1 Bõsbudạ 27 - সান্তালী বাইবেল

Lạṛhại phạdkoko hạṭińokʼ kan

¹ Noko doko hoyokʼkana Israel khũṭren mathako, hajarko ar sae-sae lạṛhại phạdkoren subedarko ar onko taberen kạmiyạkoakʼ tạlika. Noko do eṭakʼ eṭakʼ lạṛhại phạdrenko babotre sanamakʼ reaṅ rajko goṛowaekan tahẽkana. Gelbar goṭecʼ dol reakʼ jotowakʼrege bargel pon hajar lạṛhại phạdko tahẽkana. Onko do bochor bhor mimitʼ goṭecʼ dolre mimitʼ cando kateko kạmiyetʼ tahẽkana.

² Pạhil cando lạgitʼ lạṛhại phạdkoakʼ bhar do Sobdiạlren hopon Jaebiam cetanre tahẽkana.

³ Uni do Perosren hopone tahẽkana. Ar pạhil cando lạgitʼ sanam subedarkoren matha hoṛe tahẽkana. Uniyakʼ dolre do bargel pon hajar lạṛhại phạdko tahẽkana.

⁴ Dosar cando lạgitʼ lạṛhại phạdkoakʼ bhar do Ahahiạ Dodahai cetanre tahẽkana. Uni tabere Milkoth do dolren matha hoṛe tahẽkana. Uniyakʼ dolre do bargel pon hajar lạṛhại phạdko tahẽkana.

⁵ Tesar cando lạgitʼ subedar do naeke Jehoyadaren hopon Bonaye tahẽkana. Uni do tesar dolren matha hoṛe tahẽkana. Uni dolre do bargel pon hajar lạṛhại phạdko tahẽkana.

⁶ Nui doe uni Bonae kana okoe do “Pegel” ńutuman lạṛhại birkoren matha hoṛe tahẽkan. Uniren hopon Amisabad hõ ona dolrengeye tahẽkana.

⁷ Ponakʼ cando lạgitʼ ponakʼ dolren subedar do Joabren boeha Asahele tahẽkana. Uniyakʼ gujukʼ tayom uniren hopon Sobdiạ do subedare hoylena. Uniyakʼ dolre do bargel pon hajar lạṛhại phạdko tahẽkana.

⁸ Mõṛẽakʼ cando lạgitʼ mõṛẽakʼ dolren subedar do Jisrahiạ Somhuth. Uniyakʼ dolre do bargel pon hajar lạṛhại phạdko tahẽkana.

⁹ Turuiakʼ cando lạgitʼ do Tokoyiạ Ekesren hopon Era do dolren subedare tahẽkana.

¹⁰ Eaeakʼ cando lạgitʼ eaeakʼ dolren subedar do Poloniạ Helose tahẽkana; uni do Ephrayem gusṭiren hoṛe tahẽkana. Uniyakʼ dolre do bargel pon hajar lạṛhại phạdko tahẽkana.

¹¹ Irạlakʼ cando lạgitʼ irạlakʼ dolren subedar do Husatiạ Sibokhoye tahẽkana; uni do Seroho bõsren mitʼṭen hoṛe tahẽkana. Uni dolre do bargel pon hajar lạṛhại phạdko tahẽkana.

¹² Areyakʼ cando lạgitʼ areyakʼ dolren subedar do Anathotiạre Abiyesore tahẽkana; uni do Benjạmin gusṭiren hoṛe tahẽkana. Uniyakʼ dolre bargel pon hajar lạṛhại phạdko tahẽkana.

¹³ Gelakʼ cando lạgitʼ dolren subedar Noṭophotiạ Mohorae do matha hoṛe tahẽkana. Uni do Seroho bõsren mitʼṭen hoṛe tahẽkana. Uniyakʼ dolre do bargel pon hajar lạṛhại phạdko tahẽkana.

¹⁴ Gelmitʼ cando lạgitʼ, gelmitʼ dolren subedar do Piriạthoniren Bonaye tahẽkana. Uni do Epharyim gusṭiren mitʼṭen hoṛe tahẽkana. Uniyakʼ dolre do bargel pon hajar lạṛhại phạdko tahẽkana.

¹⁵ Gelbar cando lagitʼ, gelbar dolren subedar do Noṭophotiạ Hildoye tahẽkana. Uniyakʼ dolre bargel pon hajar lạṛhại phạdko tahẽkana.

