1 Korinthiko 6 - সান্তালী বাইবেল

Biswạsiko talare mambla-mokordoma

¹ Ape modren jãhãe hoṛ eṭakʼ boeha upạrte lạlis reakʼ jãhãnakʼ menakʼtae khan, enḍekhan oka dilte uni do sonotko ṭhen calao baṅkate boṅgan hoṛko ṭhen bicạre khojkana?

² Ape do cetʼ bape baḍaea, Isorren hoṛkoge dhạrti reakʼko bicạra mente? Ar dhạrti reakʼpe bicạr khan, enḍekhan huḍiń utạrakʼko bicạr lạgitʼ do cedakʼpe belekgea?

³ Ape do cetʼ bape baḍaea, abo do serma goḍetkoakʼ hõ bon bicạra mente? Ar onage hoyokʼ khan enḍekhan dhạrti reakʼko reaṅ ma coṅ thoṛawakʼkange.

⁴ Apeakʼ nonkan jãhãn lạlis tahentape khan, enḍekhan okoe do manḍerrenko baṅkan onkankoge cetʼ bạisirepe duṛupʼ ocoyetʼkoa?

⁵ Iń do lajao ocope lạgitʼge noa katha doń roṛeda. Ape talare akelan nonkanicʼ cetʼ jãhãe bạnuea, one okoe do apnar boehako talare gulmalkoe bicạr chinḍạu daṛeke?

⁶ Ona bodolte ape do boeha upạrtepe lạliskana, ar ona hõ bepạtiạrko ṭhenge!

⁷ Ape do mimitʼ hoṛ upạrtepe mamblakʼ kante noage sạbudokʼ kana je, ape dope bhagao ocoakana. Ona khon bickom behok ocokʼge cedakʼ bape sahaoeda? Ar cedakʼ bape recʼ ocokʼkana?

⁸ Ona bodolte apegepe behokeda, arpe rerecʼ kana ar ona do aperen boehako cetanregepe onkayeda!

⁹ Ape do cetʼ bape baḍaea, bedhoromko do Isorakʼ raj bako ạidạrijoṅa mente? Alope bulạukʼa; baṅ do loṭghuṭiko, baṅ do boṅga sewako, baṅ do laṭghaṭko, baṅ do laṅcạṅgiạko, baṅ do jojognako;

¹⁰ baṅ do kombṛoko, baṅ do dhon lalociạko, baṅ do bulokʼko, baṅ do cokakʼ baklakʼ roroṛko, baṅ do luluṭko, onko do okoege Isorakʼ raj do bako ạidạri joṅa.

¹¹ Ape modre adomko do onkageko tahẽkana, menkhan Probhu Jisu Mạsi ńutumte ar aboren Isorren Jiu hotete ape dope ạrupʼ sapha ocoakana, ar Isor lạgitʼpe sonot ocoakana arpe dhorom ocoakana.

Sanam lekan laṭghaṭ reaṅ

¹² Adom adomko doko mena “Jotowakʼge ganokʼtińạ,” menkhan jotowakʼ do baṅ porhoana. Jotowakʼge ganokʼtińạ, menkhan okaṭakʼte hõ bạń tabe ocokʼa.

¹³ Ar noa katha hõ roṛakana, “Jomakʼ do lacʼ lạgitʼ, ar lacʼ hõ jomakʼ lạgitʼge.” Menkhan mitʼ din Isor do noakin banargeye maraoa. Hoṛmo hõ loṭghuṭi lạgitʼ do baṅkana bickom ona do Probhu Isor lạgitʼge ar Probhu Isor do hoṛmo lạgitʼge.

¹⁴ Isor do acʼakʼ daṛete gocʼko khon Probhu Isore jiwetʼkedea ar abo hõe jiwetʼ beretʼ bona.

¹⁵ Ape do cetʼ bape baḍaea, apeakʼ hoṛmo do Mạsiyakʼ hoṛmo hạṭińko kana mente? Enḍekhan Mạsiyakʼ hoṛmo hạṭińko hataokate cetʼ iń do kusmbiyakʼ hoṛmo hạṭińkoń hoeocoya? Tis hõ baṅa.

¹⁶ Se bape baḍaea, kusmbire jamaṛ akanicʼ do uni tulucʼe mitʼ hoṛmokʼ kana mente? Ente sostorre olakana, “Unkin do mitʼ hoṛmokin hoyokʼa.”

¹⁷ Menkhan Probhu Isor tulucʼ mitʼakanicʼ do uni tulucʼe mitʼ Jiugea.

¹⁸ Sanam lekan loṭghuṭi khon ńir joṅpe. Ente manwa okakoe kạiyetʼkan ona do acʼakʼ hoṛmo bahrereye onkayeda; menkhan okoeye loṭghuṭiyetʼkan uni do acʼakʼ hoṛmo upạrtegeye kạiyeda.

¹⁹ Se bape baḍaea, apeakʼ ontorre okoeye tahenkan ar okoe do Isor ṭhen khonpe ńamakade, uni sonot Jiuakʼ tahen mundilge apeakʼ hoṛmo hạṭińko kana mente?

²⁰ Ape do apnar lạgitʼ dope baṅkana; ente aema damtepe kiriń ocoakana; onate apeakʼ hoṛmo do Isorakʼ mạhimakʼ lạgitʼ emokʼpe.