1 Korinthiko 5 - সান্তালী বাইবেল

Boehae doslere ḍanṭaoe

¹ Ańjomokʼ kana, ape talare loṭghuṭi hoyokʼ kana, ar ona loṭghuṭi do nunạkʼ hirkhạwakʼge je, boṅgan hoṛ jạtrenko talare hõ onkanakʼ do bạnukʼanaṅ. Ente mitʼṭen hoṛ do acʼren kạki eṅgattetʼ acʼren bạhu menteye dohoakadea.

² Ar noa tayom hõ ape dope gorbokʼ kana! Bickom ape dope mon dukkokʼa honaṅ, jemon nonkae kạmiketʼicʼ do ape tala khone oḍok ocokʼ?

³ Hoṛmo secʼte ape sãote hạjir bạnuńre hõ Jiu secʼte do hạjirge minạńa. Okoe nonkae kạmiakatʼ, uni do ape ṭhen minạń lekageń bicạr akadea.

⁴ Ińakʼ bicạr do noage, aboren Probhu Jisu ńutumte mitʼ ṭhenpe jarwakʼre iń hõ Jiu secʼte ape tulucʼ iń tahena ar Probhu Jisuakʼ daṛe do abo cetanre tahena,

⁵ unre uni hoṛ do Soetan tire jimạkae hoyokʼa, jemon uniyakʼ hoṛmo ḍahao maraokʼtae menkhan Jiu do Probhu Jisuakʼ hijukʼ dinre bańcaoe ńam.

⁶ Sarhaokʼ do ape lạgitʼ baṅ bhagea. Ape do cetʼ bape baḍaea je, kạṭicʼ culuṅ khạmi do joto sipiyakʼ holoṅgeye phulạu ocoya mente? Ape khon ona mare khạmi baṛe oḍok giḍikakʼpe;

⁷ jemon bin khạmiyanakʼ nãwã sipiyakʼ holoṅpe hoydaṛeakʼ; ar ape do bin khạmiyanko kangeape, ente aboakʼ bańcao porobren dãṛẽ doe teṅgenena metakʼme Mạsige.

⁸ Onate mare khạmi, metakʼme hiskạ ar bạṛicʼakʼ reakʼ khạmite do alo, menkhan nirạ ar sạriyakʼ reakʼ bin khạmiyanakʼ piṭhạte bon porobokʼma.

⁹ Ińakʼ ciṭhiren olatʼpe tahẽkana, loṭghuṭi hoṛko tulucʼ jemon alope mesaokʼ.

¹⁰ Noa dhạrtiren loṭghuṭiko, lalocko, luluṭko se boṅga sewako tulucʼ gatekʼ do bạgi utạr hoyokʼtapea ona do baṅ, ente onka khan ma noa dhạrti khon bahrete calakʼ hoyokʼtape.

¹¹ Menkhan iń do okań olatʼpe tahẽkan ona do noage, okoe acʼte biswạsi boehae ńumogokʼ kan, menkhan uni do loṭghuṭiyicʼ se dhon lalocicʼ, se boṅga sewayicʼ se oktayicʼ se ńu bulokʼicʼ seye luluṭicʼkan enḍekhan uni tulucʼ do gate hõ alope gatekʼa ar jom hõ alope jom-ńũiya.

^12-13 Manḍer bahreren hoṛko bicạrko reakʼ do cetʼ jạruṛ paṛao akawạdińa? Menkhan manḍerren hoṛko bicạrko do cetʼ lek baṅ kantapea? Okoeko bahreren kan onkoakʼ do Isorgeye bicạra. Sonot sostor reakʼ katha leka, “Ape tala khon uni bạṛicʼ hoṛ do oḍok giḍikaepe.”