1 Korinthiko 14 - সান্তালী বাইবেল

Judạ judạ pạrsite katha roṛ reaṅ

¹ Noa dulạṛ lạgitʼ ape do biseskaete kurumuṭuipe, ar sonot Jiu emakʼ dan, biseskaete nạbi lekate roṛ reakʼ ektiạri ńam lạgitʼ gagojokʼpe.

² Eṭakʼ pạrsite roroṛicʼ do manwako ṭhen katha bae roṛeda, menkhan Isor ṭhengeye roṛeda; ente ona do okoe hõ bako bujhạu daṛeakʼa; uni do Jiu hotete sạri okoakʼko reakʼe roṛeda.

³ Menkhan nạbi lekate katha roroṛicʼ do manwako ṭhen nonkan kathae roṛa one okaṭakʼteye benao rakapʼko, are udgạuko ar jiwi raṛecʼe danako.

⁴ Eṭakʼ pạrsite katha roroṛicʼ do apnargeye benao rakabokʼa, menkhan nạbi lekate roroṛicʼ do manḍerren hoṛkoe benao rakapʼkoa.

⁵ Ińakʼ sana do jotoko jemon eṭakʼ eṭakʼ pạrsitepe roṛ daṛeakʼ, menkhan arhõ bạ̃ṛtiń khojkana nạbi lekate jemon kathape roṛ daṛeakʼ. Eṭakʼ pạrsikote roroṛicʼ do manḍerren hoṛko benao rakapʼko lạgitʼ bae torjomae khan, enḍekhan uni khon nạbi lekate okoe kathae roṛetʼ unigeye sorosa.

⁶ Onate E boehako, ape ṭhen senkate eṭakʼ pạrsikoteń roṛle khan enḍekhan cetʼ iń porhokepea; sodorakʼ, se baḍaeakʼ, se nạbiyakʼ, se sikhạuna reakʼakʼ bạń galmarao ape khan do?

⁷ Tirioge cetʼ ar peṛesaṅge cetʼ onako do rạṛ aloko begarle khan cekate oroṅakʼ ar banamakʼ do baḍae oromokʼa?

⁸ Lạṛhại siṅgạ pusṭạute baṅ saḍelen khan, enḍekhan lạṛhại lạgitʼ okoe haleye sapṛaokokʼa?

⁹ Onkage okaṭakʼ pạrsi hoṛ bako bujhạu ona pạrsitepe roṛle khan enḍekhan okaṭakʼpe roṛ ona do cekate bujhạukʼa? Ente unre okaṭakʼ kathape roṛ ona ma hoe ṭhengepe roṛetʼkan.

¹⁰ Noa dhạrtire aema lekan pạrsiko menakʼa; onako modre okaṭakʼge okạjwạ do baṅkana.

¹¹ Onate jãhãn pạrsi reakʼ bhed bạń baḍaele khan enḍekhan uni roroṛicʼ ṭhen do eṭakʼ pạrsiren hoṛ lekań hoyokʼa ar uni hõ iń ṭhen do eṭakʼ pạrsiren hoṛ lekage.

¹² Apere hõ noa katha do sạrigea. Ape do sonot Jiu reakʼ dan ńam lạgitʼpe jidre okaṭakʼ dan hotete manḍer benao rakapʼ daṛekokʼ onako ḍherkaete ńam lạgitʼ kurumuṭuipe.

¹³ Onate jãhãe hoṛ eṭakʼ pạrsite kathae roṛetʼ khan uni doe koejoṅma jemon ona reakʼ maneye bujhạu daṛeako.

¹⁴ Iń do eṭakʼ pạrsiteń koejoṅ, enḍekhan ińren Jiugeye koejoṅkana menkhan ińakʼ mon do bae kạmikana.

¹⁵ Enḍekhan cetʼ cekae jạruṛtińạ? Iń do Jiuteń koejoṅa, ar ạkilte hõń koejoṅa; ar Jiuteń sereńa ar ạkilte hõń sereńa.

¹⁶ Am do Jiutem gunmanao johar khan ona pạrsi bin baḍaeyicʼ hoṛ onḍe hạjire tahenre cekate amakʼ gunmanao joharakʼre uni do Amene mena? Ente am cetʼem menetʼkan uni do bae bujhạueda?

¹⁷ Am do hoedaṛeakʼa bes okocʼtem gunmanao joharakʼ kana, menkhan onate uni eṭakʼ hoṛ do bae benao rakabokʼ kana.

¹⁸ Iń do ape jotoko khon bạ̃ṛti eṭakʼ eṭakʼ pạrsiteń roṛ daṛeakʼkante Isoriń gunmanao joharae kana.

¹⁹ Menkhan manḍer talare eṭakʼ eṭakʼ pạrsite hajar hajar kathakoń roṛ khon eṭakʼko cetʼako lạgitʼ bickom ińakʼ bud khon mõṛẽ goṭecʼ kathageń roṛa.

²⁰ E boehako, bujre gidrạko leka do alope hoyokʼa. Ar bạṛicʼakʼre apeakʼ mon do huḍiń gidrạko leka hoyokʼtape ma, menkhan bujre do sẽṛã hoṛ lekankoge hoyokʼpe.

