1 Korinthiko 2 - সান্তালী বাইবেল

¹ E boehako, ape ṭheniń senlen tahẽkanre ar Isorakʼ bhage sombat iń jạhiratʼpe tahẽkan oktere mońj katha se ạḍi akelan hoṛ leka do bạń galmarao akawatʼpea.

² Ińiń goṭawan tahẽkana, ape ṭhen tahen jokhecʼ Jisu Mạsige metakʼme, kurusledeyicʼ Jisu Mạsi baḍaeye chaḍa ar cetʼge bạń baḍaejoṅa.

³ Tinre apeko ṭheniń tahẽkana unre iń do nijorgeń ạikạuetʼ tahẽkana ar botorteń thar tharaokʼkan tahẽkana,

⁴ ińakʼ porcar ar ińakʼ roṛre hoṛko rạmjạu ocoko leka akelte perecʼ bidiyạ hõ baṅ tahẽkantińạ, bickom onare sonot Jiuakʼ daṛege ńelokʼkan tahẽkana,

⁵ jemon apeakʼ biswạs do manwakoakʼ akelre ṭehãḍ baṅkate Isorakʼ daṛe cetanrege ṭehãḍokʼtape.

Sonot Jiu emakʼ akel reaṅ

⁶ Okoeko Mạsiyakʼ Jionreko hara sạbit akan onko ṭhen do akel reakʼ kathagele roṛeda; menkhan ona akel do noa dhạrti reakʼ baṅkana, se noa jugren mukhiyạkoakʼ hõ baṅkana one okoe doko parom calakʼko kan;

⁷ menkhan ale do Isorakʼ akelte perecʼ okoakʼ kathakogele roṛeda, one oka do dhạrti ạuri sirjạu khon Isore niṭ dohoakatʼ tahẽkan jemon uniyakʼ ṭhonok reakʼ bhạgiyạdar bon hoydaṛeakʼ.

⁸ Menkhan niạ jugren cakʼlaoko modre okoe hõ ona do bako baḍaeleda; enteko baḍaele khan ṭhonokren Probhu Isor do ohogeko kuruslea.

⁹ Menkhan sonot sostor reakʼ katha leka; “Isor okoeko dulạṛedekan onko lạgitʼ uni okakoe ṭhik dohoakatʼ, ona do okoe hõ mẽtʼte bako ńelakada, luturte bako ańjom akada ar hudis hõ bako hudis akada.”

¹⁰ Menkhan Isor do acʼren Jiu hotete onako abo ṭhene sodor akada, ente sonot Jiu do bin baḍaeyakʼ mente cetʼge bạnukʼtaea; ente uni do Isorakʼ khạndriakʼko hõe baḍaegea.

¹¹ Manwako modre nonkan okoe menaea, one uni do eṭagicʼakʼ mon reakʼ kathae baḍaekan? Manware okoeṭakʼ Jiu menae eken unige acʼ apnarakʼ monejoṅakʼe baḍaea. Onkage Isorren Jiu chaḍa Isorakʼ monejoṅakʼko do eṭakʼ okoe hõ ohogeko baḍae daṛelea.

¹² Abo do dhạrtiren Jiu do babon ńamakadea, bickom Isor khonakʼ uniren Jiuge bon ńamakadea, jemon Isor okae danakatʼ ona bon bujhạu daṛeakʼa;

¹³ ar ona danko reakʼ kathage roṛ hõ bon roṛ baṛayeda. Ona roṛ lạgitʼ okako katha bon laṛcaṛetʼkan ona do manwakoakʼ akel khon cecetʼakʼ ńamkate do babon roṛeda, menkhan sonot Jiu reakʼ cecetʼakʼ hotete bon roṛeda. Jiu reakʼ sạri cecetʼakʼ lạgitʼ abo do Jiu reakʼ kathage bon roṛeda.

¹⁴ Okoe Jiurene baṅkan, uni do Isorren Jiu ṭhen khon oka hijukʼ ona bae aṅgoca; ente uni ṭhen ona do lelhateakʼ kana. Uni do onako bae baḍae daṛeakʼa, ente sonot Jiu bae cetʼae khan onako do ohoe tojbij daṛelea.

¹⁵ Okoe hoṛ doe Jiutenicʼkan uni do jotowakʼkoe tojbijeda, menkhan okoe hõ uni do bako tojbij daṛeaea.

¹⁶ Sonot sostorre olakana, “Probhu Isorakʼ mone do okoeye baḍae akatʼte, uni doe sikhạu daṛekea?” Menkhan abo do Mạsiyakʼ mon bon ńam akawana.