1 Bõsbudạ 26 - সান্তালী বাইবেল

Rurukhiyạ dolrenko

¹ Rurukhiyạko do eṭakʼ eṭakʼ dolreko hạṭińlen tahẽkana. Korohoko mod khon Asaph bõsren Koriren hopon Moselimiạ do bõskoren apate tahẽkana.

² Moselimiạren hoponko doko hoyokʼkana, pạhilicʼ do Sakariạ, dosaricʼ do Jidiyel, Tesaricʼ do Sobdiạ, Ponicʼ do Jothniyel,

³ mõṛẽyicʼ do Elom, turuiyicʼ do Jihohanon, eaeyicʼ do Elihoinoy.

^4-5 Obed Edom do bõskoren apate tahẽkana. Isor do Obed-Edom irạl goṭen hoponkoe emadea are bhoradea. Uniren hoponko doko hoyokʼkana; pạhilicʼ do Somoyiạ, dosaricʼ do Jihosabod, tesaricʼ do Joyaho, ponicʼ do Sakor, mõṛẽyicʼ do Nothnel, Turuyicʼ do Ammiyel, eaeyicʼ do Isakar ar irạlicʼ do Piyullotoy.

⁶ Obed-Edomren hopon Somoyiaren do adom hoponko tahẽkana; onko mimitʼko onkoren mukhiyạko tahẽkana, ente onko do lạṛhại birko tahẽkana.

⁷ Somoyiren hopon doko hoyokʼkana; Atni, Rophayel, Obed, Elsabod. Somoyi bõsren Elihu ar Somothiạ hõ daṛean hoṛkin tahẽkana.

⁸ Noko sanamkoge Obed-Edom bõsren hoṛko tahẽkana. Onko ar onkoren hoponko ar bõsrenko do lek lekan ar daṛean hoṛko tahẽkana. Obed-Edom bõsren hoṛko do jotote turuigel bar hoṛko tahẽkana.

⁹ Moselimiạren hoponko ar uni bõsrenko do daṛean hoṛko tahẽkana. Onko do jotote gel irạl hoṛko tahẽkana.

^10-11 Morari bõsren Hosaren ponea hoponko modre pạhilicʼ do Simri, dosaricʼ do Hilkiạ, tesaricʼ do Ṭoboliạ, ponicʼ do Sakariạ. Simri do ạikhạ pạhilicʼ hopon do bae tahẽkana, menkhan uniren apattetʼ do mukhiyạ menteye doholedea. Hosaren hoponko ar uni bõsren hoṛko do jotote gelpe hoṛko tahẽkana.

¹² Eṭakʼ eṭakʼ dolre hạṭiń akan noko rurukhiyạko do akoren mukhiyạko tabere tahẽkate onkoren gusṭi boehako lekage Probhu Isorakʼ oṛakʼre sewa kạmi reakʼ dạyikko ńamleda.

¹³ Bõs lekate huḍiń khon haṛamko onko jotoko lạgitʼge gulibãṭ do hoylena jemon oka dolrenko do oka phaṭok duạreko kạmiya mente.

¹⁴ Purub secʼakʼ phaṭok duạr lạgitʼ guli do Selimiạ ńutumte rakapʼena. Ona tayom do uniren hopon Sakariạ lạgitʼ gulibãṭ hoyen khan uni ńutum reakʼ guli do utạr secʼakʼ phaṭok duạr lạgitʼ rakapʼena. Uni do mitʼṭen akelan sosolhayicʼe tahẽkana.

¹⁵ Dạkhin secʼakʼ phaṭok duạr lạgitʼ guli do Suppim ar Hosawakʼ ńutumte rakapʼena.

^16-17 Pạchim secʼ reakʼ phaṭok duạr lạgitʼ guli do Suppim ar Hosawakʼ ńutumre rakapʼena. Niạ phaṭok duạr do cetan secʼakʼ ḍahar cetan reakʼ Sollekhot ńutumanakʼ phaṭok duạr ṭhen tahẽkana. Noko Liwiko do pạli pạliteko kạmiyetʼ tahẽkana. Purub secʼ do turui hoṛ, utạr secʼ pon hoṛ ar dạkhin secʼ do pon hoṛ pahradar din hilokʼko kạmiyetʼ tahẽkana ar murại oṛakʼre do babar hoṛkate kin tahenkan tahẽkana.

