1 Bõsbudạ 9 - সান্তালী বাইবেল

Jerusalemre Israelrenko

¹ “Israelren rapajkoakʼ puthire sanam Israelkoakʼ bõsbudạ do ol akana. Jihudạren hoṛkoakʼ bepạtiạu iạte onko do Babelteko bundi idiocolena.

² Ar okoe do pạhilteko ruạṛ hecʼen ar apnarakʼ nagraha ar atore apnarakʼ jaega jumi cetanre arhõ girobasokʼko ehopʼen onko do naekeko, Liwiko, koejoṅ oṛakʼren sapʼsorko ar eṭakʼ Israelkoko tahẽkana.

³ Jihudạ, Benjamin, Ephrayim ar Manase gusṭiren okoe hoṛko do Jerusalemre girobasokʼko ehopʼen onko doko hoyokʼkana:

⁴ Jihudạ gusṭi khon:

⁵ Jihudạren hopon Sela bõsren Asai ar uniren hoponko. Asai do acʼ apatren maraṅicʼ hopone tahẽkana.

⁶ Jihudạren hopon Seroho bõsren Joyel. Jihudạ gusṭiren okoe hoṛko do Jerusalemre girobasokʼko ehopʼen onkoakʼ lekha do turui sae aregel.

⁷ Benjamin gusṭiko khon: Mosllumren hopon Sollu. Uniren hapṛamko modre do Hodbiạ ar Hosnui tekinkin tahẽkana.

⁸ Jirohomren hopon Jiboniạ. Mithriren goṛomtetʼ koṛa, metatʼme Usiạren hopon Ela. Sophṭiạren hopon Mosllum. Uniren hapṛamko modre Ruyel ar Jiboniạ hõkin tahẽkana.

⁹ Noko do nij nij bõsren mukhiyạko tahẽkana. Benjaminakʼ bõsbudạ lekate okoe hoṛko do Jerusalemreko girobasokʼ kan tahẽkan onkoakʼ lekha do aresae mõṛẽgel turui hoṛko tahẽkana.

Jerusalemre tahenkan naekeko

^10-11 Noko naekeko do Jerusalemreko tahenkan tahẽkana. Jidiạ, Hihodiạ, Jakhin ar Hilkiạren hopon Asariạ. Asariạ do Isorakʼ oṛakʼre kạmi reakʼ bhare ńamakatʼ hoṛko modre maraṅicʼe tahẽkana. Uniren hapṛamko modre do Mosllum, Sadok, Morayet ar Ahiṭubko tahẽkana.

¹² Jihuramren hopon do Adaya. Uniren hapṛamko modre do Johosera, Mosllum, Mosillomit ar Imore tahẽkana.

¹³ Noko do apan ạpin bõsren mukhiyạko tahẽkana. Okoe naekeko do Jerusalemreko girobasokʼkan tahẽkan onkoakʼ lekha do mitʼ hajar eae sae turui gel hoṛko tahẽkana. Noko do Isorakʼ oṛakʼre kạmi reakʼ bhar ńam lek hoṛko tahẽkana.

Jerusalemreko tahenkan Liwiko

¹⁴ Okoe Liwiko do Jerusalemreko tahenkan onko doko hoyokʼkana: Hosubren hopon do Samariại. Uniren hapṛamko modre do Asrikam, Hosbiạ ar Morari.

¹⁵ Bokbokor, Heros, Galol ar Mikhar hopon Mottoniạ. Mottoniạren hapṛamko modre do Sikhri ar Ashaphkin tahẽkana.

¹⁶ Samariạren hopon do Abadiạ. Uniren hapṛamko modre do Galol ar Jiduthon tạkinkin tahẽkana. Elkanaren goṛomtetʼ koṛa, metatʼme Asren hopon Berikhiạ. Uni do Noṭaphatiạkoakʼ atoreye girobasokʼ kan tahẽkana.

Jerusalem mundil rurukhiyạko

^17-19 Mundil rurukhiyạko okoe do Jerusalemreko tahekan onko doko hoyokʼkana: Sollum, Akub, Tolmon, Ahiman ar onkoakʼ bõsren hoṛko. Noko hoṛko do Liwi gusṭiren ḍera reakʼ rurukhiyạkoko tahẽkana. Koriren hopon Sollum do onkoren mukhiyại tahẽkana. Uniren hapṛamko modre Ebiyasoph ar Koroho. Sollum ar uni bõsren hoṛko metatʼme Korohoko do koejoṅ oṛakʼ reakʼ pạcriko horhoe reakʼ bhare ńamletʼ tahẽkana. Teheńhõ onko do raj doṅgol purub secʼ reakʼ phaṭok duạrreko tahenkana. Ar onkoren hapṛamko cetanre hõ ṭhik onkage Probhu Isore tahen tạmbu duạr horhoe reakʼ bhar tahẽkantakoa.

²⁰ Ona jokhecʼ Eliaserren hopon Pinehas cetanre do rurukhiyạko ńel todarotko reakʼ bhar tahẽkana ar Probhu Isor hõ uni sãoteye tahẽkana.

