1 Bõsbudạ 28 - সান্তালী বাইবেল

Sekʼwa oṛakʼ lạgitʼ Dạudakʼ goṭawakʼ

¹ Dạud do Israelren sanam kạmiyạko Jerusalemre hijukʼ lạgitʼe hukumatʼkoa. Onate sanam lạṛhại birko hecʼlena. Onko doko tahẽkana eṭakʼ eṭakʼ khũṭren mukhiạko, rajren gelbar goṭen lạṛhại phạdkoren senapotiko, hajar ar saeko cetanren senapotiko, raj ar rajren hoponkoakʼ sompotti ńel todarotko hoṛko, raj oṛakʼren kạmiyạko ar lạṛhại birko.

² Ar Dạud raj do teṅgoyente onkoe metatʼkoa, “E ińren boehako ar ińren hoṛko, ińakʼ katha baṛe luturakʼpe. Probhu Isorakʼ bondobos sinduk lạgitʼ, metakʼme aleren Isorakʼ jaṅga dohoytae lạgitʼ mitʼṭecʼ oṛakʼ benao reakʼ mone tahẽkantińạ, ar iń do ona benao lạgitʼ hõń sapṛaolena.

³ Menkhan Isor doe metadińạ, ‘iń lạgitʼ oṛakʼ do alom benaoa, ente am do mitʼṭen lạṛhại bir kanam ar am do mãyãmem joro ocoakada.’

⁴ “Enhõ Israelren Probhu Isor do jaejug Israelko cetanre raj hoyokʼ lạgitʼ ińakʼ goṭa gharońjrenko tala khon ińe bachao ledińa. Uni do mukhiyạ lekate Jihudại bachaoledea, ona tayom Jihudạ khũṭrenko khon iń babawakʼ khũṭe bachaoana ar Israelko cetanre raj hoyokʼ lạgitʼ uniyakʼ kusi lekate ińren boehako tala khon ińgeye bachaoledeńa.

⁵ Uni do aema hoponkoe emadińa, ar onko hoponińko modre Probhu Isorakʼ rajosṭi Israelakʼ siṅghạsonre duṛubokʼ lạgitʼ uni do ińren hopon Solomone bachao akawana.

⁶ Uni do ińe men akawạdińạ, ‘amren hopon Solomon kangeae uni hoṛ, okoe do ińakʼ oṛakʼ ar bakher racae benaoạń, ente ińge ińren hopon hoyokʼ lạgitʼ iń bachao akawana ar iń do uniren apatiń hoyokʼa.

⁷ Uni do ńit hoyokʼkan lekage ińakʼ hukumkoe manao enḍekhan uniyakʼ rajosṭi do jaejug hạbicʼ iń dohoya.’

⁸ “Onate sanam Israelko, metakʼme Probhu Isor do somajren hoṛko ar aboren Isor samaṅre iń do ape ńitokʼ noań hukumape kana, ape do aboren Probhu Isorakʼ sanamakʼ hukumko manao lạgitʼ moneyakʼpe jemon noa mońj disạmrepe tahẽdaṛeakʼa ar jaejug reakʼ sompotti lekate aperen bõskope em daṛeako.

⁹ “Ar ińren hopon Solomon, am do am apatren Isor samaṅrem taṛam ar amakʼ mon ar ontorte unim sewawaea, ente Probhu Isor do sanamkoakʼ ontore baḍaekana ar ganḍonjoṅakʼ hõe baḍaegea. Uniyakʼ monsubạ baḍae reakʼem kurumuṭule khanem baḍae daṛeakʼ, menkhan unim bạgiye enḍekhan uni hõ jaejug lạgitʼe nihạ̃tmea.

¹⁰ Ńitokʼ do moneyakʼme, ente sekʼwae lạgitʼ mitʼṭecʼ oṛakʼ benao lạgitʼ Probhu Isor do amgeye bachao akatʼmea. Am do daṛean hoyokʼme ar kạmime.”