¹⁸ Pạchim secʼakʼ raca lạgitʼ ḍahar secʼ pon hoṛ ar racare bar hoṛkin tahenkan tahẽkana.

¹⁹ Noage Koroho ar Morari bõsren rurukhiyạkoakʼ hạṭińokʼ reakʼ do tahẽkana.

Murại oṛakʼ ńel todarot ar eṭakʼ eṭakʼ kạmiyạko.

²⁰ Isorakʼ oṛakʼ reakʼ dhon bhanḍar ar Isor ńutumte begar dohoakatʼ jinisko reakʼ ńel todarot reakʼ bhar do sarecʼ Liwiko mod khon Ahiyạ cetanre tahẽkana.

^21-22 Gersen Ladonren hopon doe hoyokʼkana Jihiyeli. Jihiyeliren hopon Sethom ar uniren boeha Joel cetanre do Probhu Isorakʼ oṛakʼ reakʼ dhon bhanḍar ńel todarot reakʼ bhar tahẽkana. Nukin do onkoren apan ạpin bõsren mukhiyạ kin tahẽkana.

²³ Amramiạ, Jishoriạ, Hebroniạ ar Usiyeliạko hõ kạmi reakʼ bharko emocolena.

²⁴ Sobuyel ńutuman Moseren hopon Gersom bõsren mitʼṭen hoṛ do dhon rurukhiyicʼren sordare tahẽkana.

²⁵ Gersemren hopon Eliaser hotete Solomoth do Sobuel bõsren hoṛe tahẽkana. Eliaserren hopon Rohobiạ, Rohobiạren hopon Jisayaho, Jisayahoren hopon Joram, Joramren hopon Sikhri, Sikhriren hopon Solomoth.

²⁶ Dạud raj do Israelren eṭakʼ eṭakʼ mukhiyạko, hajar ar sae cetanren subedarko ar maraṅ subedarko okaṭakʼ jinisko Isor ńutumteko begar doholetʼ Solomoth ar uni bõsren hoṛko do onako jinis reakʼ bhanḍarko ńel todarotetʼ tahẽkana.

²⁷ Lạṛhạire luṭ akatʼ adomakʼ jinisko onko do Probhu Isorakʼ oṛakʼ jut aroe ńutumte uni lạgitʼko begar dohoakatʼ tahẽkana.

²⁸ Ona chaḍa ńeńelicʼ Sạmuel, Kisren hopon Sạul, Nerren hopon Abner ar Soruaren hopon Joab do okako jinis Isor ńutumteko begar doholetʼ, metakʼme begar dohoakatʼ sanamakʼ jinisko ńel todarot reakʼ bhar do Solomoth ar uni bõsren hoṛko cetanre tahẽkana.

²⁹ Jisohoriạko mod khon Kananiạ ar uniren hoponko do koejoṅ oṛakʼ reakʼ kạmire do bako lagao ocolena, menkhan onko do Israel disạm cetanre kạmiyạko ar bikʼcạr kạmireko bahal ocoyena.

³⁰ Hebroniạko mod khon Hosbiạ ar uni bõsren mitʼ hajar eae sae daṛean hoṛ do Probhu Isorakʼ ar rajakʼ sanamakʼ kạmi lạgitʼ jordan gaḍa reakʼ pạchim secʼren Israelko cetanreko bahal ocoyena.

³¹ Hebronko modre Jiriạ do mukhiyại tahẽkana. Dạudakʼ rajokʼ pon gelakʼ bochorre onkoakʼ bõs tạlika mod khonko bachao ocoyena ar Geliad reakʼ Jaserre Hebroniạko modre aema lạṛhại birko ńamena.

³² Jiriạwakʼ bõsren bar hajar eae sae hoṛ do daṛeankoko tahẽkana. Onko do apan ạpin gharońjren mathako tahẽkana. Dạud raj do Isor ar rajakʼ sanamakʼ kạmi lạgitʼ Rubenrenko, Gadrenko ar Manase gusṭiren adha hoṛko cetanre Hebronrenkoe bahalketʼkoa.