1 Bõsbudạ 4 - সান্তালী বাইবেল

Jihudạren bõsko

¹ Jihudạ bõsren hoṛko doko hoyokʼkana Peres, Hisron, Kormi, Hur ar Sobal.

² Sobalren hopon do Raya, ar Rayaren hopon do Johot ar Johotren hopon do Ahumoy ar Lohod. Noko do Sorathiạ bõsren hoṛko tahẽkana.

³ Okoeṭakʼ hoṛ do Oṭam atoye benao rakapʼletʼ uniren hoponko doko hoyokʼkana, Jisriyel, Jisma ar Jidbos. Ar onkoren miseratakʼ ńutum do Hotsolil-Poni tahẽkana.

⁴ Pạnuelren hopon Gador ar Esorren hopon do Hus. Nukin banar do Ephratharen maraṅicʼ hopon Hur bõsren hoṛkin tahẽkana. Ar Hur do Bethlehem atoye benao rakapʼleda.

⁵ Takoya ato okoeye benao rakapʼletʼ uni Ashurren bạhukinakʼ ńutum do Hila ar Nara tahẽkana.

⁶ Narawakʼ kukhire do Ahusom, Hephor, Toimini ar Ohosṭrir nokoakʼ janam hoylena. Noko do Nararen hoponko tahẽkana.

⁷ Hilaren hoponko doko hoyokʼkana Serot, Jitsohor ar Etnon.

⁸ Kosren hoponko doko hoyokʼkana Anub ar Subeba. Kos do Harumren hopon Ahorholer bõsren hapṛame tahẽkana.

⁹ Jabes do acʼren boehako khon arhõ manotan hoṛe tahẽkana. Uniren eṅgat do uniyakʼ noa ńutum dohokateye menleda, “Ạḍi kosṭote nui doń janamledea.”

¹⁰ Jabes do Israelren Isor hohoadeteye metade tahẽkana, “Bhorạńme ar ińakʼ sompotti ḍherkạtińme. Ar amakʼ daṛe do iń são sãote tahenma ar sanam muhin khon rukhiyạyińme jemon kosṭo aloń ńam.” Ar Isor do uniyakʼ nehõrjoṅakʼe ańjomketʼtaea.

Eṭakʼ gharońjren bõsko

^11-12 Suherren boeha Kolubren hopon do Mohir, ar Mohirren hopon do Esṭon ar Esṭonren hoponko doko hoyokʼkana Beth-rapha, Paseho ar Tohinno. Noko sanamkoge Reka atoren hoṛko tahẽkana. Tohinno do Isronahos atoye benao rakapʼleda.

¹³ Konseren hopon dokin hoyokʼkana Othniel ar Sorae ar Othnielren hopon Hothot.

¹⁴ Miyonothoyren hopon Ophra ar Soraeren hopon Joab. Joab do Gi-Horsim atoye benao rakapʼleda. Ona ato do Gi-horsimko metakʼkan tahẽkana, ente onḍenko sanam hoṛge kạrigolko tahẽkana.

¹⁵ Jiphunniren hopon Kalebren hopon doko hoyokʼkana Eru, Ela, Noyom. Elaren hopontetʼakʼ ńutum do hoyokʼkana Konos.

¹⁶ Jiholilren hoponko doko hoyokʼkana Ship, Shipha, Tiriyạ ar Osayel.

^17-18 Esraren hoponko doko hoyokʼkana Jethor, Merod, Ephor ar Jalon. Merod do Pharaoren mitʼṭen hoponera Bithiyại baplaledea. Uniyakʼ kukhire Mạriạm, Sommoy ar Jisbohoakʼ janam hoylena. Jisboho do Esṭiạ ńutuman mitʼṭecʼ atoye benao rakapʼleda. Merodren Jihudi bạhuakʼ kukhire do Jerod, Hebor ar Jikuthiyelakʼ janam hoylena. Jerod do Godor ato, Hebor do Sokho ato ar Jikuthiyạ do Sanoho atoye benao rakapʼleda.

¹⁹ Nohumren misera do Hodiại baplaledea. Uniren gidrạ dokin hoyokʼkana Gormiạ Kiyilar apattetʼ ar Makhathiạ Esṭimiạren apattetʼ.

²⁰ Simonren hoponko doko hoyokʼkana Amon, Rinn, Bin-hanon ar Tilon. Jisiren hopon dokin hoyokʼkana Sohet ar Bin-sohet.

