1 Korinthiko 15 - সান্তালী বাইবেল

Jisu Mạsiyakʼ jiwetʼ beredokʼ reaṅ

¹ E boehako, ape oka bhage sombat iń porcaratʼpe tahẽkan, ona bhage sombat reakʼ kathageń disạ ocoyetʼpea. Ape do onape ataṅakada ar onarepe teṅgo ṭarhao akana.

² Okaṭakʼ kathań porcaratʼpe tahẽkan onage kajakte sapʼ akaepe tahen khan enḍekhan ona bhage sombat hotete kại khon bańcaope ńametʼa, khạjuk apeakʼ pạtiạu ạuṛiyakʼ alo hoyokʼ.

³ Ente okaṭakʼ iń ńamakatʼ ona do sanam khon jạruṛanakʼ mente ape hõń em akawatʼpea; ona do hoyokʼ kana sonot sostor reakʼ katha leka Mạsi do aboakʼ kại gunạkʼteye gocʼlena,

⁴ are topa ocolena, ar sonot sostor reakʼ katha leka pe mãhã hilokʼre gocʼko khone jiwetʼ beretʼ ocoyena,

⁵ uni do Patras ar tayomte acʼren apostolko ṭhene ńel ocoyena.

⁶ Ona tayom uni do mitʼ dhãote mõṛẽ sae khon hõ ḍher boehako ṭhene ńel ocolena. Onko modre adom doko gocʼ akanre hõ ḍher hoṛge ńitokʼ hõ jiwetʼ menakʼkoa.

⁷ Ona tayom uni do Jakob ṭhen ar tayomte do sanam apostolko ṭhene ńel ocoyena.

⁸ Ar sanamko tayom do iń lenda ṭũriạ ṭhen hõe ńel ocoyena.

⁹ Ente apostolko modre ińge sanamko khoniń nicạṛgea, ar apostol ńumugokʼ lek hõń baṅkana, ente Isorakʼ manḍerren koń khedletʼkoa.

¹⁰ Menkhan ńitokʼ okań hoyakan ona do Isorakʼ dayategeń hoyakana. Iń cetanre uniyakʼ daya do baṅ ạuṛiyakʼ akana; ar eṭakʼ sanam apostolko khon iń do ḍheriń khaṭao akana; ar eken ińiń khaṭao akan ona do baṅ bickom ińre Isorakʼ daya hõ tahẽkana.

¹¹ Ona iạte ińge baṅ cetʼ ar onkoge baṅ cetʼ, ale do noa reaṅle porcareda ar ape do onagepe pạtiạuada.

Gocʼko jiwetʼ beredokʼ reaṅ

¹² Mạsi gocʼko khone jiwetʼ beretʼ ocoakan khan enḍekhan ape modren adomko do cekateko meneda gocʼkoakʼ jiwetʼ beredokʼ do bạnukʼ anaṅ?

¹³ Gocʼko bako jiwetʼ beredokʼ khan enḍekhan Mạsi hõ bae jiwetʼ beretʼ ocoakana;

¹⁴ ar Mạsi bae jiwetʼ beretʼ ocoakan khan aleakʼ porcar hõ ạuṛiyakʼ getalea ar apeakʼ biswạs hõ ạuṛiyakʼgea.

¹⁵ Ona chaḍa noa kathage sạbudokʼ kana je, Isor reaṅ abo do eṛe goha bon emeda, ente aboakʼ goha do noage je, Isor do Mạsi gocʼko khone jiwetʼ beretʼ akadea. Menkhan gocʼkoakʼ jiwetʼ beredokʼ bạnukʼ khan uni do Mạsi hõ bae jiwetʼ beretʼ akadea,

¹⁶ ente gocʼko bako jiwetʼ beretʼ ocoakan khan Mạsi hõ bae jiwetʼ beretʼ ocoakana.

¹⁷ Ar Mạsige bae beretʼ ocoakan khan enḍekhan apeakʼ biswạs hõ ạuṛiyakʼgea ar ńit hạbicʼ hõ ape do kạirege menakʼpea.

¹⁸ Enḍekhan Mạsi sãote kolom mitʼkate okoeko gocʼakan onko hõko nosṭoyena.

¹⁹ Mạsire asjoṅakʼ do eken niạ jion bhorge hoylen khan enḍekhan sanam manwako modre aboge joto khon bạ̃ṛti mãyãwan lek kanabon.

