1 Bõsbudạ 5 - সান্তালী বাইবেল

Rubenren bõsko

¹ Israelren maraṅicʼ hopon Ruben do acʼ apatakʼ aṭetʼe bhõnḍletʼte maraṅicʼ hopon reakʼ ạidạriye atʼletʼ tahẽkana. Ona ạidạri do Israelren eṭakʼ hopon Josephren hoponko emocolena. Onate bõsbudạre uniyakʼ ṭhạ̃i do maraṅicʼ hopon lekate baṅ ol akana.

² Arhõ boeharen gusṭiko modre Jihudạ gusṭikoren do joto khon daṛeanko tahẽkana ar uniyakʼ gusṭi khonge mukhiyại bachao ocolenrehõ maraṅicʼ hopon reakʼ ạidạri do Josephgeye ńamleda.

³ Israelren maraṅicʼ hopon Rubenren hoponko doko hoyokʼkana Hanok, Pollu, Hesron ar Karmi.

⁴ Joel bõsren hoṛko doko hoyokʼkana Joelren hopon Simiyi, Simiyiren hopon Gog, Gogren hopon Simiyi,

^5-6 Simiyiren hopon Mika, Mikaren hopon do Raya, Rayaren hopon do Bakʼal ar Bakʼalren hopon Bera. Bera do Rubenkoren mukhiyại tahẽkana. Asurren raj Tiglog-Pilesor do uni bondikateye idiledea.

^7-8 Ruben gusṭirenkoakʼ tạlika do bõsbudạ lekate ollena. Onko modre Jeyiyel, Sakhariạ ar Asosren hopon Bela noko do mathako tahẽkana. Asos do Semaren hopone tahẽkana ar Sema do Joelren hopone tahẽkana. Noko do Orowa khon Nobo ar Bakʼal-Miyon hạbicʼko girobasokʼ kan tahẽkana.

⁹ Gileadre onkoren ạsul janwarkoko saṅge idiyen khan purub secʼ reakʼ hahaṅkar ṭoṭha oka khon ehopʼ akan ona hạbicʼko dokholkeda. Noa hahaṅkar jaega do phurạt gaḍa reakʼ pạchim secʼre tahẽkana.

¹⁰ Sạulakʼ rajokʼ oktere Rubenrenko do Hagariạko upạrte lạṛhạikate onkoko gocʼletʼkoa. Onko do Gilead purub secʼ, metakʼme Hagariạkoakʼ sanam jaega dokholkate onḍe girobasokʼko ehopʼena.

Gadren bõsko

¹¹ Gad gusṭiren hoṛko do Rubenrenko aṛe Bason disạm reakʼ Solkha hạbicʼ reakʼ jaegakoreko girobasokʼkan tahẽkana.

¹² Onko modre matha do nokoko tahẽkana Joel, Saphom, Janoy ar Saphot. Noko do Basonreko tahenkan tahẽkana.

¹³ Gad gusṭiren sarecʼ hoṛko do noko eae hoṛren, metakʼme Mikhayel, Mosllum, Seba, Joray, Jakon, Siyạ ar Eber bõsren hoṛko secʼko tahẽkana.

¹⁴ Noko do Huriren hopon Abihoyel bõsren hoṛko tahẽkana. Huriren apat do Jaroho, Jarohoren apat do Gilead, Gileadren apat do Mikhayel, Mikhayelren apat do Jisisoy, Jisisoyren apat do Johoda ar Johodaren apat do Bus.

¹⁵ Abdiyelren hopon Ahi do bõskoren mukhiyại tahẽkana ar Abdiyel do Guniren hopone tahẽkana.

¹⁶ Gad gusṭiren hoṛko do Bason disạmre, Gileadre ar onḍenakʼ atokore ar Saron ṭoṭha reakʼ janwar ạtiń ṭạnḍi reakʼ sanam jaegareko girobasokʼ kan tahẽkana.

¹⁷ Jihudạren raj Jotham ar Israelren raj Jerobiamakʼ rajokʼ oktere noko hoṛkoakʼ ńutum do bõsbudạre ol caṛhaolentakoa.

Laṛhại phạdko

¹⁸ Ruben gusṭi, Gad gusṭi ar Manasi gusṭiren adha hoṛ do lạṛhại lạgitʼ pongel pon hajar eae sae turuigel daṛean hoṛ sapṛao akanko tahẽkana. Onko do ḍhal, tarwaṛe ar akʼsar behoharko baḍaekan tahẽkana ar lạṛhạire ạḍi gạkhuṛko tahẽkana.

¹⁹ Onko do Hagariạko, metakʼme Jiṭuren, Naphisren ar Nadabren hoṛko upạrteko lạṛhạiyena.

²⁰ Noko sãote lạṛhại jokhecʼ Isor do onkoe goṛowatʼko tahẽkana. Uni do Hagariạko ar onkoren sanam hoṛko onkoakʼ tireye jimạletʼkoa, ente lạṛhại jokhecʼ onko do Isor ṭhenko koejoṅkan tahẽkana. Ar uni cetanreko bhorsalen iạte uni do onkoakʼ koejoṅe ańjomletʼ takoa.

²¹ Onko do Hagariạkoren mõṛẽgel hajar ũṭ, bar lakh tala bhiḍi ar bar hajar gadhako luṭjoṅana ar mitʼ lakh hoṛko bondi idiketʼkoa.

²² Ona chaḍa ḍher bạiriko gocʼena, ente Isorakʼ ạyurtege noa lạṛhại do hoylena. Ar Israelko ạuriko bondi idi ocokʼ hạbicʼ onḍegeko girobasokʼ kan tahẽkana.

Manase gusṭiren adha bõsko

²³ Manase gusṭiren adha hoṛko do Bason khon Bakʼal-Harmen, Senir ar Harmen buru hạbicʼ oka jaegareko tahẽkan onḍe girobasokʼko ehopʼena. Onko do lekhare ạḍi ḍherko tahẽkana.

²⁴ Onkoakʼ bõsren mathakoakʼ ńutum do nonka leka tahẽkana Ephor, Jisi Eliyel, Asriyel, Jirimiạ, Hodbiạ ar Johodiyel. Noko birbanṭa hoṛ do ạḍi namḍak hoṛko tahẽkana.

²⁵ Menkhan onkoren hapṛamko do Isorre pạtiạr bako tahẽlena. Ar disạmren okoe jạtrenko Isor do onko samaṅ khone marao utạrletʼko onkoren debotako ṭhenko ạkhrińena.

²⁶ Unre Israelren Isor do Asurren raj Pulakʼ, metakʼme Tiglot-Pileserakʼ monre edrey rakapʼ ocoketʼtaea. Uni do Rubenrenko, Gadrenko ar Manasi gusṭiren adha hoṛkoko bondi idiketʼkote Helho, Habor ar Hara elakare ar Gosen gaḍa aṛereye idiketʼkoa; ar teheń hạbicʼ hõ onko do onḍege menakʼkoa.