^21-22 Jihudạren hopon Selawakʼ bõsren hoṛ modreko tahẽkana Er, Lada, Beth-asbeyer okoe do mihi musnạ kicricʼko tińetʼkan tahẽkan onkoren sanam bõsko, Jokim ar Kosebarren hoṛko, Joas, Saroph ar Jasu Bilhom Selar hopon Er do Leka atoye benao rakapʼleda ar Lada do Maresha atoye benaoleda. Joas ar Saroph do Moabren disạm cakʼlaokin tahẽkana. Niạko do mare dinko reakʼ tạlika tahẽkana.

²³ Sela bõsren hoṛko modre okoe do Notayim ar Goderareko girobasokʼ kan hoṛko do kuṅkạlko tahẽkana. Onko do rajakʼ kạmi lạgitʼte onḍeko tahẽkana.

Simeonren bõsko

²⁴ Simeonren hopon doko hoyokʼkana Nomuel, Jarib, Seroho ar Sạul.

²⁵ Sạulren hopon doe hoyokʼkana Solum, ar Solumren hopon do Mibsom ar Mibsomren hopon do Misom.

²⁶ Misomren mitʼṭen hopon do Homuyel, Homuyelren hopon do Sokur ar Sokurren hopon do Simoyi.

²⁷ Simoyiren do gel turui hopon ar turui goṭen kuṛiko tahẽkana, menkhan uniren boehakoren do ḍher gidrạko bako tahẽkana. Ona iạte onkoren sanam gusṭiko modre Jihudi gusṭiko leka nunạkʼ gidrạ do bako tahẽkana.

^28-31 Simeon gusṭiren hoṛko do Ber-seba, Molada, Hasor-sual, Bilha, Etsom, Tolad, Bothuyel, Horma, Siglog, Beth-morkaboth, Hasor-sushim, Beth-biri ar Saryimreko girobasokʼkan tahẽkana. Dạudakʼ rajokʼ hạbicʼ niạko ato do onkoakʼge tahẽkana.

^32-33 Onkoakʼ eṭakʼ eṭakʼ atoko reakʼ ńutum do Oṭam, Onan, Rimmon, Tokhen ar Ason tahẽkana. Bakʼal hạbicʼ niạ mõṛẽ goṭecʼ ato beṛhaeteakʼ jaegako do onko tabere tahẽkana. Ar noakorege onko doko girobasokʼkan tahẽkana ar ako apnarakʼ mitʼṭecʼ bõs reakʼ tạlikako dohoyetʼ tahẽkana.

^34-38 Noko do Simeon gusṭiren eṭakʼ eṭakʼ bõsren mukhiyạko tahẽkana. Jehu one onkoren hapṛam do Sorai ar Osiyelkin tahẽkana. Ona chaḍa Eliyenoe, Jakoba, Jisohai, Asai, Adayel, Jisimiyel, Bonae ar Siphir hopon Sis one onko do Alon, Jidyiyo, Simri ar Samariạtekoren hapṛamko tahẽkana. Ar onko bõsren hoṛko do ạḍiko saṅge idiyena.

^39-40 Onate ạsul janwarko ạtińko reakʼ jaega sendrae lạgitʼ noko hoṛ do Gador bahre tapol ot reakʼ purub secʼ senkate bhage ghãs jaegako ńamkeda. Jaega do ạḍi maraṅ, nisun ar napaege tahẽkana. Onḍe do lahate Ham bõsren hoṛko tahẽkana.

⁴¹ Simeon gusṭiren noko hoṛko do Jihudạren raj Hiskiạ oktere onḍeko senlena. Onko do ḍerate senkate onkoko akromonketʼkoa. Ona chaḍa onko do onḍenko Miyuniạko cetanre jhãpko emketʼte onkoko marao utạrketʼkoa. Ar onkoakʼ cetʼ cinhạge bako doholeda. Ona tayom onko do onkoakʼ jaegare girobasokʼko ehopʼena, ente onḍe do akoren ạsul janwarkoakʼ aema ghãsko tahẽkana.

⁴² Simeonko modre mõṛẽ sae hoṛ do Jisir hopon Polṭiạ, Niạriạ, Rophariạ ar Useyel do onkoren mukhiyạ benaokate Seyir ńutuman buru ṭoṭhako akromonkeda.

⁴³ Lahate Amalekiạkoren thoṛa hoṛ do Seyirteko dạṛketʼte onḍeko girobasokʼ kan tahẽkana. Simeonrenko do onko hoṛkoko gocʼ giḍikatʼkote onḍe girobasokʼko ehopʼena. Ar teheń hạbicʼ hõ onko do onḍeko girobasokʼ kana.