1 Bõsbudạ 22 - সান্তালী বাইবেল

¹ Inạ tayom Dạude menkeda, “Probhu Isorakʼ oṛakʼ ar Israelkoakʼ jeredokʼ samaṅokʼ reakʼ pinḍ do nonḍege hoyokʼa.”

Mundil oṛakʼ lạgitʼ sapṛaokʼ

² Etạkʼ jạtren okoeko hoṛ do Israel disạmreko girobasokʼ kan tahẽkan Dạud do onko jarwako lạgitʼe hukumkeda. Onko mod khon uni do dhiri lakʼ rog lạgitʼ hoṛkoe bachaoana jemon onko do Isorakʼ oṛakʼ benao lạgitʼ dhiriko lakʼ rokʼ daṛeakʼ.

³ Uni do phaṭok duạr ar kobjako reakʼ jạlại lạgitʼ ạḍi ḍher mẽṛhẽtʼe emena, ar nunạkʼ pitạle emena je, ona do bako ojon daṛeada.

⁴ Ona chaḍa uni do alekha debdạru kaṭko hõe emena, ente Sidon ar Turren hoṛko do debdạru reakʼ alekha kaṭko Dạud lạgitʼko ạgukeda.

⁵ Dạude menkeda, “Ińren hopon Solomon do umerteye komaogea ar bae gạkhuṛa, menkhan Probhu Isor lạgitʼ okaṭakʼ oṛakʼ benao hoyokʼ ona do sanam jạtren hoṛkoakʼ mẽtʼre ńutumanakʼ, jak jomok ar ṭhonokte perecʼ hoyokʼma. Ona lạgitʼ iń do jotowakʼiń jogaṛ dohokakʼa.” Niạ menkate Dạud do acʼakʼ gujukʼ ạurire aema lekanakʼ jiniskoe jogaṛ dohokada.

⁶ Ona tayom acʼren hopon Solomone hohoadete uni cetanre Israelkoren Probhu Isor ńutumte mitʼṭecʼ oṛakʼ benao lạgitʼ bhare emadea.

⁷ Dạud do Solomone metadea, “E beṭa, ińren Probhu Isor lạgitʼ mitʼṭecʼ oṛakʼ benao reakʼ ạḍi monsubạ tahẽkantińạ.

⁸ Menkhan Probhu Isor do noa kathae baḍae ocokedińa, ‘am do aema mãyãmem joro ocoakada ar ạḍi dhaoem lạṛhại akana. Iń lạgitʼ oṛakʼ do alom benaoa, ente dhạrtire am do ińakʼ mẽtʼ samaṅre aema mãyãmem joro ocoakada.

⁹ Menkhan amren do mitʼṭen koṛa hopone hoyokʼtama uni do suluke kusiyakʼa. Uni do beṛhaeten bạirikoakʼ ti khon sulukteń dohokaea. Uniyakʼ ńutum do Solomon dohokʼtaea (metakʼme, monre suluk), ente uniyakʼ rajokʼ oktere Israelko do suluk ar nirạiteko tahena.

¹⁰ Unige iń lạgitʼ mitʼṭecʼ oṛakʼe benaoa. Uni do ińren hopone hoyokʼa ar iń do uniren apatiń hoyokʼa. Israelko cetanre uniyakʼ rajosṭi do jaejug hạbicʼ tahentaea.’

¹¹ “E beṭa, Probhu Isor do ńitokʼ am sãote baṛeye tahenma; jo bahakʼme ar Probhu Isorakʼ katha leka uni lạgitʼ mitʼṭecʼ oṛakʼ benaome.

¹² Probhu Isor do Israelko ḍanṭaoko reakʼ bhar tinre am cetanreye emokʼa unre uni do bud ar ạkil hõe jimạwama jemon amren Probhu Isorakʼ ạn-ạrikom dohoytae.

¹³ Probhu Isor do Mose hotete Israelko lạgitʼ okaṭakʼ ạn-ạri ar hukumkoe emakan onako jodi sontortem pańjae enḍekhan am dom khạṭigem jo-bahakʼa. Am do daṛeanicʼ hoyokʼme ar monre dil dohoyme. Alom botorokʼa se alom torasokʼa.

¹⁴ “Iń do ạḍi kosṭote Probhu Isorakʼ oṛakʼ lạgitʼ pe hajar are sae ṭon sona ar pegel are hajar ṭon rupạń jogaṛ dohoakada. Ona chaḍa nunạkʼ ḍher pitạl ar mẽṛhẽtʼkoń jogaṛ akada ona do ohoge soṅlena, dhiri ar kaṭ hõń jogaṛ dohoakada. Am do noare arhõm juṭucʼ daṛeakʼa.

^15-16 Amren do ạḍi utạr kạmiyạkoko tahena; onko doko hoyokʼ kana dhiri lakʼ rokʼren mistriko, raj mistriko ar chutạr mistriko. Ona chaḍa eṭakʼ eṭakʼ kạmi lạgitʼ gạkhuṛ hoṛko okoe do sona, rupạ, pitạl ar mẽṛhẽtʼ reakʼ mońjko kạmi daṛeakʼ. Ar noako kạmiren kạrigol doko ḍhergea. Am do ńitokʼ kạmi ehobme, ar Probhu Isore do am sãote baṛeye tahenma.”

¹⁷ Ona tayom Dạud do acʼren hopon Solomon goṛowae lạgitʼ Israelren sanam mukhiyạko hukumatʼkoteye metatʼkoa,

¹⁸ “Aperen Probhu Isor do cetʼ ape sãote bạnugicʼan? Uni do sanam secʼtege cetʼ sulukte bae dohoakatʼpea? Uni do niạ disạmren hoṛko ińakʼ tireye soprotketʼkote disạm do Probhu Isor ar uniren hoṛko tabere hoyakana.

¹⁹ Ńitokʼ ape do aperen Probhu Isorakʼ sana baḍae lạgitʼ apeakʼ goṭa jiwi, daṛete ar monte Probhu Isor ńutumte uniyakʼ sonot oṛakʼ benao lạgitʼ lạgiyạ paṛaokʼpe, jemon Probhu Isorakʼ bondobos reakʼ sinduk ar sonotakʼ jinisko do ạgukʼte onare dohokʼ.”