²¹ Moseyakʼ ạn-ạrire Probhu Isore meneda, “Eṭakʼ pạrsiren hoṛko hotete ar eṭakʼkoakʼ mocate iń do noko jạtrenkoń galmarao akoa, menkhan enrehõ onko do ińakʼ katha bako ańjoma.”

²² Enḍekhan ńelokʼ kana, biswạsiko lạgitʼ eṭakʼ eṭakʼ pạrsite katha roṛ do jãhãn cinhạ baṅkana, bickom bin pạtiạuko lạgitʼ do cinhạ kana; menkhan bin pạtiạukʼko lạgitʼ nạbi lekate katha roṛ jãhãn cinhạ do baṅkana, bickom pạtiạu akanko lạgitʼge.

²³ Manḍerren sanam hoṛ mitʼ ṭhen jarwakate jotoko eṭakʼ eṭakʼ pạrsite katha roroṛpe ehopʼlen khan ar manḍer bahreren hoṛko ar bin pạtiạuko bhitriteko bololen khan, enḍekhan onko do cetʼ pagla mente bako metapea?

²⁴ Menkhan sanamko nạbi lekate kathakope roṛ ar jãhãe bin pạtiạuicʼ se manḍer bahreren hoṛ bhitriteye bololen khan enḍekhan uni do joto hoṛakʼ kathate apnar kại reaṅ cehaonae ńama ar onako katha hotetege acʼakʼ ontorreye bicạrokʼa.

²⁵ Onate acʼakʼ ontor reakʼ okoakʼko sodorokʼtae, ar uni do otre ombakʼkate Isor sarhaoeteye mena, “Sạrige Isor do apere menaegea.”

Manḍer rukhiyạ reaṅ

²⁶ E boehako, enḍekhan cetʼ iń mena? Manḍerre mitʼ ṭhenpe jarwakʼre ape modre okoe do sarhaoakʼ sereń menakʼtaea, okoe do cecetʼakʼ menakʼtaea, okoe do Isorakʼ sạritetʼ sodorakʼ menakʼtaea, okoe do eṭakʼ pạrsite cecetʼakʼ menakʼtaea; arhõ okoe do ona reakʼ bhede bhaṅgaoetʼkana. Onate jãhãe jãhãnakʼgeye ceka kan, ona jotowakʼ do jemon manḍer benao rakapʼakʼ mente hoyokʼ.

²⁷ Jãhãe eṭakʼ pạrsiteye roṛ khan bar hoṛ se pe hoṛ pạri pạriteko roṛma, ar mitʼ hoṛ do onae torjomaema.

²⁸ Menkhan torjomayicʼ bae tahẽlen khan uni hoṛ do manḍer jarwakʼre katha aloe roṛ ma, eken apnarre ar Isor tulucʼ kathae roṛma.

²⁹ Okoe nạbi lekate kathako roṛ onko do bar hoṛ se pe hoṛko roṛma, ar eṭakʼko do onako tojbijtakoma.

³⁰ Duṛupʼ akanicʼ ṭhen Isorakʼ sạriyakʼtetʼ sodorlen khan, enḍekhan katha roroṛicʼ doe thirokʼma,

³¹ ente ape sanamkoge mimitʼ hoṛkate nạbi lekate kathape roṛ daṛeakʼa, jemon sanamkoge sikhạunako ńam ar sanamkogeko udgạu ocokʼ.

³² Nạbikoakʼ Jiu do ako apnarakʼ gobolrege tahena.

³³ Isor do gulmalren Isor doe baṅkana, menkhan sulukren Isorge. Isorren hoṛko sanam manḍerkore cetʼ lekako tahenkan,

³⁴ onkage maejiuko hõ manḍer jarwakʼre hapegeko tahenma, ente onko do katha roṛ reakʼ hukum baṅ emakatʼkoa. Moseyakʼ ạn-ạrire cetʼ lekae menetʼ onkage jemon gobolreko tahen.

³⁵ Ar jãhãnakʼ cetʼjoṅko menetʼ khan onko do oṛakʼre apan apin herel ṭhenko kulijoṅma, ente manḍer jarwakʼre maejiuko katha roṛ do lajao reakʼakʼ kana.

³⁶ Isorakʼ katha do cetʼ ape ṭhen khonge oḍok hecʼlena se ona do eken ape eskar ṭhenge hecʼakana?

³⁷ Jãhãege apnarte nạbi se Jiutenicʼ hoṛ kanae menteye bujhạukʼ khan enḍekhan uni doe aṅgocma, ape ṭhen okań olketʼ onako sanamakʼ do Probhu Isorakʼ hukum kangea mente.

³⁸ Menkhan jãhãe noae neṅghao khan acʼ hõe neṅghao ocokʼa.

³⁹ Onate, E ińren boehako, ape do nạbi lekate katha roṛ lạgitʼ jidpe, ar eṭakʼ eṭakʼ pạrsite roroṛ alope manakoa.

⁴⁰ Menkhan noako sanamakʼ do ṭhik leka ar napaetege baṛe hoyokʼma.