²⁰ Menkhan Mạsi do sạriyakʼge gocʼko khone jiwetʼ beretʼ ocoakana; ar gocʼko modren unikangeae pạhilicʼ jo do.

²¹ Mitʼṭen manwa hotete moron hoyente ar mitʼṭen manwa hotete gocʼkoakʼ jiwetʼ beredokʼ hõ hoyakana.

²² Adam tulucʼ mitʼakante cetʼleka sanam manwageko gujukʼkan, onkage Mạsi tulucʼ mitʼakanko do jotogeko jiwetʼ beretʼ ocokʼa.

²³ Menkhan ona modre pạli menakʼa; pạhilre do Mạsige, ar ona tayom do Mạsirenko. Ar onko do uniyakʼ seṭerokʼreko jiwetʼ beretʼ ocokʼa.

²⁴ Ona tayom Mạsi do sanam raj calao ar sanam ektiạri ar daṛeye maraote Isor Babawakʼ tire rajosṭiye jimạkakʼa ar unrege mucạdokʼa.

²⁵ Isor do tin hạbicʼ Mạsiren sanam bạiriko uniyakʼ jaṅga latarre bae dohoko un hạbicʼ Mạsi doe rajokʼa.

²⁶ Ar sesicʼ bạiri moron, uni hõe marao ocokʼa.

²⁷ Sostor reakʼ katha leka, “Uni do sanamakʼge acʼakʼ jaṅga latarreye dohokeda.” Ar jotowakʼge gobolre dohoakana mente menle khan pusṭạute bujhạukʼ kana okoe jotowakʼko Mạsiyakʼ gobolreye dohoakatʼ uni Isor acʼtetʼ do ona khone chaḍaogea.

²⁸ Tinre sanamakʼ do Mạsi gobolre dohokʼa, unre okoe Mạsi gobolre sanamakʼe doholetʼ uni Isorge jemon mạlike hoyokʼ onate Hopon do acʼ hõ Isorreye gobolokʼa.

²⁹ Menkhan gocʼko iạte okoeko bạptisokʼkan, onkoakʼ do cetʼ hoyokʼtakoa? Ente gocʼko bako jiwetʼ beretʼ ocokʼkan khan onko do cedakʼ gocʼko iạteko bạptisokʼ kana?

³⁰ Ar cedakʼ jao ghuṛi muhinre bon paṛaokʼkana?

³¹ E boehako, aboren Probhu Jisu Mạsire ape reaṅ okaṭakʼle suhukʼetʼkan ona suhukʼre iń do dinạm hilokʼgeń gujukʼ kana.

³² Ephesusre bir janwarko tulucʼ okań lạṛhạilen, ona jodi manwako lekań onka lekhan enḍekhan cetʼ porho hoyokʼtińạ? Ar gocʼko bako jiwetʼ beredokʼ khan enḍekhan, “delabon jom ńũite okteko bon khemaoma; ente gapa dobon gujukʼa.”

³³ “Alope bulạukʼa, bạricʼakʼko tulucʼ gatekʼte bhage cạl-colonko hõ bạṛijokʼa.”

³⁴ Onate ape do apeakʼ monre cetaokʼpe ar alope kạiya. Ente ape modre adomko do Isor bako oromakadea; iń do lajao ocope lạgitʼge noa katha doń roṛeda.

³⁵ Jãhãeko men botecʼkea, “gocʼko do cekateko jiwetʼ beretʼ ocokokʼa? Ar cetʼ lekan hoṛmowateko beredokʼa?”

³⁶ E bebuj, oka itạm eretʼkan ona baṅ gocʼlen khan bacoṅ janam rakabokʼ.

³⁷ Ar amem eretʼ itạ khon oka janamokʼ ona do bam ereda, menkhan guhum se jãhãnakʼge eken mitʼṭecʼ jaṅgem ereda.

³⁸ Menkhan Isor do acʼakʼ monejoṅ leka ona itạre hoṛmoe emakʼ kana. Uni do acʼakʼ kusi lekage mimitʼ itạre hoṛmoe emakʼ kana.

³⁹ Joto jel do baṅ mitʼ lekana. Manwakoakʼ mitʼ leka, janwarkoakʼ eṭakʼ leka, cẽṛẽkoakʼ eṭakʼ leka ar hakokoakʼ eṭakʼleka.