¹¹ Ona tayom Dạud do acʼren hopon Solomon do sekʼwa oṛakʼ reakʼ pinḍạ, ona reakʼ dolanko, khajańci oṛakʼko, cetan ar bhitri reakʼ kandhako ar kại dapal reakʼ ṭhạ̃ikoe noksawadea.

¹² Probhu Isorakʼ oṛakʼ reakʼ bakher raca, ona beṛhaeteakʼ kandhako, Isorakʼ oṛakʼ reakʼ khajańciko ar samaṅokʼ jinisko dohoy reakʼ oka noksa Sonot jiu do Dạud ṭhene sodorletʼ ona do jotoge Solomone baḍae ocokedea.

¹³ Naeke ar Liwikoakʼ eṭakʼ eṭakʼ dolrenkoakʼ kạmi, Probhu Isorakʼ oṛakʼ reakʼ sekʼwa kạmi ar ona kạmire beoharokʼ sanamakʼ jinisko reaṅ uniye hukumadea.

¹⁴ Eṭakʼ eṭakʼ sekʼwa kạmi lạgitʼ okako sona ar rupạ reakʼ jinisko beoharokʼ onako lạgitʼ uni do tinạkʼ sona ar rupạ jạruṛa onae hukumadea.

¹⁵ Mitʼke mitʼ sona reakʼ diuhe dohowakʼ ar diuheko lạgitʼ tinạkʼ sona ar beohar lekate mitʼke mitʼ rupạ reakʼ diuhe dohowakʼ ar diuheko lạgitʼ tinạkʼ rupạ lagaokʼa ona reakʼe hukumadea.

¹⁶ Samaṅakʼ piṭhạ dohoy lạgitʼ sona reakʼ mej lạgitʼ sona ar rupạ reakʼ mejko lạgitʼ tinạkʼ rupạ lagaokʼa onae hukumadea.

^17-18 Jel rakab reakʼ kaṭa kạ̃ṛchuko, samaṅokʼakʼ mãyãm dohoy reakʼ bạṭiko ar kanḍa ar dhudhup pinḍ lạgitʼ tinạkʼ khạṭi sona lagaoakʼ ar mitʼke mitʼ sona ar rupạ reakʼ bhajan lạgitʼ tinạkʼ sona ar rupạ lagaokʼa onae hukumadea. Ona chaḍa, Probhu Isorakʼ bondobos sinduk dapal lạgitʼ okoe sonaren Kerubkinakʼ phạ̃kṛạ̃kʼ kin laplapa akae tahen unkin lạgitʼ tinạkʼ khạṭi sona lagaokʼa ona hõe baḍae ocokedea.

¹⁹ Dạude menkeda, “Probhu Isor iń ṭhen okaṭakʼ nạmunae sodorletʼ tahẽkan uniyakʼ ạyurte iń do onań akaokeda, ar ona nạmuna reakʼ khạṭi-nạṭi bujhạu reakʼ akel do uniye emadiń tahẽkana.”

²⁰ Dạud do acʼren hopon Solomon noa katha hõe metadea, “Daṛean hoyokʼme, ar dil dohoyme ar kạmime. Ar alom botorokʼa, ar alom hadosokʼa, ente Probhu Isor, do am sãoreye menaea. Probhu Isorakʼ sekʼwa kạmi lạgitʼ sekʼwa oṛakʼ ạuri benao sạtokʼ hạbicʼ uni do bae aṛakʼmea se bae bạgiyama.

²¹ Isorakʼ oṛakʼ reakʼ sekʼwa kạmi lạgitʼ eṭakʼ eṭakʼ dolren naekeko ar liwikohõ sapṛaoge menakʼkoa. Ar joto kạmire goṛowam lạgitʼ gạkhuṛ hoṛko menakʼkoa. Mukhiyạko ar sanam hoṛ do amakʼ hukumko senakʼa.”