²¹ Moselemiạren hopon Sakhariạ do ńapamokʼ tạmbu reakʼ duạr horhoyicʼe tahẽkana.

²² Duạrko horhoe lạgitʼ okoeko bachao ocolen tahẽkan onkoakʼ lekha do jotote barsae gelbar hoṛko tahẽkana. Ar onkoakʼ atokore okoekoakʼ bõsbudạ tahẽkan onkoakʼ ńutum ol tahẽkana. Dạud ar Sạmuel do noko hoṛkoge dạyikan pahradarko mentekin bahaletʼkoa.

²³ Onko ar onko bõsren hoṛko do Probhu Isorakʼ oṛakʼ, metakʼme ḍera tạmbu reakʼ duạrko horhoyetʼ tahẽkana.

²⁴ Ar rurukhiạko do purub, pạchim, utạr ar dạkhin niạ pon secʼgeko horhoyetʼ tahẽkana.

²⁵ Onkoren boehako hõ atoko khon hecʼkate pạli pạlite eae dinkate kạmireko goṛoako kan tahẽkana.

²⁶ Liwikoren okoe pon hoṛ do asol rurukhiyạkoko tahẽkan onkore do Isorakʼ oṛakʼ reakʼ murại kandhako cetanre hõ onkoakʼ bharko tahẽkana.

²⁷ Onko do Isorakʼ oṛakʼ aṛeregeko girobasokʼ kan tahẽkana, ente ona oṛakʼ rurukhiyạ reakʼ bhar do onko cetanrege tahẽkana, ar dinạm hilokʼ setakʼre onko do duạr hõ jhicʼetʼ tahẽkana.

Eṭakʼ Liwiko

²⁸ Liwiko modre adomko cetanre koejoṅ oṛakʼre sewa kạmi reakʼ jinisko rukhiyại reakʼ bhar tahẽkantakoa. Onko do oḍok ar ader jokhecʼ onakoko lekhayetʼ tahẽkana.

²⁹ Ar eṭakʼko cetanre do koejoṅ oṛakʼ reakʼ jinisko ar joto ńuńuwakʼ bạṭiko, holoṅ ar darkha rasa, sunum, gotom ar jut so mosolako rukhiyạ reakʼ bhar tahẽkana.

³⁰ Menkhan jut so mosolako mesal reakʼ bhar do naekeko modre adomko cetanre tahẽkana.

³¹ Liwiko modre Koroho Sollumren maraṅicʼ hopon Mottothiạ cetanre do anaj samaṅokʼakʼ jinisko rapakʼkate ạgui reakʼ bhar tahẽkana.

³² Mimitʼ jirạukʼ mãhãre ṭebil cetanre samaṅokʼakʼ oka piṭhạ sajao dohokakʼ hoyokʼkan tahẽkan ona benao reakʼ bhar do Liwiko modre Kohat cetanre tahẽkana.

³³ Liwi gusṭiren bõs mukhiyạko okoe do sereń durạṅreko tahẽkan onko do koejoṅ oṛakʼ reakʼ kandhareko tahẽnkan tahẽkana. Onko do sereń durạṅre siń nindạ bestoko tahenkan tahẽkante onko cetanre eṭakʼ jãhãn kạmi reakʼ bhar do baṅ tahẽkana.

³⁴ Bõs tạlika lekate noko jotoge Liwi gusṭiren apan ạpin bõsren mukhiyạko tahẽkana. Ar noko do Jerusalemregeko girobasokʼ kan tahẽkana.

Sạul rajren bõsko

³⁵ Jiyiyel do Gibiyon atoye benao rakapʼletʼte onḍegeye girobasokʼ kan tahẽkana. Uniren bạhuttetʼakʼ ńutum do Maka tahẽkana.

³⁶ Uniren maraṅicʼ hoponakʼ ńutum do Abdon tahẽkana, ona tayom do Sur, Kis, Bakʼal, Ner, Nadab,

³⁷ Gedor, Ahio, Sekariạ ar Milkot.

³⁸ Milkotren hopon Simiyam. Noko do Jerusalemre akoren hoṛko ṭhenko girobasokʼ kan tahẽkana.

³⁹ Nerren hopon Kis, Kisren hopon do Sạul ar Sạulren hopon doko hoyokʼkana Jonathon, Malkisua, Abinadab ar Esbal.

^40-41 Jonathanren hopon Meri-Bakʼal, Meri-Bakʼalren hopon do Mika ar Mikaren hoponko doko hoyokʼkana Pithon, Melek, Tarea ar Ahas.

⁴² Ahosren hopon do Jaro: ar Jaroren hopon doko hoyokʼkana Alemet, Asmawet ar Simri. Simriren hopon do Mosa.

⁴³ Mosaren hopon do Binea, Binearen hopon do Rapha Eliasa ar Eliasaren hopon do Asel.

⁴⁴ Aselren do turui goṭen hoponkoakʼ ńutum do hoyokʼkana Asrikam, Bokeru, Ismael, Searia, Obadiạ ar Hannan.