1 Bõsbudạ 24 - সান্তালী বাইবেল

Naekekoakʼ dol hạṭińokʼkan

¹ Aron bõsren hoṛko do eṭakʼ eṭakʼ dolreko hạṭiń ocolena. Aronren hoponko doko hoyokʼkana Nadab, Abihu, Eliaser ar Ithamor.

² Aron ạuriye gujukʼrege Nadab ar Abihu do gidrạ ạurikin ńamkorege kin gocʼena; ar Eliaser ar Ithamor do naeke kạmikin kạmikan tahẽkana.

³ Sadok ńutuman Eliaserren do mitʼṭecʼ bõs ar Ahimelok ńutuman Ethamorren mitʼṭen hoponakʼ goṛote Dạud do naekekoakʼ kạmi lekate onko do eṭakʼ eṭakʼ dolreye hạṭińletʼkoa.

⁴ Onate Ethamor bõsren hoṛko khon Eliaser bõsren hoṛko talare ạḍi ḍher mukhiyạko ńamena. Ona iạte Eliaser bõsren gel turui mukhiyạko lạgitʼ onkoren gel turui dolre ar Ethamor bõsren irạl goṭen mukhiyạko lạgitʼ onko do irạl goṭecʼ dolreko hạṭińena.

⁵ Eliaser ar Ithamar, niạ banar bõsren mukhiyạko do koejoṅ oṛakʼ reakʼ ar Isorren kạmiyạkoko tahẽkante okoe secʼhõ sen baṅkate gulibãṭkate naeke kạmiko hạṭińana.

⁶ Raj ar uniren maraṅ hudạren kạmiyạko samaṅre ar naeke Sadok, Abiạthorren hopon Ahimelok, naeke bõsren mukhiyạko ar Liwiko samaṅre Nathanielren hopon Somoyiạ ńutuman mitʼṭen Liwi olokʼicʼ do gulibãṭ lekate onko mukhiyạkoakʼ ńutum do tạlikareye ol caṛhaoletʼtakoa. Ar pạli pạlikate Eliaserren eṭakʼ eṭakʼ bõsko mod khon mitʼ hoṛ ar ona tayom do Ithamorren eṭakʼ eṭakʼ bõsko mod khon mitʼ hoṛ lạgitʼ gulibãṭ hoyena.

⁷ Unre pạhilre do Jihoyaribakʼ ńutum rakapʼena, dosar dhao do Jidoyirakʼ,

⁸ Tesar dhao do Harimakʼ, ponakʼ dhao do Siyorimakʼ ńutum,

⁹ Mõṛẽakʼ dhaore do Molkiạwakʼ, turuiyakʼ dhaore do Miyaminakʼ,

¹⁰ Eaeakʼ dhao do Hokoserakʼ, irạlakʼ dhao do Abiạwakʼ,

¹¹ areakʼ do Jesuwakʼ, gelakʼ dhao do Sokheniạwakʼ,

¹² gelmitʼakʼ dhaore do Eliasibakʼ, gelbar dhaore do Jakimakʼ,

¹³ gelpeakʼ dhaore do Hupakʼ, gelponakʼ dhaore do Jesobarakʼ,

¹⁴ gel mõṛẽakʼ dhao do Bilgar, gel turuiakʼ dhao do Emerewakʼ,

¹⁵ gel eaeakʼ dhao do Hesirakʼ, gel irạlakʼ dhaore do Hopiseserakʼ,

¹⁶ gel areakʼ dhaore do Pothahiạwakʼ, bargelakʼ dhaore do Jeheskelakʼ,

¹⁷ bargel mitʼ dhaore do Jakhinakʼ, bargel bar dhaore do Gamulerakʼ,

¹⁸ bargel pe dhaore do Dolayakʼ ar bargel ponakʼ dhaore do Maseyakʼ ńutum rakapʼena.

¹⁹ Onkoren hapṛam Arone emade tahẽkan Probhu Isorakʼ hukum lekate Aron do onko lạgitʼ okaṭakʼ niạme ṭhik doholetʼ onkage Probhu Isorakʼ oṛakʼte senkate sapʼsosor kạmi lạgitʼ nonkage onkoakʼ pạliko ṭhiketʼtakoa.

Liwikoren judạ judạ bõsren mukhiyạko

^20-21 Liwi gusṭiren sarecʼ bõskoakʼ katha do nonka leka: Amram bõsren Sobuel ar Rohobiạ do bõskoren apatkin tahẽkana; Sobuelakʼ bõsren mukhiyạ do Jehodiạ ar Rohobiạ bõsren mukhiyạ do Jisiyiại tahẽkana.

²² Jehosorakʼ bõsren apat Solomot ar Solomot bõsren mukhiyạ do Johot.

²³ Hebron bõsren modre pạhilicʼ do Jiriạ, dosaricʼ do Amoriạ, tesaricʼ do Johosiyel ar ponicʼ do Jikomiạ noko do bõskoren apatko tahẽkana.

^24-25 Usiyel bõsren Mikạ ar Jisiạ do bõskoren apatkin tahẽkana; Mikạ bõsren mukhiyạ do Samir ar Jisiyi bõsren mukhiyạ do Sakariại tahẽkana.

²⁶ Merariren hopon do Mahale, Musi ar Jasiạ;

²⁷ Jasiạ bõsren Binạ Sohom, Sukur ar Ebri do bõsren apatko tahẽkana.

²⁸ Mahale bõsren do Eliaser ar Kis; Eliaserren do hoponge bako tahẽkantaea.

²⁹ Kisakʼ bõsren mukhiyạ do Jirhomele tahẽkana.

³⁰ Musiyakʼ bõsren Mahale, Edor ar Jiromoth do bõskoren apatko tahẽkana.

³¹ Noko hõ Dạud raj, Sadok, Ahimelok ar naeke ar Liwikoakʼ bõsren mukhiyạko samaṅre onkoren boehako, metakʼme Aron bõsren hoṛko lekako gulibãṭleda. Ar baṅ do maraṅicʼ boeha kane baṅ do huḍińicʼ boeha kane onko sanamko lạgitʼ inạ mitʼ lekageko gulibãṭleda.