Eṭakʼ eṭakʼ gusṭiren mukhiyạko

¹⁶ Israel khũṭkoren matha cakʼlaokoakʼ tạlika do nonka leka: Rubenren matha Sikri hopon Elieser, Simeonren matha do Makʼkaren hopon Sephaṭia,

¹⁷ Lewi khũṭren matha do Kemuel hopon Hasabia, Aronren hoponkoren matha do Sadok,

¹⁸ Lewi khũṭren matha do Dạudren boeha Elihu, Isakar-khũṭren matha do Mikayelren hopon Omri,

¹⁹ Sebulon khũṭren matha do Obadiạ hopon Ismaya, Napthali- khũṭren matha do Asriyal hopon Jeremot,

²⁰ Ephrayim khũṭren hopon do Asasia hopon Hosea; Manase-khũṭren adha hoṛkoren matha do Pedayren hopon Joel,

²¹ Gileadren Manase khũṭren adha hoṛkoren matha Sekaria hopon Ido, Benjạmin khũṭren matha Abner hopon Jasiyel,

²² Dan khũṭren matha Jehoram hopon Asarel. Nokoge Israel khũṭkoren mathako tahẽkana.

²³ Dạud do bargel se ona khon kom umerren hoṛ do bae lekhaletʼkoa, ente Probhu Isor do Israelkoakʼ lekha sermaren ipil lekae hoyocokoa menteye gokʼletʼ tahẽkana.

²⁴ Seruya hopon Joab do hoṛ lekhae ehopʼletʼgea, menkhan uni do bae sạt daṛeada. Ar hoṛ lekha khạtirte Israelko cetanre Probhu Isorakʼ edre do paṛaolena. Ona iạte Dạud rajakʼ itihãs puthire hoṛkoakʼ jãhãn gunti do baṅ ol akana.

Rajakʼ sompotti ńel todarotko

²⁵ Rajakʼ khajańciko ńel todarot reakʼ bhar do Adiyel hopon Asmawet cetanre tahẽkana. Ar khet-baṛge, atoko, nagrahako ar usul horho oṛakʼkore okako khajańci oṛakʼ tahẽkana onako reakʼ bhar do Usiạ hopon Jonathan cetanre tahẽkana.

²⁶ Cacasko ńeltodarotko reakʼ bhar do Kelub hopon Esriye cetanre tahẽkana.

²⁷ Darkha bagwan reakʼ bhar do Ramathi Simaye cetanre tahẽkana. Ar bagwan khon oka darkha rasa ńamokʼkan tahẽkan ona murại reakʼ bhar do Sphmi hoṛ Sabdiye cetanre tahẽkana.

²⁸ Pạchim secʼ copotʼ ot ṭoṭhakore jạit dare ar loa dare reakʼ bhar do Gederi hoṛ Bakʼal-hanan cetanre tahẽkana. Ar jạit sunum kunḍko reakʼ bhar do Joas cetanre.

²⁹ Saronre okoe gại-ḍaṅgrako ạtińkan tahẽkan onko cetanre do Saroniạ Sotray cetanre bhar tahẽkana. Ar buru lodam oteteren gại-ḍaṅgrako cetanre do Adlai hopon Saphat cetanre tahẽkana.

³⁰ Ismaeliạ Obilakʼ do ũṭko cetanre bhar tahẽkantaea. Ar Merothi hoṛ Jehdiay do gadhako cetanre bhar tahẽkantaea.

³¹ Merom ar bhiḍiko cetanre do Hagri hoṛ Jasisakʼ bhar tahẽkana. Ar Dạud rajakʼ sompotti ńel todarot reakʼ bhar do nokoko ńel todarotetʼkan tahẽkana.

³² Dạudren kakattetʼ Jonathan do budanicʼ, sopolhayicʼ ar olokʼicʼe tahẽkana. Ar rapajren hoponko cecetʼakʼ emako reakʼ bhar do Hakmoni hopon Jehiyel cetanre tahẽkana.

³³ Ahitophel do rajren sopolhayic, ar Arki hoṛ Husại do rajren gateye tahẽkana.

³⁴ Ahitophelakʼ gujukʼ tayom do Abiathor ar Banaeren hopon Jehoyada nukin do rajren sopolha hoṛkin tahẽkana. Ar rajren lạṛhại phạdren senapoti do Joabe tahẽkana.