1 Johan 4 - সান্তালী বাইবেল

Isorren Jiu orome reakʼ

¹ E dulạṛiạ gidrạkotiń, joto Jiu do alope pạtiạu akoa, bickom biḍạu aṭkarkope onko do Isor khonko hecʼakana se baṅa, ente dhạrtire aema eṛe nạbikoko oḍok akana.

² Isorren Jiu do nonkatepe orom daṛeakoa, okoe Jiu do Jisu Mạsi manwa lekateye hecʼlena menteye aṅgoce uni Jiuge Isor khon hecʼ akanicʼ do;

³ Menkhan okoe Jiu Jisu bae aṅgoce uni Jiu do Isor khonicʼ doe baṅkana. Nui jiu do uni Mạsiren bạiri kanae. Ar okoeṭakʼ Jiue hijukʼkan, ona mape ańjomakatʼge, ar sạrige uni Jiu do ńit hõ dhạrtirege menaea.

⁴ Menkhan E gidrạko, ape do Isorren kanape. Ape do onko eṛeko cetanrepe jitạu akana, ente noa dhạrtire okoe menae, uni khon apeakʼ ontorre menayicʼ doe maraṅgea.

⁵ Onko eṛeko do noa dhạrtiren kanako; onate onko do noa dhạrti reakʼ kathako roṛa ar dhạrti do onkoakʼ kathae ańjoma.

⁶ Abo do Isorren kana bon; okoe Isore baḍae akade uni do aboakʼ kathae ańjoma, menkhan okoe Isorrene baṅkan uni do aboakʼ katha bae ańjoma. Ar noatege abo do sạriyakʼren Jiu ar bukʼlạuren jiu bon orom daṛeaea.

Dulạr do Isor acʼtetʼge

⁷ Dulạṛiạ gidrạko, abo mimitʼko jemon bon dupulạṛ, ente dulạṛ do Isor ṭhen khonge hijukʼkana. Okoeyakʼ ontorre dulạṛ menakʼtako, onko do Isor khongeko janam akana ar Isorko baḍae akadea.

⁸ Ar okoeyakʼ ontorre dulạṛ bạnukʼ, onko do Isor bako baḍae akadea, ente dulạṛ do Isor acʼtetʼ kangeae.

⁹ Abo lạgitʼ Isorakʼ dulạṛ do nonkate sodor akana, uni do acʼren eskar janam Hopon noa dhạrtiteye kolkedea jemon uni hotete jion bon ńam.

¹⁰ Isor do abogebon dulạṛ akadea ona do baṅ, menkhan unigeye dulạṛketʼ bonte acʼren Hopone kolkedea, jemon Hopon do acʼakʼ jiwiye alaete aboakʼ kạiko meṭaokate Isore kusi ocoye. Ar noa kangea dulạṛ do.

¹¹ E dulạṛiạ gidrạko, Isor do nonkae dulạṛetʼ bon khan eḍekhan abo hõ mimitʼko dulạṛ do lek tabona.

¹² Isor do okoege tishõ bako ńelakadea. Ar abo mimitʼko bon dupulạṛ khan, enḍekhan bon bujhạu daṛeakʼa, Isor do aboakʼ ontorre menaea ar uniyakʼ dulạṛ do aboakʼ ontorre purạteye kạmikana.

¹³ Uni do acʼren Jiue danakatʼ bona, ar noatege bon baḍae daṛeakʼa je, abo do unire menakʼbona ar uni hõ aboakʼ ontorrege menaea mente.

¹⁴ Alele ńelakadea ar gohale emetʼkana, Baba do manwakoren babańcaoicʼ mente Hopone kolkedea.

¹⁵ Ar jãhãege Jisu do Isorren Hopon kanae menteye aṅgoce, Isor do unireye tahena ar uni hõ Isorreye tahenkana.

¹⁶ Baḍaegea bon Isor do aboe dulạṛetʼ bona, ar uniyakʼ dulạṛre aboakʼ biswạs menakʼ tabona mente. Isor do acʼtetʼgeye dulạṛkana. Ar dulạṛre okoeye tahen kan, uni do Isorregeye tahenkana ar Isor do unireye tahenkana.

¹⁷ Nonkatege dulạṛ do aboakʼ ontorre purạte hoyakana jemon bicạr hilokʼ dil bon ńam, ente noa dhạrtire aboakʼ jion do uniyakʼ jion lekagea.

¹⁸ Noa dulạṛre do botor bạnukʼa, bickom purạ dulạṛ do botore oḍok giḍiya, ente botorre do sạjại menakʼa. Okoeye botorokʼ kan uni do dulạṛre purạte bae sạbit utạr akana.

¹⁹ Uni do pạhilre aboe dulạṛ maṛaṅ ketʼbontege abo hõ uni bon dulạṛede kana.

²⁰ Jãhãege Isore dulạṛ edekana menteye menetʼkan, menkhan acʼren boehae kurudae, enḍekhan uni doe eṛeyicʼ kana; ente mẽtʼte ńelakade boeha okoe bae dulạṛede enḍekhan uni do cekate baṅ ńelakade Isor doe dulạṛ daṛekea?

²¹ Uni ṭhen khon noa hukum bon ńam akada, okoe Isorko dulạṛ edekan onko do boehako hõ jemonko dulạṛko.