1 Korinthiko 10 - সান্তালী বাইবেল

Israelkoakʼ Itihãs khon sikhạuna

¹ E boehako, iń doń khojkana jemonpe baḍae, aboren hapṛamko do jotoge ona rimil reakʼ umulreko tahẽkana ar sanamkoge doreão talateko paromlena.

² Mose tulucʼ midokʼ lạgitʼge onko do rimil ar doreãoteko bạptis ocolena.

^3-4 Isor emakʼ ona mitʼ jiuanakʼ jomakʼgeko jomleda; ar ona mitʼ jiuanakʼ ńũńũakʼgeko ńũleda. Isor emakʼ okaṭakʼ dhiri onko são sãote calakʼkan tahẽkan ona khonge ńũi lạgitʼ dakʼko ńametʼkan tahẽkana; ar Mạsige ona dhiri doe tahẽkana.

⁵ Enrehõ Isor do onko modren ḍher hoṛko cetanre kusi bae tahẽkana. Onate onkoakʼ mạ̃ṛĩ do hahaṅkarrege giḍi ocoyentakoa.

⁶ Ona ńelte abo jemon bon cetʼ daṛeakʼ ona lạgitʼge noako do hoylena, jemon onko cetʼleka bạṛicʼakʼko lalocatʼ tahẽkan onka alo bon kạmi.

⁷ Cetʼleka onko modren adomko do boṅgako sewawako kan tahẽkan onka leka boṅga sewako do alope hoyokʼa. Olakan leka, “Hoṛko do jojom ar ńũńũko duṛupʼena, ar enejokʼko beretʼena.”

⁸ Onko modre ḍher hoṛgeko laṭ ghaṭletʼte mitʼ dinre bargel pe hajar hoṛko gocʼlena. Abo do onka alo bon loṭghuṭima.

⁹ Onko modre ḍherkoge Probhu Isorko biḍạukedete cetʼleka biń gerteko gocʼlen, onka jemon Probhu Isor alo bon biḍạu aṭkare.

¹⁰ Onko modre ạḍi hoṛgeko karacʼ kurucʼlente cetʼleka nonosṭoyicʼ goḍet hoteteko marao ocolen, ape do onaka alope karacʼ kurujokʼa.

¹¹ Eṭakʼ hoṛko jemon ńelkateko cetʼ daṛeakʼ onate onko cetanre noako do hoylena. Okoe jug reakʼ mucạtʼre bon seṭerakan, abo cehao bon lạgitʼge noako do olakana.

¹² Onate jãhãe kajakteye teṅgo akana menteye monejoṅkan khan, enḍekhan uni doe sontorokʼma jemon aloe bhindạṛokʼ.

¹³ Manwa jionre okako biḍạu hoyokʼkan ona chaḍa eṭakʼ jãhãn biḍạu do ar baṅ paṛao akawatʼpea. Isor doe pạtiạrgete, sahao daṛeakʼ khon bạ̃ṛti do bae biḍạupea, bickom biḍạu são sãote ona khon oḍokokʼ reakʼ hõe horapea, jemonpe sahao daṛeakʼ.

¹⁴ Onate E ińren gateko, boṅga sewa khon men ńir joṅpe.

¹⁵ Iń do budanko menteń baḍaeyetʼpete noakoń galmaraoape kana; ar okań roṛetʼkan, ona do apege bicạrpe.

¹⁶ 6 Probhu kedokʼ okte gunmanao joharate oka bhoranakʼ bạṭi khon bon ńũi, ona do cetʼ Mạsiyakʼ mãyãmre bakhra seledokʼ leka do baṅkana? Ar okaṭakʼ piṭhạ do kecakʼkate bon jometʼkan ona hõ cetʼ Mạsiyakʼ hoṛmore bakhra seledokʼ leka do baṅkana?

¹⁷ Ar bon aemagere hõ mitʼ hoṛmo kanabon, ente piṭhạ do mitʼ goṭengea, ar sanamkoge ona mitʼ piṭhạ reaṅ hạṭińge bon ataṅeda.

