1 Korinthiko 11 - সান্তালী বাইবেল

¹ Iń do cetʼleka Mạsireń calakʼkan, ape hõ onkage calakʼpe.

Girjạre lek leka colon reakʼ

² Apeń sarhaoetʼpea, ente ape do sanamakʼkorepe disạyediń kana ar okań cetʼ akawatʼpe onape sapʼ dohoakatʼa.

³ Iń doń menjoṅ kana jemonpe baḍae baṅma, mitʼke mitʼ herelkoren matha do Mạsige, ar maejiuren matha do jãwãetetʼ, ar Mạsiren matha do Isorge.

⁴ Jãhãe herel hoṛ bohokʼ dapalkateye koejoṅ se nạbi leka Isorakʼ kathakoe lại, uni do acʼakʼ bohokʼe bemanoteda.

⁵ Ar jãhãe maejiu bohokʼ begor ṭuṭurikateye koejoṅ se nạbi lekate kathae lại, uni do acʼakʼ bohokʼe bemanoteda, ente uni do hoyo poṭor akan maejiu lekageye hoyakana.

⁶ Jãhãe maejiu bohokʼ bae ṭuṭurikʼ khan uni do acʼakʼ upʼe getʼ giḍikakʼma. Menkhan maejiuko lạgitʼ kạpcikʼ se hoyo poṭorokʼ do lajao paṛage khan onko doko ṭuṭurikʼma.

⁷ Herelakʼ bohokʼ dapal do lek baṅkana, ente Isor do acʼlekage herele sirjạu akadea ar herel hotetege Isorakʼ ṭhonok do sodor akana. Menkhan maejiu hotete herelakʼ do ṭhonok sodorokʼa.

⁸ Herel do maejiu khon bae hecʼakana, menkhan maejiuge herel khone hecʼakana.

⁹ Maejiu lạgitʼ herel do bae sirjạu akana, menkhan herel lạgitʼge maejiu doe sirjạu akana.

¹⁰ Onate maejiuko do serma goḍetko iạte akoakʼ bohokʼre gobolokʼ reakʼ cinhạ lekate bohokʼ ṭuṭurikʼ do lek takoa.

¹¹ Enrehõ Probhu Isorre herel do maejiu begorte cele hõe baṅkana ar maejiu hõ herel begorte cele hõe baṅkana;

¹² ente cetʼ leka herel khon maejiue hecʼakan onkage arhõ maejiu hotete herelakʼ janam do hoyakana. Menkhan sanamakʼ do Isor khonge.

¹³ Ape apnarte baṛe bicạrpe, maejiuko begor ṭuṭurite Isor ṭhenko koejoṅ do cetʼ sajaokʼgea?

¹⁴ Khaṭo budte cetʼ noa baṅ bujhạukʼ kana, herel do jhạl upʼ tahẽntako khan bemanot hoyokʼtakoa mente?

¹⁵ Menkhan maejiuko jeleń upʼ tahentako khan ona do onko lạgitʼ ṭhonok kana, ente apnar dapalokʼ lạgitʼge maejiuko do jeleń upʼ em akawatʼkoa.

¹⁶ Ar jãhãe noa iạteko ṭhapa ṭhugokʼ khan noań menkea, eṭakʼ jãhãn niạm do abo talare bạnukʼa ar Isorakʼ manḍerkore hõ bạnukʼa.

Probhu kedokʼ reaṅ

¹⁷ Menkhan ńitiń hukumape kanre do bạń sarhaoetʼpea, ente ape do manḍerre boge lạgitʼ do baṅ bickom bạṛijokʼ lạgitʼgepe jarwakʼ kana.

¹⁸ Pạhilreń ańjomeda, manḍer jarwakʼre ape talare dola doli tahenkana, ar iń do thoṛ pạtiạu hõń pạtiạukʼkangea.

¹⁹ Ente ape talare dola duli do tahengea, jemon Isor samaṅre ape modre biḍạukʼ ṭarhaokʼkoko sodorokʼ.

²⁰ Manḍer lekate mitʼ jaegare jarwakate okaṭakʼpe jometʼkan ona do Probhuakʼ bhoj do baṅkana,

²¹ ente begor tạṅgitepe jomeda. Onate mitʼ hoṛakʼ do reṅgecʼ tahen kangea ar eṭagicʼ doe bulokʼkana.

²² Jom ńũi lạgitʼ apeakʼ oṛakʼ do cetʼ bạnukʼtapea? Se Isorakʼ manḍerkope nihạ̃teda ar okoeyakʼ cetʼge bạnukʼtako onkope lajao ocoyetʼkoa? Iń do cetʼiń metapea? Noa iạteń sarhaopea? Khạṭige baṅa.

²³ Okaṭakʼ iń cetʼ akawatʼpe ona do Probhu Isor ṭhen khongeń ńamakada. Oka ńindạ Probhu Isor do bạirikoakʼ tireye soprot ocolen,

²⁴ ona ńindạ uni do piṭhạ halaṅkate Isore gunmanao joharadea ar onae kecakʼketʼteye menkeda, “Noa do ińakʼ hoṛmo kana one ape lạgitʼ emogokʼkan; ar iń disạyiń lạgitʼge nonkaepe baṛe.”

²⁵ Kedokʼ tayom onkage bạṭi hõ ataṅkateye menkeda, “Noa bạṭi do ińakʼ mãyãm hotete Isorakʼ nãwã bondobos kana; tinạkʼ dhaope ńũi nonkaepe, iń disạyiń lạgitʼ.”

²⁶ Onate uni ạuriye hijukʼ hạbicʼ tinạkʼ dhao noa piṭhạpe jom ar noa bạṭi reakʼpe ńũi unạkʼ dhao Probhu Isorakʼ gujukʼ reakʼ kathape porcara.

²⁷ Onate jãhãe belek lekate noa piṭhạ ar Probhu Isorakʼ bạṭi khone jom uni do Probhu Isorakʼ hoṛmo ar mãyãm reakʼ dạyike hoyokʼa.

²⁸ Onate manwa do piṭhạ ar bạṭi reakʼ jom lahare apnarteye biḍạu aṭkarokʼma,

²⁹ ente jojom jokhecʼ Probhu Isorakʼ hoṛmo reaṅ bae bujhạu khan enḍekhan ona jomte uni do acʼ cetanre sạjạiye ạgujoṅa.

³⁰ Ar onatege ape talare ạḍi utạr nijor ar rugiko menakʼkoa, ar aema doko gocʼ akana.

³¹ Abo do apnarte bon biḍạulen khan enḍekhan Probhu Isorakʼ bicạr khon bon rukhiyạkokʼa.

³² Menkhan Probhu Isore bicạrbonre uni doe ḍanṭaoetʼ bona, jemon dhạrtiren sanamko sãote dusi mente alo bon ṭarhaokʼ.

³³ Onate E ińren boehako, manḍerre jom lạgitʼ mitʼ ṭhenpe jarwakʼre ape apere tạṅgikʼpe.

³⁴ Ar jãhãe reṅgeje khan uni do oṛakʼ khone jom ạguiyma, jemon manḍer jarwakʼ khạtirte sạjại aloe ńam; ar eṭakʼakʼ reaṅ do ińiń hecʼlenreń lạiyapea.