⁴⁰ Sermare aema hoṛmoko menakʼa, ar dhạrtire hõ aema hoṛmoko menakʼa, menkhan sermare hoṛmoko reakʼ ṭhonok mitʼ leka ar dhạrtire hoṛmoko reakʼ ṭhonok do ar mitʼleka.

⁴¹ Siń cando reakʼ ṭhonok mitʼ leka, ńindạ cando reakʼ ṭhonok eṭakʼ leka ar ipilko reakʼ ṭhonok hõ ar mitʼ leka; ente ipil ipilre ṭhonok do judạ judạgea.

⁴² Gocʼko reakʼ jiwetʼ beredokʼ hõ ṭhik onkage. Ente hoṛmo topale khan ona do seakʼa, menkhan ona hoṛmo do nonka lekae jiwetʼ beretʼ ocokʼa, one okaṭakʼ do ar tishõ baṅ nosṭokʼ.

⁴³ Ona do bemanot lekate hasare topa ocokʼa, menkhan ṭhonokre jiwetʼ beretʼ ocokʼa; nijorre erogokʼa ar jorre jiwetʼ beretʼ ocokʼa.

⁴⁴ Jel reakʼ hoṛmo do hasare topa ocokʼa, menkhan jiu reakʼ hoṛmo do jiwetʼ beretʼ ocokʼa. Cetʼleka jel reakʼ hoṛmo menakʼa, onkage jiuteakʼ hoṛmo hõ menakʼa.

⁴⁵ Sostorre nonkage olakana, “Pạhil manwa Adam do jiwetʼ jiwiyanicʼe hoyena.” Ar sesicʼ Adam do jiwetʼ Jiugeye hoyena.

⁴⁶ Menkhan oka jiuteakʼ kan ona do maraṅakʼ do baṅkana, bickom oka jiwiyanakʼ kan onage, ar ona tayom do jiuteakʼ. Pạhil manwa do ot khone hecʼlena ar hasa khongeye benaolena;

⁴⁷ Menkhan dosaricʼ manwa do serma khone hecʼlena.

⁴⁸ Dhạrtiren manwako do hasaren benao manwa leka, ar sermate calakʼko do sermaren manwa lekage.

⁴⁹ Cetʼleka abon do hasaren manwa bon hoyakan onkage sermaren manwa leka hõ bon hoyokʼa.

⁵⁰ E boehako, okań menetʼkan ona do noage, manwa do acʼakʼ jel ar mãyãmte Isorakʼ raj bae ạidạri daṛeakʼa; ar oka seakʼ ona do nonkanakʼ reakʼ ạidạri bae hoedaṛeakʼa one okaṭakʼ baṅ seakʼ.

^51-52 Ańjompe, iń do mitʼṭecʼ okoakʼ iń lạiyape kana. Sanamkoge bon gujukʼa ona do baṅa, menkhan bon pheraokʼa; ṭuṅ ghuṛite, mitʼ ripitʼrege, ses siṅgạ reakʼ saḍetege, ente siṅgạ saḍekʼa ar gocʼko do bin seageko jiwetʼ beretʼ ocokʼa ar abo do bon pheraokʼa.

⁵³ Seakʼakʼ do bin seakʼakʼko horokʼ hoyokʼtaea jemon alo seakʼ. Gujukʼ do bin gujukʼakʼ horokʼ hoyokʼtaea jemon aloe gujukʼ.

⁵⁴ Oka seakʼ ar okaṭakʼ gujukʼ, onako onkage bodolokʼ khan sonot sostor reakʼ katha do purạukʼa, gujukʼ do jitteye utʼkeda mente.

⁵⁵ “E gujukʼ okortam jit do? E gujukʼ okortam suṅgạ do?”

⁵⁶ Gujukʼ reakʼ suṅgạ do kại kana, ar kại reakʼ daṛe do Moseyakʼ ạnkoge.

⁵⁷ Menkhan Isore sarhaokʼma, one uni jite emabon kan aboren Probhu Jisu Mạsi hotete.

⁵⁸ Onate, E ińren boehako, kajakte teṅgo ṭak akae tahenpe; jemon okaṭakʼte hõ alope ocogokʼ; ar jaoge Probhu Isorakʼ kạmire sareṛokʼpe, entepe baḍaegea, uniyakʼ kạmire mehnot do baṅ ạuṛiyagokʼ tapea.