¹⁸ Israel jạtrenko beṅgetʼakope. Onko modre okoe teṅgenakʼko jometʼkan onko do cetʼ ona pinḍ reakʼ jotoge bako bakhra joṅkana?

¹⁹ Enḍekhan cetʼ iń roṛeda? Boṅga ṭhen teṅgenakʼ jomakʼ do jãhãnakʼ kana se muṭhạnge jãhãnakʼ kana?

²⁰ Ona do baṅ, bickom ińiń meneda, boṅgan hoṛ okako samaṅetʼkan ona do Isor lạgitʼ do baṅkana, ona do bạṛicʼ jiuko ṭhengeko onkayeda. Ar bạṛicʼ jiuko tulucʼ apepe gatekʼ do bạń khojkana.

²¹ Probhu Isorakʼ bạṭi khon ar bạṛicʼ jiukoakʼ bạṭi khon, noa banar khon do baṅgepe jom daṛeakʼa. Probhu Isorakʼ mej cetanre ar bạṛicʼ jiukoakʼ mej cetanre oka menakʼ ona banar reakʼ bakhra do ohogepe jom daṛelea.

²² Noa iạte Probhu Isor do cetʼ babon ãṭ ocoyedekana? Abo do cetʼ uni khon bon daṛegea?

Biswạs reakʼ sạdhintetʼ

²³ Adomkoko mena, “Jotowakʼge ganokʼgea.” Menkhan jotowakʼ do baṅ porhowana. Jotowakʼge ganokʼa; menkhan jotowakʼ do baṅ bekʼnao rakapʼa.

²⁴ Okoe hõ apnar bhạlại lạgitʼ aloe kurumuṭuima, menkhan eṭakʼkoakʼ bhạlạigeye ńam baṛaema.

²⁵ Bajarre ạkhrińokʼ kan jãhãnakʼge jompe; apeakʼ bibek khạtirte cetʼ hõ begor kulite;

²⁶ ente sonot sostor reakʼ katha leka, “Dhạrti ar onare menakʼakʼ jotowakʼge Probhu Isorakʼ kana.”

²⁷ Ar jãhãe bin pạtiạuicʼe neotalepere arpe calaolenre, bibek khạtirte cetʼ hõ begor kulite samaṅ akawatʼpe reakʼ jompe.

²⁸ Menkhan jãhãeko metape khan, “Noa do boṅga ṭhen teṅgenakʼ kana,” Enḍekhan one okoeye menakatʼpe uni iạte ar bibek khạtirte alope joma.

²⁹ Iń do apeakʼ bibek reakʼ katha do bạń roṛeda, eṭakʼ mitʼ hoṛakʼ bibek reakʼ kathań roṛeda. Menkhan eṭakʼ mitʼ hoṛakʼ bibek iạte cedakʼ ińakʼ sạdhintetʼreń bicạr ocokʼa?

³⁰ Ar gunmanao joharateń jomle khan, enḍekhan oka jomakʼ lạgitʼ gunmanao iń joharetʼkan ona lạgitʼ cedakʼiń opoman ocokʼa?

³¹ Onate ape do jãhãnakʼgepe jom-ńũi ar jãhãnakʼgepe cekae, jotowakʼge Isorakʼ ṭhonokʼ lạgitʼ kạmipe.

³² Iń do cetʼleka sanam manwako jotowakʼte kusi ocoko lạgitʼ iń kurumuṭuyetʼ kan ape hõ onkage kurumuṭuipe; metakʼme Jihudi ar boṅgan hoṛ jạtrenko se Isorakʼ manḍerren hoṛko ṭhen tạkʼkicʼko alope hoyokʼa.

³³ Iń do apnar porho lạgitʼ kurumuṭu baṅkate ḍher hoṛkoakʼ bhạlại lạgitʼgeń kurumuṭu kana jemon onko do kại khon bańcaoko ńam.