1 Korinthiko 9 - সান্তালী বাইবেল

Apostolkoakʼ ạidạri

¹ Iń do cetʼ sạdhin doń baṅkana? Iń do cetʼ apostol doń baṅkana? Aboren Probhu Jisu do cetʼ bạń ńelakadea? Probhu Isor lạgitʼ okaṭakʼ iń kạmi akatʼ ona reakʼ jo do cetʼ ape dope baṅkana?

² Eṭakʼko apostol mente bako aṅgocińre hõ ape do apostol mentepe aṅgocińạ. Ape je, Probhu Isorren hoṛpe hoyakan onage ińakʼ apostol hudạ reakʼ sạbudtetʼ do.

³ Ar okoe ińakʼ apostol hoyokʼ reakʼ kukliye rakab onko ṭhen ińakʼ roṛ ruạṛ do noage,

⁴ ale do cetʼ jom ńũi reakʼ hok bạnukʼtalea?

⁵ Eṭakʼ sanam apostolko, Probhu Isorren boehako ar Kephasteko cetʼ leka akoren bạhuko seletʼ porcarko oḍokokʼkan, onkage Mạsire pạtiạu akan bạhuko seletʼ porcar oḍokokʼ reakʼ ạidạri do cetʼ bạnukʼtalea?

⁶ Barnabas ar ińge cetʼ kạmikate jojom hoyokʼ tạlińa?

⁷ Apnarakʼ poesa khorockate palṭon kạmi do okoeye kạmikana? Ar okoe darkha bagwane benaoetʼkan uni do cetʼ ona reakʼ jo bae jomeda? Se okoeye gupikan uni do cetʼ palrenkoakʼ toa bae ńũiya?

⁸ Iń do cetʼ eken manwa dharatege noakoń roṛeda? Moseyakʼ ạn-ạriko hõ cetʼ noako do bae menetʼkana?

⁹ Onare ol akana, “Ekʼen kan ḍaṅgra do moca alom toltaea.” Isor do cetʼ eken ḍaṅgrako lạgitʼgeye dandokʼkana?

¹⁰ Uni do cetʼ abo lạgitʼge noa katha do bae meneda? Hẽ noa katha do abo lạgitʼge olakana; ente siokʼkạnicʼ do askatege siokʼ lek taea; ar enokʼicʼ hõ bhag ńam reakʼ astege enokʼ hoyokʼtaea.

¹¹ Ale do apere Jiu reakʼ itạle er akatʼte ape ṭhen khon hoṛmo reakʼ jom-ńũiyakʼle tear khan enḍekhan ona do cetʼ maraṅ katha kana?

¹² Noa lạgitʼ ape cetanre eṭakʼkoakʼ bakhra menakʼtako khan enḍekhan ale do artetʼ ńam lek dole baṅkana? Menkhan ona hok do bale laṛcaṛeda bickom sanamakʼle sahaoeda, jemon Mạsiyakʼ bhage sombat porcarre jãhãn tạkicʼakʼ alole hoyokʼ.

¹³ Ape do cetʼ bape baḍaea, okoe mundil reakʼko kạmikan onko do mundil khonge jomakʼko ńama, ar okoe pinḍreko kạmikan onko do pinḍre jãhãnakʼge samaṅokʼkan ona reakʼ hạṭińko ńama mente?

¹⁴ Onkage Probhu do bhage sombat porcarko lạgitʼ noae hukum akada, okoe bhage sombatko porcaretʼkan onko do ona khonakʼge jom ar ńũiyakʼ reakʼko ńama.

¹⁵ Menkhan iń do noa reakʼ cetʼge bạń beohar ạguakada. Ape do iń lạgitʼ nonkape hoyocoe reakʼ do bạń oletʼkana. Ente jãhãe ińakʼ sarhaoakʼko ạuṛiyagtiń khan ona khon boroṅ gujukʼge bogetińạ.

¹⁶ Iń do bhage sombatgeń porca akada, enrehõ onate sarhaokʼ reakʼ cetʼge bạnukʼtińạ, ente ona do kạmi lagaoạńgea. Bhage sombat bạń porcarle khan ińre do hae hae!

¹⁷ Iń do apnar kusiteń porcaretʼ khan, enḍekhan kuṛại do menakʼgetińạ, ar apnar kusite bạń porcaretʼ kanrehõ iń cetanre ona bhar menakʼte onań kạmikana.

¹⁸ Enḍekhan ińakʼ kuṛại do cetʼ? Ona do noage je, bhage sombatiń porcar bodolte ińakʼ oka paona menakʼ ona hatao baṅkate begor poesate onań kạmi daṛeakʼ.

¹⁹ Iń do jãhãeren golamiń baṅkanre hõ sanamkoren golamiń hoyakana, jemon Mạsi lạgitʼ ḍher hoṛiń lab daṛeako.

²⁰ Jihudiko labko lạgitʼ do Jihudiko ṭhen Jihudi lekań hoyakana. Ente Moseyakʼ ạn-tạriren iń baṅkanre hõ okoe ạn-tạrire menakʼko onko labko lạgitʼ onko lekań hoyakana.

²¹ Arhõ okoe ạn-tạri bahrere menakʼko onko labko lạgitʼ iń do ạn-tạri bahreren hoṛ lekań hoyakana. Onate Isorakʼ ạn bahrere minạńa ona do baṅ; iń do Mạsiyakʼ ạn taberege minạńa.

²² Pạtiạure okoeko nijorge onko ṭhen do onko lekan hoṛgeń hoyakana, jemon Mạsi lạgitʼ purạteń lab daṛeako. Metakʼme sanamko ṭhen iń do sanamakʼgeń hoyakana jemon jãhãlekate thoṛa hoṛiń bańcao daṛeako.

²³ Iń do bhage sombat lạgitʼge noakoń onkayeda jemon onaren bhạgiyạdariń hoyokʼ.

²⁴ Ape do cetʼ bape baḍaea ńir haparao enecʼre jotokogeko seledokʼa, menkhan eken mitʼ hoṛge kuṛại doe ńama? Onate ape hõ nonka dạṛpe jemon kuṛạipe ńam daṛeakʼ.

²⁵ Okoe dạṛ enecʼreko seledokʼkan onko do laha khonge mitʼṭecʼ niạm bhitriteko bolokʼa. Onko do okaṭakʼ jid ṭupri mosodokʼ ona ńam lạgitʼko onkayeda, menkhan abo do bin mosodokʼ ṭupri ńam lạgitʼge one okaṭakʼ do tisge baṅ nosṭokʼ.

²⁶ Onate ạuṛiyakʼ do bạń dạṛeda. Ar okoe hoeye daletʼkan onka do bạń kuhạueda.

²⁷ Iń do bickom hoṛmogeń kuhạu gaṅetʼtińạ ar golam akae iń dohoyeda, jemon eṭakʼko ṭhen bhage sombat porcar tayom ińakʼ kuṛại ńam lạgitʼ belek bạń hoyokʼ.