Mạsi secʼko ạwilokʼ. Onate ape do mitʼṭecʼ katha hõ roroṛ baṅ lagaoapea,

² ente onko do akotege apeakʼ sonot jion ar Isor secʼ bhoktiko ńel ńama.

³ Nana parkan upʼ reakʼ paṭetʼ galaṅokʼ, sona abhranko se mońj mońj sapapʼte apnar sajaokʼ do alope monejoṅa,

⁴ bickom okaṭakʼ reakʼ cehratetʼ baṅ maraokʼ, ona mạ̃hir ar nindhạn colonte apeakʼ ontor sajaotape. Isorakʼ mẽtʼãhã samaṅre onage bạ̃ṛti damanakʼ kana.

⁵ Sedaeren Isor bhokti maejiuko hõ Isorre bhorsa akanko tahẽkana ar apan apin jãwãe tabere tahẽkate nonkageko sajaokʼkan tahẽkana;

⁶ cetʼ leka Sara do Abraham gobolreye tahẽkana ar uni do mạlik menteye hohowaekan tahẽkana. Okaṭakʼ bhageakʼkan ona bin botortepe kạmi idile khan, enḍekhan noage sạbudokʼa je, ape do Sararen hoponko kanape mente.

⁷ Onkage ape hõ E jãwãeko, ape do bujsujte aperen bạhuko tulucʼ tahenpe. Onko do aperen nijor soṅgeten kanako, ar onko hõ ape tulucʼ Isorakʼ daya reakʼ dan lekate jionko ńama. Onate onko manotkope jemon apeakʼ koejoṅ alo akoṭokʼtape.

Duk jom reaṅ

⁸ Mucạtʼre katha do nõkʼõe, ape sanamkoakʼ mon jemon mitʼ lekage hoyokʼ. Ape do mimitʼkoakʼ dukre dukokʼpe, boeha leka dupulạṛpe, daya ar nindhạnko hoyokʼpe.

⁹ Bạṛicʼ bodol okoe hõ bạṛicʼ alope hala ruạṛakoa se jãhãeko egerlepere alope eger ruạṛkoa, bickom bhorakope; ente bhor ńam lạgitʼge Isor doe hohoakatʼpea.

¹⁰ Sonot sostorre olakana, Okoe sukte jion khemaoe menjoṅkan ar bhage din ńeljoṅ lạgitʼe asokʼkan, uni do bạṛicʼ kathako khon acʼakʼ alaṅ, ar eṛeakʼ kathako khon acʼakʼ luṭiye sambṛaotaema.

¹¹ Uni do bạṛicʼ kạmi khone sahaṛokʼ ma, ar bhageakʼe kạmima; suluk ńam lạgitʼe kurumuṭuiyma. Ar ona do aloe bạgiyakʼ ma.

¹² Okoe dhorom horteko calakʼkan Probhu Isorakʼ mẽtʼ do onkore menakʼa, ar onkoakʼ koejoṅ ańjom lạgitʼ uniyakʼ lutur do jhicʼge menakʼtaea; menkhan okoe bạṛicʼakʼko kạmikan, Probhu Isor do onko upạrteye teṅgona.

¹³ Bhage kạmi lạgitʼpe ahkaokʼkan khan, enḍekhan okoeye hạ̃n daṛekepea?

¹⁴ Ar Isorakʼ sana leka calakʼre dukpe jomle khan, enḍekhan ape dope bhạgangea. Okoe duk ar kosṭoko emapekan onko do alope botorakoa se duk sasetre hõ alope torasokʼa,

¹⁵ bickom Mạsi do apeakʼ ontorre Probhu Isor mente jaega emaepe. Apeakʼ as ar bhorsa reaṅ jãhãeko kulipe khan, enḍekhan roṛ ruạṛako lạgitʼ jaoge sapṛao akae tahenpe, menkhan ona reakʼ roṛruạṛ do mạ̃hir ar bhodro salakʼ emakope.

¹⁶ Apeakʼ bibek do sapha dohoytape, jemon Mạsiren hoṛ lekate apeakʼ bhage colon iạte okoeko oktawape onko do lajaoreko paṛaokʼ.

¹⁷ Bạṛicʼakʼ kạmikate kosṭo ńam khon bickom Isorakʼ sanate bhageakʼ kạmikate kosṭo ńamge bhagea.

^18-19 Mạsi hõ kại iạte mitʼ dhaogeye gocʼlena. Isor ṭhen idibon lạgitʼ uni dhorom hoṛ do kại hoṛko lạgitʼ, metakʼme, abo lạgitʼe gocʼlena. Uni do hoṛmo secʼteye gocʼ ocolena, menkhan Jiu secʼteye jiwetʼ beretʼ ocoyena ar bondi akan jiuko ṭhen hõ senkateye porcarleda.

²⁰ Sedaere Noha do jahaje benaokan tahẽkanre Isor do sombhurikate tinreye ńel hohorkan tahẽkana unre okoeko bebataoletʼ onko jiuko do onkoren kangeako. Ar ona jahajreko decʼen eken thoṛa hoṛge, metakʼme eken irạl hoṛge ona dakʼ khon rukhiyạko ńamleda.

²¹ Noa do hoyokʼ kana bạptisma reakʼ mitʼṭecʼ nạmuna one okaṭakʼte ńitokʼe bańcaope. Bạptismate apeakʼ hoṛmo khon mạilại ocokʼ giḍi daṛeakʼa ona do baṅ; Isor ṭhen noa do mitʼṭecʼ bhage bibek reakʼ hohokana. Ape do Jisu Mạsiyakʼ gujukʼ ar jiwetʼ beredokʼ hotetepe bańcao ocoakana.

²² Jisu do sermateye calao akana ar ńitokʼ Isorakʼ jojomsa aṛere menaea, ar sermaren goḍetko, ar ektiạrianko ar daṛeanko do uniyakʼ gobolre menakʼkoa.