1 Bõsbudạ 23 - সান্তালী বাইবেল

¹ Dạud do tinreye haṛam cabayena unre uniren hopon Solomon do Israel cetanreye rajkadea.

Liwikoakʼ dol hạṭińokʼkan

² Dạud do Israelren sanam mukhiyạko, naekeko ar Liwikoe jarwa mitʼketʼkoa.

³ Ar okoe Liwikoakʼ umer do pegel se ona khon bạ̃ṛti umer tahẽkan onkoakʼ lekha do pegel irạl hajar tahẽkana.

^4-5 Noko mod khon bargel pon hajar hoṛko do oṛakʼ reakʼ kạmiko ńel todarot lạgitʼe bahalketʼkoa ar turui hajar hoṛko do kạmiyạko ar bikʼcạrko lạgitʼe dohoketʼkoa ar pon hajar hoṛko do rurukhiyạko lạgitʼe dohoketʼkoa. Ar Dạud okako bajnae benaoletʼ onakote Probhu Isor sarhaoe lạgitʼ sarecʼ pon hajar Liwikoe bahalketʼkoa.

⁶ Liwiren hopon Gerson, Kohat ar Merariakʼ bõs lekate Dạud do Liwiko pe hạṭińteye hạṭińketʼkoa.

⁷ Gersonakʼ bõsrenko modre do Ladon ar Simiyikin tahẽkana.

⁸ Ladonren pea hoponko modre maraṅicʼ do Jihiyel, ona tayom do Sethom ar Joyel.

⁹ Simiyeren hopon doko hoyokʼkana Salomoth, Hosayel ar Haron. Noko do Ladonakʼ eṭakʼ eṭakʼ bõsren mukhiyạko tahẽkana.

¹⁰ Simiyiren ponea hopon doko hoyokʼkana, Johot, Sin, Jiyus ar Boriạ.

¹¹ Noko modre pạhilicʼ do Johot, ar dosaricʼ do Sin; menkhan Jiyus ar Boriạren hoponkoakʼ lekha do komge tahẽkante onko do jotoge mitʼ bõsren menteko lekhayetʼko tahẽkana.

¹² Kohatren ponea hopon doko hoyokʼkana Amram, Jishor, Hebron ar Usiyel.

¹³ Amramren hopon dokin hoyokʼkana Haron ar Mose. Haron ar uniren bõsko do jaejug lạgitʼ Isor ńutumteko begar ocoyena jemon onko do sonot utạrakʼ jinisko reakʼ bharko ataṅ daṛeakʼ, ar Probhu Isor samaṅre seṅgelteakʼ samaṅokʼakʼ ko samaṅ daṛeakʼ, ar uni samaṅre sekʼwa kạmiko kạmi daṛeakʼ ar uni ńutumte bhorko emdaṛeakʼ.

¹⁴ Menkhan Isorren hopon Moseren sarecʼ hoponko do Liwiko modreko lekhayetʼko tahẽkana.

¹⁵ Moseren hoponko doko hoyokʼkana Gersam ar Eliaser.

¹⁶ Gersamren bõsko modre Sobuel do mukhiyại tahẽkana.

¹⁷ Eliyesorren bõsko modre Rohobiạ do mukhiyại tahẽkana. Eliyeserren do cele hoponge bako tahẽkantaea, menkhan Rohobiyạren hoponkoakʼ lekha do ạḍi utạr tahẽkana.

¹⁸ Jesorren bõsko modre Solomit do mukhiyại tahẽkana.

¹⁹ Hebronren hoponko modre pạhilicʼ do Jiriạ, dosaricʼ do Amoriạ, tesaricʼ Johosiyel ar ponicʼ do Jikomiam.

²⁰ Usiyelren hoponko modre Mikạ do pạhilicʼ ar Jesiạ do dosaricʼe tahẽkana.

²¹ Merariren hopon dokin hoyokʼkana Maheli ar Musi. Maheliren hopon dokin hoyokʼkana Eliaser ar Kis.

²² Eliaser do cele hoponge bako tahẽkantaea, menkhan eken kuṛigeko tahẽkana. Kisren hoponko, metakʼme uniren kakattetʼren hoponko do onko kuṛiko baplaletʼkoa.

²³ Musiren pea hopon doko hoyokʼkana Maheli, Edor ar Jiromoth.

Liwikoakʼ kạmi

²⁴ Nokoge bõslekate Liwi gusṭiren eṭakʼ eṭakʼ bõskoren mukhiyạko tahẽkana. Noko do bõsren hoṛko talare okoekoakʼ umer do bargel se ona khon bạ̃ṛti tahẽkan onko do lekha kate ńutum ol hoylentakoa, ar onkoge Probhu Isorakʼ oṛakʼren sapʼsosor kạmiyạ hoṛko tahẽkana.

²⁵ Dạude menleda, “Israelren Probhu Isor do acʼren hoṛko suluke emakatʼkoa ar uni do jaejug hạbicʼ Jerusalemreye girobasokʼa.

²⁶ Onate sekʼwa kạmire bebohar lạgitʼ ḍera tạmbu se eṭakʼ jãhãn jinis Liwiko do ar gokʼ idi baṅ lagao akoa.”

²⁷ Dạudakʼ ses reakʼ hukum lekate bargel bochor khon ehopʼkate ona khon ḍher umerren Liwikoakʼ lekhage hoylena.

²⁸ Noko Liwikoakʼ kạmi do Probhu Isorakʼ oṛakʼre sapʼsor ar Aronren bõsko goṛowako reakʼko kạmikan tahẽkana. Ona modre koejoṅ oṛakʼ reakʼ raca ar ona aṛe reakʼ kandhako ńel todarot reakʼ bhar, ar sanam sonotakʼ jinisko sapha dohoy ar Isorakʼ oṛakʼ reakʼ eṭakʼ eṭakʼ kạmiko reakʼ bhar hõ tahẽkana.

²⁹ Onko cetanre okako kạmi reakʼ bhar tahẽkan ona do hoyokʼkana: samaṅakʼ piṭhạ, anaj samaṅ reakʼ holoṅ, bin khạmiyanakʼ piṭhạ, rapakʼ piṭhạ ar sunum mesalakʼ holoṅ. Ona chaḍa joto lekanakʼ sosoṅakʼ ar porimanko ńel todarot reakʼ bhar hõ tahẽkana,

^30-31 ar dinạm hilokʼ setakʼ ar ạyupʼ jokhecʼ teṅgokate Probhu Isor sarhaoe ar õṛhẽye ar jirạukʼ mãhãre, ambas reakʼ porobre ar eṭakʼ eṭakʼ porobre tinre Probhu Isor ńutumte jeredokʼ samaṅokʼ reakʼ porobko hoyocoya ona jokhecʼ hõ jemon Probhu Isorko sarhaoe arko õṛhẽ daṛeaea. Probhu Isor samaṅre jaoge, uniyakʼ hukum lekate ar uniye udukʼ akatʼko leka sapʼsor reakʼko kạmiko daṛeakʼ.

³² Nonkate Liwiko do ńapamokʼ tạmbu ar sonot ṭhạ̃i reakʼko ńel todarotetʼ tahẽkana ar Probhu Isorakʼ oṛakʼ reakʼ sapʼsor kạmi lạgitʼ onkoren boeha Aron bõsrenkoakʼ tabere tahẽkateko kạmikan tahẽkana.